បើទោះបីវិបត្តិកូវីដ-១៩ បានក្លាយជាបញ្ហាប្រឈម ក្នុងវិស័យកសិកម្ម ធ្វើឱ្យតម្លៃផលិតផលមួយចំនួនធ្លាក់ចុះ តែវិបត្តិនេះ មិនបានបន្ទុចបង្អាក់នៃដំណើរការផលិតកម្ម ក្នុងវិស័យកសិកម្មឡើយ។ តួយ៉ាង សព្វថ្ងៃ កសិករនៅតាមបណ្ដាខេត្តជាច្រើន កំពុងតែមមាញឹក ដាំដុះដំណាំស្លឹកគ្រៃប្រភេទភ្លុកដំរី ព្រោះស្លឹកគ្រៃប្រភេទនេះ កំពុងមានតម្រូវការខ្ពស់លើទីផ្សារ ទាំងទីផ្សារក្នុងស្រុក និងទីផ្សារនាំចេញទៅកាន់ប្រទេសថៃ។ សម្រាប់ទីផ្សារប្រទេសថៃ ឯណោះវិញ កំពុងមានតម្រូវការស្លឹកគ្រៃក្រៀមខ្ពស់ រហូត ១០០តោន ក្នុងមួយសប្ដាហ៍។
លោក នាក់ ភា ប្រធានសហគមន៍ កសិកម្មមានជ័យ ស្នូលទ្រត បានប្រាប់សារព័ត៌មានខេមបូណូមីសថា ក្រោយសហគមន៍ទទួលបានវិញ្ញាប័នបត្របញ្ជាក់ពីលក្ខខណ្ឌភូតគាមអនាម័យ ពីក្រសួងកសិកម្ម រុក្ខាប្រមាញ់ និងនេសាទ ពេលនេះសហគមន៍បាននាំចេញស្លឹកគ្រៃក្រៀម បណ្ដើរៗហើយ ទៅទីផ្សារប្រទេសថៃ។ បើតាមលោក នាក់ ភា ស្លឹកគ្រៃស្ងួត ដែលសហគមន៍ទិញពីកសិករ មានតម្លៃ ១ ៤០០រៀល ក្នុងមួយគីឡូក្រាម។ ចំណែក ស្លឹកគ្រៃសើម មានតម្លៃ ២៥០រៀល ក្នុងមួយគីឡូក្រាម។
ប្រធានសហគមន៍រូបនេះ បានបញ្ជាក់ថា បច្ចុប្បន្ន មានកសិករសរុបប្រមាណ ១០០គ្រួលារ កំពុងដាំដុះស្លឹកគ្រៃពូជភ្លុកដំរី លើផ្ទៃដីសរុប ប្រមាណ ២០០ហិកតា សម្រាប់ផលិតស្លឹកគ្រៃក្រៀម។ បើតាមលោក នាក់ ភា ប្រទេសថៃ ជាទីផ្សារធំសម្រាប់នាំចេញស្លឹកគ្រៃក្រៀមពូជភ្លុកដំរី ហើយមួយផ្នែកទៀត ក៏បានផ្គត់ផ្គង់សម្រាប់ទីផ្សារ ក្នុងស្រុកដែរ។ យ៉ាងណាក៏ដោយ លោក នាក់ ភា បានបញ្ជាក់ទៀតថា បច្ចុប្បន្ន សហគមន៍ មិនទាន់អាចផ្គត់ផ្គង់ស្លឹកគ្រៃក្រៀម តាមតម្រូវការទីផ្សារនៅឡើយទេ ព្រោះទីផ្សារកំពុងមានតម្រូវការលើសលប់ពីប្រទេសថៃ ខណៈទីផ្សារប្រទេសថៃត្រូវការស្លឹកគ្រៃក្រៀម ប្រមាណ១០០តោន ឯណោះ ក្នុងមួយសប្ដាហ៍ តែសហគមន៍ទើបអាចផ្គត់ផ្គង់ស្លឹកគ្រៃក្រៀម ប្រមាណ ៥តោន ក្នុងមួយសប្ដាហ៍។
អត្ថបទទាក់ទង
