ក្រុមហ៊ុនហាងលក់ទំនិញ FamilyMart របស់ជប៉ុន បានប្រកាសដកខ្លួនចេញពីទីផ្សារនៅថៃកាលពីថ្ងៃព្រហស្បតិ៍ ទី១០ ខែសីហា ហើយការដកខ្លួនរបស់ក្រុមហ៊ុននេះនឹងធ្វើឱ្យហាងរបស់ខ្លួនប្រហែល២០០សាខា នៅក្នុងប្រទេសថៃ នឹងត្រូវបំប្លែងខ្លួនទៅជាម៉ាកយីហោឈ្មោះ Tops Daily វិញ ដែលជាបណ្តាញផ្សារទំនើបខ្នាតតូច ដែលគ្រប់គ្រងដោយក្រុមហ៊ុនលក់រាយ Central Group។
ក្រុមហ៊ុន FamilyMart បានជាប់ចំណាត់ថ្នាក់ទី៤នៅក្នុងទីផ្សារហាងទំនិញប្រើប្រាស់របស់ប្រទេសថៃគិតត្រឹមខែកញ្ញា ឆ្នាំ២០២២។ នេះបើយោងតាមកម្មវិធីវាយតម្លៃតាមអ៊ីនធឺណិត Statista របស់អាល្លឺម៉ង់។ ចំណាត់ថ្នាក់ទីមួយបានទៅលើក្រុមហ៊ុន 7-Eleven ដែលមានទីតាំងជាង ១ម៉ឺន៣ពាន់កន្លែង ឬប្រហែល៨០%នៃទីផ្សារថៃដែលដំណើរការដោយក្រុមហ៊ុនធំរបស់ប្រទេសថៃ គឺក្រុមហ៊ុន ចារើនផូកហ្វេនគ្រុប (Charoen Pokphand Group) ក្រោមកិច្ចព្រមព្រៀងសិទ្ធិអាជីវកម្មបន្ដ ឬហៅថា Franchise។
អត្ថបទគួរអាន
ក្រុមហ៊ុន FamilyMart បានចាប់ផ្ដើមផែនការពង្រីកខ្លួននៅក្នុងប្រទេសថៃនៅឆ្នាំ១៩៩២តាមរយៈការបណ្តាក់ទុនរួមគ្នា ដោយបើកហាងជាលើកដំបូងរបស់ខ្លួននៅទីនោះនៅក្នុងឆ្នាំ១៩៩៣។ ទោះបីជាក្រុមហ៊ុននេះនឹងដកខ្លួនចេញពីប្រទេសថៃនៅពេលនេះក៏ដោយប៉ុន្តែក្រុមហ៊ុននេះមិនមានការផ្លាស់ប្តូរផែនការក្នុងការស្វែងរកការពង្រីកអាជីវកម្មនៅក្រៅប្រទេសរបស់ពួកគេឡើយ ហើយពួកគេនឹងបន្តពង្រីកបន្ថែមទៀត។
សូមបញ្ជាក់ថា បច្ចុប្បន្នហាង FamilyMart មានហាងសរុបជាង ២ម៉ឺនកន្លែងនៅទូទាំងពិភពលោក ខណៈដែល 7-Eleven វិញមានប្រមានជាង៧ម៉ឺនកន្លែង៕
អត្ថបទ៖ សុខ ជា
