ជាមួយគ្នានេះ អ្នកជំនាញនៅក្នុងវិស័យធានារ៉ាប់រងនៅកម្ពុជារូបនេះ បានអះអាងទៀតថា នៅក្នុងអំឡុងពេលនៃវិបត្តិកូវីដ-១៩ មានការរាតត្បាតខ្លាំងនេះ ទីផ្សារធានារ៉ាប់រងនៅតែរក្សាបានកំណើនល្អ ពិសេសសេវាធានារ៉ាប់រងអាយុជីវិតតែម្ដង។
លោក យក់ ចំរើនឫទ្ធិ ប្រធានអគ្គនាយកនៃក្រុមហ៊ុនសម្ព័ន្ធធានារ៉ាប់រង Forte បានលើកឡើងថា ក្រោយពីក្រុមហ៊ុនបានបើកឲ្យមានសេវាធានារ៉ាប់រងកូវីដ-១៩ សម្រាប់អ្នកដំណើរបរទេសចូលមកកម្ពុជារួចមក ឃើញថា បុព្វលាភធានារ៉ាប់រងដែលទទួលបានពីកញ្ចប់សេវាកម្មនេះមានប្រមាណ ៦ លានដុល្លារ។ សេវាធានារ៉ាប់រងកូវីដ-១៩សម្រាប់អ្នកដំណើរបរទេសចូលមកកម្ពុជានេះ មានតម្លៃកញ្ចប់៥ម៉ឺនដុល្លារ ដែលជួយលើការចេញថ្លៃព្យាបាលនៅមន្ទីរពេទ្យសម្រាប់ជនបរទេសណាដែលមានឆ្លងកូវីដ-១៩នៅកម្ពុជា។
ក្រៅតែពីមានសេវាធានារ៉ាប់រងកូវីដ-១៩សម្រាប់អ្នកដំណើរបរទេសចូលកម្ពុជាហើយនោះ ក្រុមហ៊ុន Forte ក៏កំពុងត្រៀមដាក់ចេញលក់នូវកញ្ចប់សេវាធានារ៉ាប់រងកូវីដ-១៩សម្រាប់ជនជាតិខ្មែរផងដែរ ដោយរពឹងថានឹងអាចដាក់លក់នៅពេលឆាប់ៗខាងមុខនេះ។
អត្ថបទគួរអាន
បើតាមលោក យក់ ចំរើនឫទ្ធិ បើទោះបីជា កញ្ចប់សេវាធានារ៉ាប់រងថ្មីនេះ មិនទាន់បានដាក់ឲ្យប្រើប្រាស់ក៏ដោយចុះ ប៉ុន្ដែ កន្លងមក អតិថិជនដែលមានទិញកញ្ចប់ធានារ៉ាប់រងអាយុជីវិតខ្នាតតូច ក៏ទទួលបានការសងសំណងផងដែរ ប្រសិនបើពួកគេមានឆ្លងកូវីដ-១៩ និងត្រូវសម្រាកព្យាបាលសុខភាពនៅមន្ទីរពេទ្យ។
ប្រធានអគ្គនាយកក្រុមហ៊ុនសម្ព័ន្ធ Forte បានគូសបញ្ជាក់ថា គិតត្រឹមខែកក្កដា ឆ្នាំ ២០២១ នេះ ចំនួនអ្នកទិញកញ្ចប់ធានារ៉ាប់រងអាយុជីវិតខ្នាតតូច ប្រមាណ ១០០ នាក់ បានទទួលសំណងនៅពេលសម្រាកព្យាបាលជំងឺកូវីដ-១៩នៅតាមមន្ទីរពេទ្យ ហើយក្នុងចំណោម អ្នកទទួលបានសំណងទាំងនោះ មិនមាននរណាម្នាក់ស្លាប់បាត់បង់ជីវិតដោយសារកូវីដ-១៩នោះឡើយ។
របាយការណ៍ពីសមាគមធានារ៉ាប់រងកម្ពុជា បានឲ្យដឹងថា វិស័យធានារ៉ាប់រងនៅកម្ពុជាតែបន្ដជំនះឈ្មុសឈ្មុលបានលទ្ធផលទីផ្សារល្អក្នុងអំឡុងពេលនៃវិបត្តិកូវីដ-១៩ ដោយនៅត្រីមាសទី១នៅឆ្នាំ២០២១នេះ ទីផ្សារធានារ៉ាប់រងនៅកម្ពុជាសម្រេចបានកំណើនដាល់ទៅ ជាង២០% ធៀបនឹងត្រីមាសទី១ឆ្នាំ២០២១ ។ កំណើននេះ ត្រូវបានរុញច្រានពីក្រោយជាចម្បង ដោយកំណើននៅក្នុងវិស័យទីផ្សារធានារ៉ាប់រងទូទៅ និងទីផ្សារធានារ៉ាប់រងអាយុជីវិត បើទោះបីជា ទីផ្សារធានារ៉ាប់រងខ្នាតតូច មានការថមថយចុះខ្លាំងក៏ដោយ។ នេះបើតាមរបាយការណ៍ពីសមាគមធានារ៉ាប់រងកម្ពុជា៕
អត្ថបទ៖ សុខ សិទ្ធិការ្យ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
