នៅក្នុងអត្ថបទដែលបានចេញផ្សាយជាមួយនឹងកម្មវិធីត្រួតពិនិត្យបំណុលសកល IMF បានគូសបញ្ជាក់ថា បំណុលសាធារណៈ និងឯកជនសរុបបានថយចុះ ១០% មកនៅសល់ត្រឹម ២៤៧% នៃផលិតផលក្នុងស្រុកសរុប (GDP) សកលលោកក្នុងឆ្នាំ២០២១។ នេះជាការធ្លាក់ចុះពីកម្រិតខ្ពស់បំផុតដែលធ្លាប់មានដល់ ២៥៧% នៃ GDP កាលពីឆ្នាំ២០២០។ ទោះមានការធ្លាក់ចុះខ្លះតែ IMF អះអាងថា វានៅតែជាកម្រិតបំណុលដ៏ច្រើនបើធៀបទៅកាលពីមិនទាន់មានជំងឺរាតត្បាត ហើយវាកាន់តែច្រើនលើសលប់ទៀតបើធៀបនឹងកំរិតបំណុលឆ្នាំ ២០០៧ មុនពេលមានវិបត្តិហិរញ្ញវត្ថុសកល ដែលមានត្រឹម ១៩៥%នៃ GDP។
បើគិតជាប្រាក់ដុល្លារ បំណុលសកលបានបន្តកើនឡើង ទោះបីជាមានល្បឿនយឺតជាងមុនក៏ដោយ ក្នុងនោះវាបានឈានដល់តម្លៃ ២៣៥ទ្រីលានលានដុល្លារកាលពីឆ្នាំមុន។
លោក វីទ័រ ហ្គាសប៉ា(Vitor Gaspar) នាយកកិច្ចការសារពើពន្ធរបស់ IMF បាននិយាយថា កំរិតបំណុលត្រូវបានគេរំពឹងថា នឹងធ្លាក់ចុះបន្ថែមទៀតនៅក្នុងប្រទេសភាគច្រើនសម្រាប់ឆ្នាំ២០២២នេះ ដែលបានរុញច្រានដោយកំណើនផលិតផលក្នុងស្រុកសរុប។ ប៉ុន្តែនៅឆ្នាំ២០២៣ កំរិតបំណុលមិនប្រាកដថាធ្លាក់ចុះទៀតឡើយ ក្រោយពីមានការព្យាករណ៍ពីការធ្លាក់ចុះសេដ្ឋកិច្ចនៅប្រទេសជាច្រើន និងការកើនឡើងនៃការចំណាយលើសេវាបំណុល ដោយសារអត្រាការប្រាក់គោលខ្ពស់។
អត្ថបទគួរអាន
ដោយបានដកស្រង់ទិន្នន័យពី១៩០ប្រទេស អត្ថបទរបស់ IMF ដដែលបន្តថា បំណុលឯកជនទូទាំងសកលលោកបានធ្លាក់ចុះ៦% មកនៅសល់១៥៣% នៃផលិតផលក្នុងស្រុកសរុបក្នុងឆ្នាំ២០២១។ ដោយឡែក បំណុលសាធារណៈសកលវិញ ធ្លាក់ចុះចំនួន៤% មកនៅសល់ ៩៦% នៃផលិតផលក្នុងស្រុកសរុប ហើយនេះជាការធ្លាក់ចុះដ៏ធំបំផុតក្នុងរយៈពេលជាច្រើនទសវត្សរ៍ចុងក្រោយ។
សូមជម្រាបថា ទំនោរធ្លាក់ចុះនៃកំរិតបំណុលសកលនេះ គឺជាទិន្នន័យដែលបូកសរុបនៅទូទាំងពិភពលោក។ ប៉ុន្តែបើគេមើលទៅតាមក្រុមប្រទេសផ្សេងៗវិញ កំរិតបំណុលមិនបានធ្លាក់ចុះសោះឡើយ សម្រាប់ក្រុមប្រទេសក្រី ក្រឬប្រទេសកំពុងរីកចម្រើន។ ប្រទេសអ្នកមានឬប្រទេសរីកចម្រើន មានកំរិតបំណុលទាំងសាធារណៈនិងឯកជនបញ្ចូលគ្នា ធ្លាក់ចុះ៥%នៃGDP ប៉ុន្តែបណ្តាប្រទេសដែលមានប្រាក់ចំណូលទាបបានឃើញកំរិតបំណុលសរុបរបស់ពួកគេបន្តកើនឡើងនៅឆ្នាំ២០២១ ដែលជំរុញដោយបំណុលឯកជនកាន់តែខ្ពស់ ជាមួយនឹងបំណុលសរុបឈានដល់ ៨៨% នៃផលិតផលក្នុងស្រុកសរុប។
អ្នកជំនាញផ្នែកតាមដានសារពើពន្ធរបស់ IMF បាននិយាយថា កម្រិតបំណុលប្រទេសមានប្រាក់ចំណូលទាបនៅពេលនេះ គឺមានដល់កម្រិតខ្ពស់បំផុត គិតតាំងពីការមានការបន្ធូរបន្ថយបំណុលកាលពីទសវត្សរ៍ឆ្នាំ១៩៩០ និងនៅដើមឆ្នាំ២០០០មក។ បន្ថែមពីនេះ ក៏មានការព្រួយបារម្ភកាន់តែខ្លាំងឡើងដែរ អំពីសមត្ថភាពរបស់ប្រទេសមានប្រាក់ចំណូលទាប និងមធ្យម ក្នុងការសងបំណុលរបស់ពួកគេ ដោយតាមការប៉ាន់ស្មាន មានប្រទេសទីផ្សារកំពុងរីកចម្រើន២៥% និងប្រទេសចំណូលទាប៦០% កំពុងស្ថិតនៅក្នុងវិបត្តិបំណុល ឬជិតធ្លាក់ចូលក្នុងវិបត្តិបំណុលផងដែរ៕
