ទីផ្សារទំនិញកំពុងត្រូវបានរងគំនាបពីកត្តាសំខាន់ចំនួន ២ គឺកត្តាតម្រូវការកំពុងកើនឡើងខ្ពស់ ខណៈដែលសេដ្ឋកិច្ចបានងើបឡើងវិញពីជំងឺរាតត្បាតកូវីដ១៩ និងកត្តាមួយទៀត គឺការផ្គត់ផ្គង់គ្រប់គ្រាន់ទៅតាមតម្រូវការ កំពុងត្រូវបានរារាំងដោយកត្តាភូមិសាស្ត្រនយោបាយ ដែលកំពុងតានតឹងកាន់តែខ្លាំងឡើងពីមួយថ្ងៃទៅមួយថ្ងៃ។
ទន្ទឹមនឹងតម្លៃទំនិញកំពុងកើនឡើងយ៉ាងខ្លាំងនេះ គេមើលឃើញថា តម្លៃប្រេងឆៅ និងប្រេងឥន្ធនៈផ្សេងទៀតបានកើនឡើងគួរឱ្យកត់សម្គាល់ ហើយទន្ទឹមនេះក្នុងចំណោមទំនិញសំខាន់ៗចំនួន ២២មុខ គឺមានទំនិញចំនួន ៩ មុខហើយ បានកើនឡើងថ្លៃច្រើនជាង ៥០% ក្នុងនោះផលិតផលកាហ្វេបានកើនឡើង ៩១%និងកប្បាសកើនឡើង ៥៨%និងអាលុយមីញ៉ូមកើនឡើង៥៣% ។
យ៉ាងណាមិញ ស្របពេលដែលតម្រូវការប្រេងឆៅបានកើនឡើង ការវិនិយោគលើការផ្គត់ផ្គង់ក៏ត្រូវបានរារាំងដោយការផ្លាស់ប្តូរទៅជា ប្រព័ន្ធសេដ្ឋកិច្ចដែលបញ្ចេញនូវកាបូនតិចផងដែរ។ ទន្ទឹមនឹងនេះ ការរំខានដល់ខ្សែចង្វាក់ផ្គត់ផ្គង់ និងកង្វះកម្លាំងពលកម្មបានដាក់សម្ពាធកាន់តែខ្លាំងទៅលើតុល្យភាពរវាងការផ្គត់ផ្គង់ និងតម្រូវការ។
អត្ថបទគួរអាន
សូមជម្រាបថា តម្លៃទំនិញកើនឡើងបានជះឥទ្ធិពលដល់ចង្វាក់ផ្គត់ផ្គង់ជាបន្តបន្ទាប់នៅក្នុងទីផ្សារ។ ជាក់ស្ដែង រោងចក្រចម្រាញ់អាលុយមីញ៉ូ ដែលប្រើប្រាស់ថាមពលអគ្គិសនីយ៉ាងច្រើន ត្រូវបានបង្ខំឱ្យកាត់បន្ថយទិន្នផល ដោយសារតម្លៃផលិតកម្មកើនឡើង ដែលបង្កើតឱ្យមានការខ្វះខាតលោហៈធាតុ។ ហើយការកើនឡើងតម្លៃឧស្ម័នធម្មជាតិក៏បានជំរុញឱ្យតម្លៃអាម៉ូញាក់ដែលជាសមាសធាតុសំខាន់នៃជីកសិកម្មកើនឡើង ដែលវាជំរុញបន្តឱ្យតម្លៃគ្រាប់ធញ្ញជាតិកើនឡើងផងដែរ។
យ៉ាងណាមិញ តម្លៃទំនិញកើនខ្ពស់កំពុងតែដាក់បន្ទុកបន្ថែមលើការងើបឡើងវិញនៃសេដ្ឋកិច្ចពិភពលោក ហើយប្រសិនបើតម្លៃថាមពលនៅតែស្ថិតក្នុងកម្រិតដូចបច្ចុប្បន្ននេះ នោះមូលនិធិរូបិយវត្ថុអន្តរជាតិបានប៉ាន់ប្រមាណថា កំណើនសេដ្ឋកិច្ចពិភពលោកនឹងធ្លាក់ចុះអស់ ០,៥%។
ផ្អែកលើការកើនឡើងថ្លៃទំនិញទាំងនេះ ប្រទេសក្រីក្រត្រូវបានគេមើលឃើញថា អាចនឹងប្រឈមមុននឹងផលប៉ះពាល់ខ្លាំងជាងគេ ខណៈដែលប្រទេសអ្នកមួយចំនួនដូចជា សហរដ្ឋអាមេរិក និងប្រទេសផ្សេងទៀតកំពុងប្រញាប់ប្រញាល់ក្នុងការរឹតបន្តឹងគោលនយោបាយរូបិយវត្ថុជាការឆ្លើយតបទៅនឹងកម្រិតអតិផរណាកើនឡើងផងដែរ៕
None