ស្របនឹងទីផ្សារដែលកំពុងមានតម្រូវការស្លឹកគ្រៃភ្លុកដំរីខ្ពស់ ប្រធានសហគមន៍ កសិកម្មមានជ័យ ស្នូលទ្រត ក៏បានអំពាវនាវឱ្យកសិករ ចូលរួមដាំស្លឹកគ្រៃភ្លុកដំរី បន្ថែម ដើម្បីផ្គត់ផ្គង់ទីផ្សារ នាពេលបច្ចុប្បន្ន។ តែយ៉ាងណា លោក នាក់ ភា បានសង្កត់ធ្ងន់ថា សហគមន៍ទទួលទិញស្លឹកគ្រៃ តែពូជភ្លុកដំរីសរីរាង្គ ស្របតាមគោលការណ៍របស់សហគមន៍សម្រាប់នាំចេញ ពិសេសកសិករ ជាសមាជិករបស់សហគមន៍ផ្ទាល់។
ជុំវិញសន្ទុះទីផ្សារស្លឹកគ្រៃភ្លុកដំរី ដែលកំពុងមានតម្រូវការខ្ពស់នេះដែរ ត្រូវបានលោក ញ៉ សុភាព ប្រធានក្រុមកសិករដាំស្លឹកគ្រៃភ្លុកដំរី ក្នុងខេត្តសៀមរាប បានបង្ហាញពីអារម្មណ៍សប្បាយរីករាយ ដំណាំស្លឹកគ្រៃភ្លុកដំរី ទទួលបានការចាប់អារម្មណ៍ខ្លាំង ពីទីផ្សារប្រទេសថៃ រួមទាំងទីផ្សារក្នុងស្រុកផង។ លោក ញ៉ សុភាព បានរៀបរាប់ទាំងអារម្មណ៍សប្បាយរីករាយ ថា ទោះបីស្ថិតក្នុងវិបត្តិកូវីដ-១៩ កសិផលមួយចំនួនពិបាករកទីផ្សារ តែស្លឹកគ្រៃភ្លុកដំរី បែរជាមានទីផ្សារទូលាយទៅវិញ។
ជាអ្នកដាំស្លឹកគ្រៃភ្លុកដំរី និងជាតំណងក្រុមកសិករ ក្នុងខេត្តសៀមរាប លោក សុភាព បានឱ្យដឹងថា ស្លឹកគ្រៃភ្លុកដំរី មានរសជាតិឆ្ងាញ់ ក្លិនឆ្ងុយ ប្លែកពីរសជាតិស្លឹកគ្រៃធម្មតា ដែលពលរដ្ឋខ្មែរនិយមដាំនៅតាមផ្ទះកន្លងមក ហើយវាសាកសមសម្រាប់ការច្នៃធ្វើជា តែស្លឹកគ្រៃ ឱសថ ទើបវាមានតម្រូវការខ្ពស់។ តំណាងកសិកររូបនេះ បញ្ជាក់បន្ថែមថា ស្លឹកគ្រៃភ្លុកដំរី ងាយស្រួលដាំ ហើយក៏មិនពិបាកថែទាំដែរ ម្យ៉ាងវិញទៀត ស្លឹកគ្រៃជាតម្រូវចម្បងសម្រាប់ទីផ្សារ ដូច្នេះ កសិករអាចរក្សាទុកគល់របស់វា ឱ្យលូតលាស់បន្ត ដើម្បីប្រមូលផលនៅពេលក្រោយៗទៀត។
ស្លឹកគ្រៃក្រៀមភ្លុកដំរី គេអាចយកច្នៃជា តែស្លឹកគ្រៃ ឱសថ និងគ្រឿងសម្អាងផ្សេងៗ។ បច្ចុប្បន្ន ស្លឹកគ្រៃប្រទេសនេះ កំពុងមានការពេញនិយមដាំដុះ នៅតាមបណ្ដាខេត្តមួយចំនួន ដូចជា បាត់ដំបង សៀមរាប បន្ទាយមានជ័យ ប៉ៃលិន ក្រចេះ ជាដើម។ កសិករដែលមានបំណងដាំដុះស្លឹកគ្រៃភ្លុកដំរី ត្រូវស្នើសុំទៅសហគមន៍ជាមុន ដើម្បីទទួលបានពូជ សម្រាប់ដាំដុះ និងត្រូវដាំឱ្យ ស្របតាមគោលការណ៍ណែនាំរបស់សហគមន៍ ដែលជាប្រភេទស្លឹកគ្រៃសរីរាង្គ ត្រូវមានវិធីសាស្ត្រប្រមូលផលល្អ និងមានការសម្ងួតស្លឹកគ្រៃ ឱ្យបានត្រឹមត្រូវតាមស្ដង់ដារ៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
