លោក កាន់ ស៊ីណុច ប្រធានក្រុមប្រឹក្សាភិបាលសមាគមលើកកម្ពស់ម្រេចកំពត រំពឹងថា ការនាំចេញម្រេចកំពត ដែលជាផលិតផល GI នឹងអាចសម្រេចបានជាង១០០តោននៅឆ្នាំនេះ ក្រោយនៅ៩ខែឆ្នាំនេះ បាននាំចេញជាង៨៨តោន។ ការរំពឹងបែបនេះ ក៏ដោយសារទិន្នផលម្រេចកំពត ដែលកសិករប្រមូលផលបាននៅឆ្នាំនេះមានការកើនឡើងទ្វេដង បើធៀបនឹងទិន្នផលដែលទទួលបានកាលពីឆ្នាំមុនដែលមានប្រមាណជាង៥០តោន។
ទន្ទឹមនឹងទិន្នផលមានការកើនឡើង តម្លៃម្រេចកំពត នៅឆ្នាំនេះ ក៏ហាក់ខ្ពស់ជាងឆ្នាំមុនៗផងដែរ ក្នុងនោះម្រេចខ្មៅអាចលក់បានក្នុងតម្លៃ១៧ដុល្លារ ម្រេចក្រហម២៧ដុល្លារ និងម្រេចស៣០ដុល្លារក្នុង១គីឡូក្រាម។ ប្រធានសមាគមរូបនេះរំពឹងថា តម្លៃម្រេចកំពតនឹងមានការកើនឡើងបន្ថែមទៀតនៅក្រោយ បន្ទាប់ពីមានក្រុមហ៊ុនប្រមូលទិញមានផែនការបង្កើនតម្លៃបន្ថែមប្រមាណ១ដុល្លារក្នុង១គីឡូក្រាម។
គួរបញ្ជាក់ថា ម្រេចកំពតរបស់កម្ពុជា ប្រមាណ៨៥% ត្រូវបាននាំចេញទៅលក់នៅលើទីផ្សារអន្តរជាតិ ពិសេសទីផ្សារអឺរ៉ុប ខណៈប្រមាណ១៥% ផ្គត់ផ្គង់ការប្រើប្រាស់ក្នុងស្រុក។ តែយ៉ាងណានៅប៉ុន្មានឆ្នាំចុងក្រោយនេះ ចំនួនកសិករដាំដុះម្រេចកំពត មានការធ្លាក់ចុះគួរឱ្យកត់សម្គាល់ ដោយកាលពីឆ្នាំ២០១៩ សមាគមលើកកម្ពស់ម្រេចកំពត មានសមាជិកជិត៥០០គ្រួសារ ខណៈបច្ចុប្បន្នមានតែជាង៣៤០គ្រួសារប៉ុណ្ណោះ៕
