ជាអ្នករកស៊ី អ្នកត្រូវដឹងពីអតិថិជនដែលពូកែរអ៊ូរទាំទាំង៥ប្រភេទ!

ការរអ៊ូរទាំ ត្អូញត្អែររបស់អតិថិជនគឺជាផ្នែកមួយនៃអាជីវកម្មរបស់យើង។ មានន័យថា នៅពេលដែលយើងសម្រេចចិត្តចូលប្រឡូកក្នុងវិស័យពាណិជ្ជកម្មហើយនោះ យើងចាំបាច់ត្រូវត្រៀមខ្លួន ចាំទទួលយកការរិះគន់ ការរអ៊ូរទាំពីសំណាក់អតិថិជន។ ការពិត នេះជាការងារដ៏សំខាន់មួយរបស់យើងប្រចាំថ្ងៃ ហើយចាំបាច់ណាស់ យើងត្រូវតែកែលំអ។

អ្នកជំនាញផ្នែកសហគ្រិនភាព និយាយថា អតិថិជនដែលពូកែរអ៊ូរទាំគឺមាន ៥ប្រភេទ។

នៅឯបរទេស មានក្រុមហ៊ុនខ្លះសុខចិត្តចំណាយប្រាក់រហូតដល់ ៧៥ដុល្លារក្នុងម្នាក់ដើម្បីឲ្យមនុស្សធ្វើការរិះគន់ផលិតផលរបស់គេ ឬក៏នៅពេលដែលមានអតិថិជនណារិះគន់ផ្ទាល់ ពួកគេទទួលបានសេវាកម្ម ឬទំនិញដោយឥតគិតថ្លៃក៏មាន។

បើតាមលោក Patrick Bet DAVID ដែលជាគ្រូបង្វឹកផ្នែកសហគ្រិនភាពនិងអភិវឌ្ឍន៍ខ្លួនដ៏ល្បីល្បាញ បានចែកអតិថិជនដែលពូកែរអ៊ូរទាំច្រើនជា ៥ប្រភេទ ដូចតទៅ៖

១. អ្នករិះគន់ដែលមានសុពលភាពនិងយកជាបានការ (the Valid Complainer)

គឺជាប្រភេទអតិថិជនដែលរិះគន់នៅពេលដែលទំនិញ ឬសេវាកម្មរបស់យើងមានបញ្ហា ឬធ្វើមិនបានល្អ ហើយពួកគេតែងតែផ្តល់មកយើងវិញនូវហេតុផលល្អដើម្បីយើង អាចកែលំអគុណភាពនិងសេវាកម្មរបស់យើង។

២. អ្នករិះគន់ដែលមានគំនិតទុទិដ្ឋិនិយម (the Pessimist Complainer)

អតិថិជនប្រភេទនេះគឺគាត់ចូលចិត្តរិះគន់រអ៊ូរទាំមិនថាយើងប្រឹងធ្វើឲ្យបានល្អ ឬកែលំអយ៉ាងណានោះទេ។ អតិថិជនបែបនេះ គ្មានអ្វីធ្វើឲ្យគាត់សប្បាយនិងពេញចិត្តនោះទេ។

៣. អ្នករិះគន់ដែលមានទស្សនៈខុសពីយើង (Different Philosophies Complainer)

គឺជាប្រភេទអតិថិជនដែលមានទស្សនៈ ឬជំនឿខុសពីយើងដែលជាម្ចាស់អាជីវកម្ម ប៉ុន្តែ ពួកគាត់ចូលចិត្តទំនិញ ឬសេវាកម្មរបស់យើង។ ពួកគេអាចមាននិន្នាការនយោបាយ ទស្សនៈ ជំនឿ ការយល់ឃើញអ្វីខុសប្លែកពីយើង តែនៅតែជាអតិថិជនរបស់យើង។

៤. អ្នករិះគន់ដែលជាគូប្រកួតប្រជែងរបស់យើង (An actual enemy or competitor complainer)

