នៅពេលពិភពលោកបោះជំហានឈានចូលដល់ឆ្នាំ២០២៤ ភ្លាម ប្រទេសបារាំង ដែលជាមហាអំណាចសេដ្ឋកិច្ចធំបំផុតទី២ នៅទ្វីបអឺរ៉ុប ទំនងជាត្រូវជួបបញ្ហាសេដ្ឋកិច្ចធ្ងន់ធ្ងរដោយសារតែបញ្ហាធំៗចំនួន៤។ តើបញ្ហាប្រឈមធំៗទាំង៤នេះមានអ្វីខ្លះ? ហើយថា តើបញ្ហាទាំងនេះគំរាមកំហែងដល់ស្ថិរភាពនៃជីវភាពរស់នៅរបស់ពលរដ្ឋបារាំងយ៉ាងណា?
បើតាមការចុះផ្សាយរបស់សារព័ត៌មានធំៗនៅបស្ចិមប្រទេស បញ្ហាអន្តរជាតិ និងពិភពលោកបានបន្តលងបន្លាចជាសកល ដោយសារបញ្ហាបម្រែបម្រួលអាកាសធាតុ ស្ថានភាពមិនប្រាកដប្រជានៃភូមិសាស្ត្រនយោបាយ ដែលកំពុងបន្តនាពេលបច្ចុប្បន្ន បញ្ហាអតិផរណា និងសង្គ្រាមនៅតំបន់ហ្គាហ្សា និងប្រទេសអ៊ុយក្រែន សុទ្ធតែជាបញ្ហាប្រឈមដែលអាចគំរាមកំហែងដោយផ្ទាល់ដល់សុខភាពហិរញ្ញវត្ថុរបស់ពលរដ្ឋ និងអ្នកប្រើប្រាស់នៅបារាំង។
ក្រៅពីបញ្ហាប្រឈមខាងលើ បញ្ហាដែលបារាំង ប្រឈមខ្លាំងទាំង៤ គឺរួមមានបញ្ហាកង្វះកម្លាំងពលកម្ម និងអន្តោប្រវេសន៍, ការកើនឡើងប្រជាប្រិយភាពរបស់ក្រុមអ្នកនយោបាយស្តាំនិយម, ការធ្លាក់ចុះផលិតកម្មក្នុងស្រុក និងបញ្ហាថវិកាសោធននិវត្តន៍។
អត្ថបទគួរអាន
កង្វះកម្លាំងពលកម្ម គឺជាបញ្ហាប្រឈមធំបំផុត ដែលកំពុងជះផលប៉ះពាល់ដល់វិស័យសេដ្ឋកិច្ចនៅប្រទេសបារាំង។ ដើម្បីជំរុញសេដ្ឋកិច្ចរបស់ខ្លួន បារាំងត្រូវការពលករទាំងមានជំនាញខ្ពស់ និងទាំងមានជំនាញទាប ដើម្បីជំនួសកម្មករ ដែលចូលនិវត្តន៍ ខណៈដែលពេលនេះបារាំង កំពុងតែពឹងផ្អែកលើកម្លាំងពលកម្មចំណាកស្រុក ប៉ុន្តែក្រុមប្រឆាំងបានជំទាស់។ ស្ថិតបានបង្ហាញថា ក្នុងស្ថានភាពនេះ បារាំង ក៏កំពុងតែប្រឈមមុខនឹងបញ្ហាធ្លាក់ចុះផលិតកម្មផងដែរ ដែលបង្កឡើងដោយសម្ពាធនៃបញ្ហាប្រទាក់ក្រឡាគ្នា។
លោក ប្រុយណូ ឡឺម៊ែរ (Bruno Le Maire) រដ្ឋមន្ត្រីក្រសួងហិរញ្ញវត្ថុបារាំង បានប្រកាសថា ប្រទេសនេះនឹងប្រឈមបញ្ហាថវិកាដ៏តានតឹងនៅឆ្នាំ២០២៤។ លោកបានបង្ហើបថា ក្រៅពីបារាំង ត្រូវចំណាយច្រើនលើសោធននិវត្តន៍ហើយនោះ បារាំង ក៏នឹងត្រូវប្រឈមស្វែងរកដំណោះស្រាយ ដើម្បីទូទាត់ការលុបចោលការដំឡើងពន្ធសម្រាប់គ្រួសារពលរដ្ឋ ដែលមានទំហំថវិកាប្រមាណជាង១៧ពាន់លានដុល្លារ ដែលរដ្ឋាភិបាលបានអនុម័ត ដើម្បីជួយកាត់បន្ថយឱនភាពសេដ្ឋកិច្ចនៅឆ្នាំនេះ ប្រហែលជា៤,៤%ថែមទៀត។ លើសពីនេះ បារាំង ក៏ត្រូវការរិះគិតដល់ប្រភពថវិកាក្នុងទំហំជិត៧ពាន់លានដុល្លារ ដែលខ្លួនដាក់ចេញទាក់ទងនឹងការកាត់បន្ថយការបំភាយឧស្ម័នកាបូនិច និងការរៀបចំខ្លួនឆ្ពោះទៅរកសេដ្ឋកិច្ចបៃតងផងដែរ។
កំណើននៃការគាំទ្រសម្រាប់ក្រុមអ្នកនយោបាយស្តាំនិយម ក៏ជាបញ្ហាប្រឈមសំខាន់មួយដែរ ខណៈដែលគេដឹងថា បារាំងជាប្រជាជាតិមួយនៅអឺរ៉ុប ដែលឧស្សាហ៍រងគ្រោះដោយសារបាតុកម្ម និងកូដកម្មច្រើន ដែលសុទ្ធសឹងតែជាបញ្ហាប្រឈមជះឥទ្ធិពលដល់ការពង្រឹងសក្តានុពលនៃសេដ្ឋកិច្ចរបស់ខ្លួន៕
ដោយៈ ស សុជាតិ
None
