លោកបណ្ឌិត ជ័យ តិច អ្នកសិក្សាស្រាវជ្រាវសេដ្ឋកិច្ចសង្គម បានផ្តល់ទស្សនៈវិភាគថា ប្រសិនបើកម្ពុជា ចូលរួមជាមួយក្រុមប្រឹក្សាសន្តិភាពរបស់លោក ត្រាំ នោះនឹងធ្វើឱ្យកម្ពុជា មានទំនាក់ទំនងល្អជាមួយសហរដ្ឋអាម៉េរិក និងអាចទទួលបានផលប្រយោជន៍រយៈពេលវែងនាពេលខាងមុខ។ លោកបានសង្កត់ធ្ងន់ថា ក្នុងស្ថានភាពភូមិសាស្ត្រនយោបាយបច្ចុប្បន្នកម្ពុជា ត្រូវការខ្នងបង្អែកដ៏រឹងមាំ ដើម្បីការពារបូរណភាពទឹកដី និងផលប្រយោជន៍សេដ្ឋកិច្ច។ ការចូលរួមនេះ មិនមែនមានន័យថា ជាការងាករេចោលមិត្តចាស់ ឬផ្អៀងទៅរកអាម៉េរិកទាំងស្រុងនោះទេ ប៉ុន្តែវាគឺជាការដើរឱ្យទាន់សភាពការណ៍អន្តរជាតិ ដែលសូម្បីតែប្រទេសធ្លាប់មាននិន្នាការប្រឆាំងអាម៉េរិក ក៏បានសម្រេចចិត្តចូលរួមដែរ។ ប៉ុន្តែប្រសិនបើមិនចូលរួមជាមួយក្រុមប្រឹក្សាសន្តិភាពទេ នោះនឹងធ្វើឱ្យបាត់បង់នូវការកសាងទំនាក់ទំនងជាមួយសហរដ្ឋអាម៉េរិក និងពិបាកក្នុងការការពារបូរណភាពទឹកដីពីការឈ្លានពានពីប្រទេសជិតខាង ព្រមទាំងការខាតបង់ផ្នែកសេដ្ឋកិច្ចជាដើម។
ដោយឡែកលោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ យល់ឃើញថា កម្ពុជា គួរមានការពិចារណាឱ្យបានច្បាស់លាស់ក្នុងការចូលរួម ឬមិនចូលរួមជាមួយក្រុមប្រឹក្សាសន្តិភាព ខណៈមកដល់ពេលនេះគេពុំទាន់ដឹងច្បាស់អំពីលក្ខខណ្ឌរបស់ក្រុមប្រឹក្សាសន្តិភាព ដែលបង្កើតឡើងដោយលោក ដូណាល់ ត្រាំ នៅឡើយទេ។ សម្រាប់អ្នកជំនាញរូបនេះ វានឹងក្លាយជាបន្ទុកដ៏ធ្ងន់ធ្ងរសម្រាប់កម្ពុជា ប្រសិនបើត្រូវចំណាយ១ពាន់លានដុល្លារក្នុងការចូលជាសមាជិកនៃក្រុមប្រឹក្សាសន្តិភាព។ អ្នកជំនាញរូបនេះបានផ្តល់ជាយោបល់ថា កម្ពុជា គួររង់ចាំពិនិត្យមើលគុណសម្បត្តិ និងគុណវិបត្តិរបស់ស្ថាប័នថ្មីនេះឱ្យបានហ្មត់ចត់ជាមុនសិន ដើម្បីចៀសវាងផលប៉ះពាល់ដល់ស្ថិរភាពហិរញ្ញវត្ថុជាតិ។
គួររំលឹកថា សហរដ្ឋអាម៉េរិក ក្រោមរដ្ឋបាលលោក ដូណាល់ ត្រាំ បានផ្ញើលិខិតផ្លូវការអញ្ជើញកម្ពុជា ឱ្យចូលរួមក្នុងក្រុមប្រឹក្សាសន្តិភាព ដែលជាយន្តការអន្តរជាតិថ្មី ដើម្បីដោះស្រាយបញ្ហាជម្លោះនៅតំបន់ហ្គាហ្សា និងបញ្ហាជម្លោះផ្សេងៗនៅទូទាំងពិភពលោក។ ទោះជាយ៉ាងណា ជំហររបស់កម្ពុជា នៅតែស្ថិតក្នុងភាពស្ងប់ស្ងាត់នៅឡើយ ស្របពេលដែលការបែងចែករវាង សមាជិកធម្មតាដែលគ្មានតម្លៃសេវា និងសមាជិកអចិន្ត្រៃយ៍ ដែលតម្រូវឱ្យវិភាគទានខ្ពស់ កំពុងក្លាយជាប្រធានបទដ៏ក្តៅគគុកសម្រាប់ការជជែកដេញដោលក្នុងមជ្ឈដ្ឋានអ្នកវិភាគនយោបាយនៅក្នុងប្រទេស និងក្រៅប្រទេស៕
អត្ថបទ៖ បូ ដូឡា
