លោក Sethaput Suthiwartnaruput បាននិយាយថា អត្រាអតិផរណាពិភពលោកត្រូវគេរំពឹងថានឹងនៅតែបន្តស្ថិតក្នុងកម្រិតខ្ពស់ដដែល ហើយធនាគារកណ្តាលភាគច្រើននៅទូទាំងពិភពលោកនឹងរក្សាគោលនយោបាយរូបិយវត្ថុតឹងរ៉ឹងដើម្បីរក្សាតម្លៃនៅឆ្នាំ២០២៣។
លោក Sethaput បានមានប្រសាសន៍ថា អត្រាការប្រាក់កាន់តែខ្ពស់បានបង្ហាញពីការប្រែប្រួលសម្រាប់ទីផ្សារហិរញ្ញវត្ថុទូទាំងពិភពលោក ដែលធ្វើឲ្យសេដ្ឋកិច្ចពិភពលោកធ្លាក់ចុះនៅឆ្នាំក្រោយ។
មូលនិធិរូបិយវត្ថុអន្តរជាតិ (IMF) បានព្យាករពីកំណើន GDP សកលសម្រាប់ឆ្នាំ២០២៣មាន ត្រឹមតែ ៣,២% និងឆ្នាំ២០២៤ មានចំនួន ២,៧% ប៉ុណ្ណោះ។ នេះបើតាមលោក Sethaput បាននិយាយនៅក្នុងសិក្ខាសាលាមួយដែលរៀបចំធ្វើដោយទស្សនាវដ្តី Money and Banking កាលពីចុងសប្ដាហ៍មុន។
ទេសាភិបាលធនាគារកណ្ដាលថៃរូបនេះ បាននិយាយថា សេដ្ឋកិច្ចថៃនៅឆ្នាំក្រោយនេះនឹងរងផលប៉ះពាល់ដោយការធ្លាក់ចុះសេដ្ឋកិច្ចពិភពលោក ក្នុងវិស័យមួយចំនួនរួមទាំងវិស័យនាំចេញផងដែរ ហើយក៏អាចប្រឈមនឹងការដំឡើងថ្លៃថាមពល និងនិន្នាការដំឡើងអត្រាការប្រាក់ដុល្លារអាមេរិកផងដែរ។
អត្ថបទគួរអាន
លោកបាននិយាយថា ទោះជាយ៉ាងណា ទ្រនាប់ការពាររបស់ប្រទេសថៃ គឺមានភាពរឹងមាំគ្រប់គ្រាន់ដើម្បីដោះស្រាយភាពមិនប្រាកដប្រជាបានខ្ពស់ ដោយសារមានទុនបម្រុងអន្តរជាតិដ៏រឹងមាំដែលជាប្រព័ន្ធហិរញ្ញវត្ថុមួយដ៏មានស្ថិរភាព និងកម្រិតទាបនៃបំណុលក្រៅប្រទេស។
លោក Sethaput បាននិយាយថាសេដ្ឋកិច្ចក្នុងស្រុកនៅតែមានដំណើរការធម្មតា ហើយធនាគារកណ្តាលថៃប៉ាន់ប្រមាណអត្រាកំណើនផលិតផលក្នុងស្រុកសរុបនៅក្នុងកម្រិត ៣,២% ក្នុងឆ្នាំ២០២៣មុនពេលកើនឡើងដល់ ៣,៧% ក្នុងឆ្នាំ២០២៤។
ដោយសារហានិភ័យខាងក្រៅកើនខ្ពស់ចំពេលមានសញ្ញាកាន់តែច្បាស់លាស់ពីការធ្លាក់ចុះសេដ្ឋកិច្ចពិភពលោកនោះ ធនាគារកណ្តាលបានព្យាករថា ការនាំចេញនឹងកើនឡើងត្រឹមតែ ១% នៅឆ្នាំក្រោយនេះ។
ទេសាភិបាលលោក Sethaput បាននិយាយថា ការពង្រីកសេដ្ឋកិច្ចរបស់ប្រទេសថៃភាគច្រើននឹងបានមកពីការរួមចំណែកពីវិស័យទេសចរណ៍ និងការប្រើប្រាស់ក្នុងស្រុក។
ធនាគារកណ្តាលបានព្យាករថា ការមកដល់របស់ភ្ញៀវទេសចរបរទេសនឹងមានចំនួនសរុប ១០លាន៥ សែននាក់ក្នុងឆ្នាំ២០២២ និងកើនឡើងដល់ ២២ លាននាក់នៅក្នុងឆ្នាំ២០២៣ដែល គាំទ្រប្រាក់ចំណូលកាន់តែប្រសើរឡើងសម្រាប់ទីផ្សារការងារទាំងមូល។
ជាមួយគ្នានេះ អត្រាអតិផរណាបានឡើងដល់កំពូលក្នុងត្រីមាសទី៣ឆ្នាំនេះ ហើយត្រូវបានព្យាករថា នឹងធ្លាក់ចុះជាបណ្តើរៗដល់កម្រិតគោលដៅពី ១% ទៅ៣%នៅឆមាសទី២ឆ្នាំ២០២៣៕
អត្ថបទ ៖ សុខ ជា
