តំបន់សេដ្ឋកិច្ចពិសេសលាតសន្ធឹងលើផ្ទៃដីប្រមាណ១០០ហិចតា ទំនងជានឹងលេចរូបរាងឡើងនៅលើទឹកដីខេត្តតាកែវ

គម្រោងបង្កើតតំបន់សេដ្ឋកិច្ចពិសេសលើផ្ទៃដីប្រមាណ១០០ហិចតា ក្នុងស្រុកបាទី ខេត្តតាកែវ ដែលសមាគមពាណិជ្ជកម្មចិន ឆាវសាន បានស្នើសុំការគាំទ្រ និងជួយសម្របសម្រួលពីរដ្ឋបាលខេត្តតាកែវ ត្រូវបានឯកឧត្តម វ៉ី សំណាង អភិបាលខេត្តតាកែវ ប្រកាសគាំទ្រយ៉ាងពេញទំហឹង។ បើតាមថ្នាក់ដឹកនាំរូបនេះ តាមរយៈគម្រោងបង្កើតតំបន់សេដ្ឋកិច្ចពិសេសនេះ វានឹងអាចជួយបង្កើតការងារកាន់តែច្រើនដល់បងប្អូនប្រជាពលរដ្ឋនៅក្នុងតំបន់នោះ ជាពិសេសនឹងជួយលើកស្ទួយសេដ្ឋកិច្ចគ្រួសាររបស់ពួកគាត់ឱ្យកាន់តែល្អប្រសើរផងដែរ។

​បើតាមឯកឧត្តម វ៉ី សំណាង កត្តាដែលជំរុញឱ្យវិនិយោគិនសម្លឹងឃើញខេត្តតាកែវ ជាទីតាំងសម្រាប់បង្កើតតំបន់សេដ្ឋកិច្ចពិសេសនេះ ពីព្រោះពួកគេមើលឃើញពីការរក្សាបាននូវសុខសន្តិភាពនៅកម្ពុជា ពិសេសខេត្តតាកែវ ដែលមានទីតាំងសក្តានុពលខ្ពស់លើផ្នែកហេដ្ឋារចនាសម្ព័ន្ធ ដ្បិតថា ព្រលានយន្តហោះអន្តរជាតិ តេជោ និងព្រែកជីក ហ្វូណន តេជោ ជាដើម គឺសុទ្ធសឹងស្ថិតនៅក្នុងខេត្តតាកែវ។ ហើយតាមរយៈសមិទ្ធផលទាំងនេះ ឯកឧត្តម ជឿជាក់ថា តំបន់ទន្លេបាទី ខេត្តតាកែវ នឹងទទួលបានការវិនិយោគ​កាន់តែច្រើនបន្ថែមទៀត ដែលនឹងជំរុញឱ្យតំបន់នោះនឹងក្លាយជាមជ្ឈមណ្ឌលឧស្សាហកម្មមួយនៅថ្ងៃអនាគត។

​សូមជម្រាបថា នៅក្នុងឱកាសជំនួបជាមួយសមាគមពាណិជ្ជកម្មចិន ឆាវសាន ឯកឧត្តម វ៉ី សំណាង ក៏បានស្នើសុំឱ្យប្រធានសមាគមពាណិជ្ជកម្មនេះ បន្តជួយកៀរគរអ្នកវិនិយោគឱ្យចូលមកបណ្ដាក់ទុននៅលើទឹកដីខេត្តតាកែវ ឱ្យកាន់តែច្រើនបន្ថែមទៀត ហើយអាជ្ញាធខេត្តត្រៀមខ្លួនជានិច្ចក្នុងការជួយសម្របសម្រួល និងសហការជាមួយអ្នកវិនិយោគទាំងនោះ៕