អ្នកដែលពូកែរិះគន់រអ៊ូរទាំប្រភេទទី៤នេះគឺជាសត្រូវ ឬគូប្រកួតប្រជែងដ៏ពិតប្រាកដរបស់យើង ហើយកំពុងតែមានវត្តមានកាន់តែច្រើនឡើងៗក្នុងវិស័យពាណិជ្ជកម្ម។ ពួកគេមិនសប្បាយចិត្តដោយសារតែយើងគឺជាគូប្រកួតប្រជែងរបស់ពួកគេ យើងបានដណ្តើមភាគរយនៃទីផ្សាររបស់ពួកគេ ហើយពួកគេចង់ឲ្យយើងបាត់មុខពីសង្វៀនឲ្យបានកាន់តែឆាប់។

៥. អ្នកពូកែត្រុល (Troll Complainer)

ត្រុលគឺជាពាក្យថ្មីមួយដែលមានវត្តមាននៅក្នុងបណ្តាញសង្គម។ យើងក៏អាចនិយាយបានថា អ្នកដែលពូកែត្រុលគឺជាអាជីវកម្មមួយរបស់ពួកគេ ហើយតែងតែរង់ចាំមើលបំណាំយើង នៅពេលដែលយើងភ្លាត់ភ្លាំង ពួកគេនឹងត្រុលយើង តែក៏មានពេលខ្លះត្រុលក៏មានប្រយោជន៍សម្រាប់យើងដែរ។

តើយើងត្រូវដោះស្រាយជាមួយអតិថិជនដែលរអ៊ូរទាំទាំងនេះដោយរបៀបណា?

ជាការពិតណាស់ គឺវាអាស្រ័យទៅតាមប្រភេទអាជីវកម្មរបស់យើងដែរ ប៉ុន្តែយើងអាចប្រើប្រាស់វិធីសាស្រ្តសាមញ្ញដូចខាងក្រោមនេះ៖

១. ពន្លឿនដំណោះស្រាយរបស់យើង

ការដោះស្រាយបញ្ហា ឬឆ្លើយតបជាមួយនឹងអតិថិជនដែលមិនសប្បាយចិត្តរអ៊ូរទាំច្រើន ចាំបាច់ត្រូវតែធ្វើឲ្យលឿនទាន់ចិត្ត។

២. មិនត្រូវព្យាយាមគេចវេះពីជម្លោះនោះទេ

ជាការពិតណាស់ នៅពេលដែលមានការរិះគន់រអ៊ូរទាំ យើងតែងចង់សម្របសម្រួលមិនចង់ឲ្យមានជម្លោះនោះទេ ប៉ុន្តែការធ្វើបែបនេះគឺនឹងនាំឲ្យមានរិះគន់កាន់តែច្រើនទៅវិញនោះទេ។ ក្នុងវិស័យពាណិជ្ជកម្ម គឺចៀសមិនផុតពីការរិះគន់ កាច់កុងគ្នា ដូច្នេះហើយ ត្រូវត្រៀមខ្លួនជានិច្ចនៅក្នុងជម្លោះនានា ប្រកបដោយហេតុផល និងតក្កវិជ្ជា។

៣. យើងមិនអាចឈ្នះគ្រប់រឿងនោះទេ

ត្រូវចាំថា មិនត្រូវចង់ឈ្នះជាមួយនឹងអ្នកពូកែរិះគន់នោះទេ ព្រោះថា មានពេលខ្លះនៅពេលដែលយើងចចេសចង់យកឈ្នះ គឺវាធ្វើឲ្យភ្លើងកំហឹងងាយឆាបឆេះឡើង ហើយយើងនឹងទទួលបាននូវពាក្យថាចាញ់ទៅវិញទេ។

៤. មានពេលខ្លះ ត្រូវដោះស្រាយដោយផ្ទាល់មុខ ឬតាមរយៈទូរស័ព្ទ

មិនថាក្នុងកាលៈទេសៈណាទេ យើងចាំបាច់ត្រូវតែសូមអភ័យទោសភ្ញៀវជាមុន ហើយមានភាពស្មោះត្រង់ជាមួយនឹងបញ្ហាដែលបានកើតឡើង។ ត្រូវរក្សាចិត្តឲ្យស្ងប់ និងត្រជាក់ក្នុងការតបត បើទោះជាមានជម្លោះក៏ដោយចុះ។ អ្វីជាចុងក្រោយនោះ គឺចាំបាច់ត្រូវមានការសន្យានិងកែលំអ ដោយភ្ជាប់ជាមួយនឹងដំណោះស្រាយទាន់ពេលវេលាផងដែរ៕

None