ខណៈដែលចំនួនអ្នកស្លាប់ដោយសារកូវីដ-១៩ នៅក្នុងប្រទេសបារាំង កំពុងកើនឡើងជិត១០ម៉ឺននាក់ និងក្រុមគ្រូពេទ្យកំពុងមមាញឹកខ្លាំងក្នុងការជួយសង្គ្រោះអ្នកឆ្លងកូវីដ-១៩ គួបផ្សំនឹងភាពយឺតយ៉ាវនៃផែនការចាក់វ៉ាក់សាំងផងនោះ បានបង្ខំឲ្យលោក Macron ត្រូវបោះបង់ចោលនូវគោលដៅបើកចំហប្រទេសដើម្បីការពារផលប្រយោជន៍សេដ្ឋកិច្ច តែត្រូវមកបិទទ្វារប្រទេសដើម្បីការពារអាយុជីវិតប្រជាជនវិញម្ដង។
លោក Macron បាននិយាយនៅក្នុងទូរទស្សន៍បារាំងថា «យើងនឹងបាត់បង់ការគ្រប់គ្រង ប្រសិនបើយើងមិនមានការផ្លាស់ប្ដូរទេនោះ!»។
បើតាមការប្រកាសរបស់លោក Macron ការរឹតត្បិតសកម្មភាពនានា នៅក្នុងទីក្រុងបារីស តំបន់ភាគខាងជើង និងខាងត្បូងរយៈពេលជាងមួយសប្ដាហ៍នឹងនៅតែបន្ដ ហើយនឹងអនុវត្តបិទប្រទេសទាំងស្រុងតែម្ដងដែលយ៉ាងហោចណាស់សម្រាប់រយៈពេល១ខែ ចាប់ពីថ្ងៃ ទី០៣ ខែមេសាតទៅ។
អត្ថបទគួរអាន
ប្រធានាធិបតីបារាំងវ័យ៤៣ឆ្នាំរូបនេះ បានព្យាយាមបញ្ជៀសការបិទប្រទេសទ្រង់ទ្រាយធំតាំងពីដើមឆ្នាំមកម្ល៉េះ ដើម្បីធ្វើយ៉ាងណាទ្រទ្រង់ដល់ចរន្ដសេដ្ឋកិច្ចកុំឲ្យធ្លាក់ចុះខ្លាំង និងខិតខំស្វែងរកឱកាសដើម្បីជំរុញសេដ្ឋកិច្ចឲ្យងើបឡើងវិញ ប៉ុន្ដែគោលដៅនេះត្រូវបានយាយីជាថ្មី ពីការរាតត្បាតកូវីដ-១៩ ជាលើកទី៣ ដែលតម្រូវឲ្យបារាំងត្រូវតែបិទប្រទេសជាលើកទី៣។
ករណីឆ្លងកូវីដ-១៩ ប្រចាំថ្ងៃនៅបារាំងបានបន្ដកើនឡើងជាបន្ដបន្ទាប់ តាំងពីខែកុម្ភៈមកម្ល៉េះ ដោយជាមធ្យមមានអ្នកឆ្លង៤ម៉ឺននាក់ ដែលចំនួននេះ កំពុងធ្វើឲ្យមន្ទីរពេទ្យនៅបារាំងប្រឈមនឹងការខ្វះកន្លែងសម្រាប់ព្យាបាលអ្នកជំងឺ ហើយលោក Macron បាននិយាយថា គ្រែមន្ទីរពេទ្យអាចនឹងត្រូវបង្កើន ១ម៉ឺនគ្រែទៀតសម្រាប់ទុកព្យាបាលអ្នកជំងឺកូវីដ-១៩។
ការចាក់សោរបិទប្រទេសជាថ្មីរបស់បារាំង នឹងក្លាយជាហានិភ័យសម្រាប់ការងើបឡើងវិញនៃសេដ្ឋកិច្ចរបស់ប្រទេសនេះ ពីការធ្លាក់ចុះខ្លាំងកាលពីឆ្នាំមុន។ ការបិទប្រទេសជាថ្មីនេះ ក៏នឹងត្រូវបិទបណ្ដោះអាសន្ននូវអាជីវកម្មប្រមាណ១៥ម៉ឺនអាជីវកម្ម ដែលនឹងធ្វើឲ្យខាតបង់ប្រហែលជិត១៣ពាន់លានដុល្លារអាមេរិកក្នុងមួយខែផងដែឬ។ នេះបើតាមការះអាងរបស់រដ្ឋមន្ត្រីហិរញ្ញវត្ថុបារាំង៕
None
