យោងតាមសេចក្ដីប្រកាសរបស់ ក្រុមហ៊ុន ស្មាត អាស្យាតា ខូ អិលធីឌី ដែលបានផ្សាយនៅថ្ងៃទី ២៣ ខែកក្កដា បានឲ្យដឹងថា ក្រុមហ៊ុនសូមធ្វើការអភ័យទោស ចំពោះបញ្ហាដែលបានកើតឡើង ហើយក្រុមហ៊ុនប្តេជ្ញាចិត្តក្នុងការផ្ដល់នូវដំណោះស្រាយ និងសំណងសមស្របមួយជូនដល់អតិថិជនដែលរងផលប៉ះពាល់នេះ។
បើតាមការបញ្ជាក់របស់ក្រុមហ៊ុន Smart បញ្ហានេះ បានកើនឡើងតាំងពីថ្ងៃទី ២៩ ឧសភា ឆ្នាំ២០២១ម្ល៉េះ ទាក់ទងនឹងការផ្ទេរកម្មសិទ្ធិលើកម្មសិទ្ធិលេខទូរស័ព្ទរបស់អតិថិជន Smart មួយរូប ទៅឲ្យអតិថិជនថ្មី ដោយគ្មានការយល់ព្រម ឬព្រមព្រៀងជាមុន។ ក្រុមហ៊ុន Smart ក៏បានបញ្ជាក់ថា ខ្លួនបានចាត់វិធានការចាំបាច់នានាភ្លាមៗ ដើម្បីកែតម្រូវចំពោះបញ្ហានេះដែរ ដោយនៅថ្ងៃទី៣០ ខែឧសភា ឆ្នាំ២០២១ ក្នុងរយៈពេល២៤ម៉ោង បន្ទាប់ពីទទួលបានពាក្យបណ្ដឹង លេខទូរស័ព្ទដែលជាកម្មវត្ថុនៃពាក្យបណ្ដឹងនោះ ត្រូវបានផ្អាកជាបណ្ដោះអាសន្ន នៅមុនពេលធ្វើការប្រគល់ជូនម្ចាស់កម្មសិទ្ធិស្របច្បាប់វិញ។
ក្រុមហ៊ុន Smart គូសបញ្ជាក់ទៀតថា ខាងក្រុមហ៊ុន ក៏បានទាក់ទងជាមួយអតិថិជនដែលរងការប៉ះពាល់ និងស្នើផ្ដល់ជាដំណោះស្រាយជូនគាត់ដែរ ប៉ុន្ដែសំណើនេះត្រូវបានបដិសេធ។ ទោះយ៉ាងណា ក្រុមហ៊ុនអះអាងថា នឹងបន្ដធ្វើការយ៉ាងជិតស្និទ្ធជាមួយស្ថាប័នពាក់ព័ន្ធ ដើម្បីស្វែងរកដំណោះស្រាយសមស្របមួយ។
តាមសេចក្ដីប្រកាសរបស់ក្រុមហ៊ុនSmart ដដែលនេះ ក្រោយពីការត្រួតពិនិត្យផ្ទៃក្នុងរបស់ក្រុមហ៊ុន ចំពោះករណីខាងលើបានរកឃើញកំហុសឆ្គងរបស់បុគ្គលិកមួយរូប ដែលរហូតមកដល់ពេលនេះ បុគ្គលិកនោះ ត្រូវបានក្រុមហ៊ុនព្យួរការងារ និងទទួលទណ្ឌកម្មវិន័យនានា យោងទៅតាមបទបញ្ជាផ្ធៃក្នុងរបស់ក្រុមហ៊ុន។
អត្ថបទគួរអាន
សូមបញ្ជាក់ថា កាលពីថ្ងៃទី ២២ ខែកក្កដា ឆ្នាំ២០២១ ក្រសួងប្រៃសណីយ៍ និងទូរគមនាគមន៍ បានចេញសេក្ដីប្រកាសព័ត៌មានមួយ ជុំវិញនឹងវិធានការរបស់ក្រសួងពាក់ព័ន្ធនឹងកំហុសឆ្គងរបស់ក្រុមហ៊ុន Smart ខាងលើនេះ។ វិធានការទាំងនោះរួមមាន៖
1, ក្រុមហ៊ុន ស្មាត អាស្យាតា ខូ អិលធីឌី ត្រូវធ្វើការសុំទោសជាសាធារណៈ ដោយយចុះក្នុងគេហទំព័រ ផ្លូវការរបស់ខ្លួន និងសន្យាថា មិនមានករណីខាងលើកើតឡើងម្ដងទៀតនោះឡើយ
2, ត្រូវផ្ដល់សំណងនៃការខូចខាតដល់ម្ចាស់ដើម ចំពោះប្រព្រឹត្តខុសករណីខាងលើនេះ
3, ម្ចាស់ដើមមានសិទ្ធិទទួលបានលេខទូរសព្ទនោះមកប្រើប្រាស់វិញ
4, រាល់បុគ្គលពាក់ព័ន្ធននឹងករណីខាងលើនេះ នឹងត្រូវទទួលខុសច្បាប់ជាធរមាន។
គួរបញ្ជាក់ថា ក្រសួងប្រៃសណីយ៍ ក៏បានធ្វើការរំឭកទៅដល់ប្រតិបត្តិការផ្ដល់សេវាទូរសព្ទចល័តទាំងអស់ត្រូវពង្រឹងការគ្រប់គ្រងនិងនីតិវិធីនៃការចែកចាយ និងលក់ទូរសព្ទចល័ត ឲ្យបានត្រឹមត្រូវជូនអតិថិជនរបស់ខ្លួន ជៀសវាងមានករណីបែបនេះកើតឡើងទៀត៕
អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
