![ទេសរដ្ឋមន្ត្រី រដ្ឋមន្ត្រីសាធារណការនិងដឹកជញ្ជូន ឯកឧត្ដម ស៊ុន ចាន់ថុល ក្នុងពេលចុះពិនិត្យការសាងសង់កំពង់ផែផ្លូវទឹក នៅឫស្សីកែវ តាមបណ្ដោយផ្លូវជាតិលេខ៥ នាថ្ងៃ១០ មីនា ២០១៨។ រូបភាព៖ ក្រសួងសាធារណការនិងដឹកជញ្ជូន](https://cdn.cambonomist.com/media/images/sun-chanthol-mar2018.2e16d0ba.fill-960x540.jpg)
នេះជាការបង្ហើបឲ្យដឹងពីសំណាក់ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន នៅពេលចុះពិនិត្យការសាងសង់កំពង់ផែដឹកជញ្ជូនអ្នកដំណើរតាមផ្លូវទឹក នៅចំណុចឃ្លាំងសាំង សូគីមិច ឫស្សីកែវ តាមបណ្ដោយផ្លូវជាតិលេខ៥ កាលពីថ្ងៃទី១០ មីនា កន្លងទៅ។
លោករដ្ឋមន្ត្រីដឹកជញ្ជូន មានប្រសាសន៍ថា ការដាក់ឲ្យដំណើរការសេវាដឹកអ្នកដំណើរតាមផ្លូវទឹក ព្រែកព្នៅ-ភ្នំពេញ-តាខ្មៅ នាពេលខាងមុខនេះ គឺជាការរួមចំណែកកាត់បន្ថយការកកស្ទះចរាចរណ៍តាមផ្លូវគោក និងបង្កើនសុវត្ថិភាពចរាចរណ៍ដល់អ្នកធ្វើដំណើរ ចូល-ចេញ និងឆ្លងកាត់រាជធានីភ្នំពេញ រៀងរាល់ថ្ងៃ។
បើតាមគម្រោងដែលបង្ហើបដោយលោករដ្ឋមន្ត្រី ស៊ុន ចាន់ថុល ជាជំហានដំបូង គេនឹងដាក់ឲ្យដំណើរការទូកដឹកអ្នកដំណើរចំនួន ៣គ្រឿង ដោយក្នុងនោះ ២គ្រឿងជាទូករបស់ក្រុមហ៊ុន Royal Express Boat អាចផ្ទុកមនុស្ស ៦០នាក់ក្នុងមួយគ្រឿង និង ១គ្រឿងទៀត ជាទូករបស់កំពង់ផែស្វយ័តភ្នំពេញ ដែលកំពុងសាងសង់ អាចផ្ទុកបាន ៥៤នាក់ បំពាក់ដោយម៉ាស៊ីនត្រជាក់ និងពោងសុវត្ថិភាព។
![រូបថតពីលើនៃកំពង់ផែទូកដឹកអ្នកដំណើរដែលកំពុងសាងសង់នៅឫស្សីកែវ តាមបណ្ដោយផ្លូវជាតិលេខ៥។ រូបភាព៖ ក្រសួងសាធារណការនិងដឹកជញ្ជូន](https://cdn.cambonomist.com/media/images/passenger-boat-dock.2e16d0ba.fill-960x540.jpg)
ជាមួយទូក ៣គ្រឿង នៅក្នុងជំហានដំបូងនេះ ការផ្តល់សេវាចេញដំណើរពីព្រែកព្នៅ ទៅកាន់ក្រុង តាខ្មៅ ចម្ងាយសរុបប្រមាណ ២៥គីឡូម៉ែត្រ ដោយចំណាយពេលវេលា ជាមធ្យម ៣៤នាទី មានចំណតផែចំនួន ៥ កន្លែង រួមមាន ចំណតផែព្រែកព្នៅ ទីលានប្រជាធិបតេយ្យថ្មី (ឃ្លាំងសាំងសូគីមិច ឫស្សីកែវ) ផ្សាររាត្រី កោះពេជ្រ និងក្រុងតាខ្មៅ។
ជាមួយនឹងកំណើនប្រជាជនឥតឈប់ឈរ រាជធានីភ្នំពេញកំពុងជួបបញ្ហាប្រឈមនៃការកកស្ទះចរាចរណ៍ ដូច្នេះ គេមើលឃើញថា សេវាដឹកជញ្ជូនអ្នកដំណើរតាមផ្លូវទឹកនេះនឹងបានចូលរួមចំណែកមួយផ្នែក ក្នុងដំណោះស្រាយការកកស្ទះនិងគ្រោះថ្នាក់ចរាចរណ៍ ព្រមទាំងធ្វើឲ្យចំណេញពេលវេលាធ្វើដំណើររបស់ប្រជាពលរដ្ឋ៕