ក្នុងចំនួនកញ្ចប់ហិរញ្ញប្បទាន ជាង ៥៤ លានដុល្លារអាមេរិក ដែលអាល្លឺម៉ង់នឹងផ្ដល់ជូនកម្ពុជានោះ មាន ប្រមាណ ជាង៣៣លានដុល្លារអាមេរិក ជាឥណទានម្បទាន សម្រាប់អភិវឌ្ឍហេដ្ឋារចនាសម្ព័ន្ធផ្លូវជនបទ និងហិរញ្ញប្បទានឥតសំណងមានប្រមាណ ២២លានដុល្លារអាមេរិក។ ការផ្ដល់ឥណទានសម្បទានជាលើកដំបូង ទន្ទឹមនឹងការកាត់បន្ថយទំហំហិរញ្ញប្បទានឥតសំណងរបស់អាល្លឺម៉ង់នេះ មានលក្ខណៈស្របទៅនឹងនិន្នាការទូទៅនៃប្រទេសដែលសម្រេចបានឋានៈប្រទេសមានចំណូលមធ្យម។ នេះបើតាមការបញ្ជាក់នៅក្នុងសេចក្ដីប្រកាសព័ត៌មាន របស់ ក្រុមប្រឹក្សាអភិវឌ្ឍន៍កម្ពុជា។
អត្ថបទទាក់ទង!
បើតាមការគូសបញ្ជាក់របស់ក្រុមប្រឹក្សាអភិវឌ្ឍន៍កម្ពុជា គិតមកទល់នឹងឆ្នាំ២០១៩នេះ សាធារណរដ្ឋសហព័ន្ធអាល្លឺម៉ង់ បានផ្ដល់ហិរញ្ញប្បទានឥតសំណងមកដល់កម្ពុជាប្រមាណ ៦៤០ លានដុល្លារអាមេរិក ស្មើនឹងប្រមាណ ៣% នៃទំហំហិរញ្ញប្បទានទាំងអស់។ ទំហំហិរញ្ញប្បទាននេះ មិនរាប់បញ្ជូលទាំងហិរញ្ញប្បទាន ដែលភាគីអាល្លឺម៉ង់ បានផ្ដល់ឲ្យកម្ពុជា តាមរយៈគម្រោងថ្នាក់តំបន់ និងសកល ឬតាមរយៈស្ថាប័នហិរញ្ញវត្ថុអន្តរជាតិ បណ្ដាញអង្គការសហប្រជាជាតិ និងសហគមន៍អឺរ៉ុបនោះឡើយ។ ដោយឡែក បើគិតពីហិរញ្ញប្បទានឥតសំណងទ្វេភាគីរបស់អាល្លឺម៉ង់ ដែលបានផ្ដល់ឲ្យកម្ពុជា នៅឆ្នាំ២០១៨-២០១៩ វិញ មានប្រមាណ៣០លានដុល្លារអាមេរិក ក្នុងមួយឆ្នាំ។
គួរបញ្ជាក់ដែរថា ក្នុងរយៈពេល២ទសវត្សរ៍ចុងក្រោយនេះ រាជរដ្ឋាភិបាលកម្ពុជាបានបន្តរក្សាបាននូវស្ថិរភាពម៉ាក្រូសេដ្ឋកិច្ចល្អប្រសើរ ជាមួយនឹងកំណើនជាមធ្យមជាង៧% ក្នុងមួយឆ្នាំ។ ក្នុងនោះដែរ នៅឆ្នាំ២០១៨ កន្លងទៅ កំណើនសេដ្ឋកិច្ចកម្ពុជា ត្រូវបានស្ថាប័នអន្តរជាតិធំៗជាច្រើនបានប៉ាន់ប្រមាណថា សម្រេចបានក្នុងអត្រាកំណើនខ្ពស់បំផុតក្នុងរយពេល១០ឆ្នាំចុងក្រោយនេះ ដែលមានរហូតដល់ ៧,៥%។ ជាមួយគ្នានេះ ប្រាក់ចំណូលប្រជាជនម្នាក់របស់កម្ពុជា បានកើនឡើងដល់១.៥៦៨ ដុល្លារអាមេរិក ក្នុងឆ្នាំ២០១៨ និងបន្តកើនឡើងដល់ប្រមាណ ១.៦៧៩ ដុល្លារក្នុងឆ្នាំ២០១៩នេះ។ ជាមួយគ្នានេះដែរ អត្រាភាពក្រីក្រ ត្រូវបានកាត់បន្ថយមកនៅត្រឹមក្រោម១០% និងគម្លាតនៃចំណូលក្នុងចំណោមប្រជាជន ស្ថិតក្នុងកម្រិតទាប តាមរយៈការបែងចែកផ្លែផ្កានៃកំណើនដល់ប្រជាជនគ្រប់ស្រទាប់។
None
