តើមានកត្តាអ្វីខ្លះជួយឱ្យតម្លៃមាសនៅកម្ពុជាហក់ឡើងដល់ជិត២ពាន់៥រយក្នុង១តម្លឹងនៅមួយរយៈចុងក្រោយនេះ?

ម្ចាស់ហាងមាសពេជ្រទីមង្គល កត់សម្គាល់ឃើញថា តម្លៃមាសនៅកម្ពុជា បានហក់ឡើងថ្លៃខ្ពស់ជាបន្តបន្ទាប់នៅពីរសប្តាហ៍ចុងក្រោយនេះ ជាក់ស្តែងហាងឆេងមាសនៅហាងរបស់លោកលក់ចេញ១តម្លឹងជិត២ពាន់៥រយដុល្លារ កើនឡើងជិត១០០ដុល្លារ ក្នុង១តម្លឹង បើធៀបនឹងតម្លៃលក់ចេញកាលពីពីរសប្តាហ៍​មុន។ ការកើនឡើងតម្លៃមាសនេះត្រូវបានម្ចាស់ហាងមាសរូបនេះវាយតម្លៃថា អាចបណ្តាលមកពីមាសនៅលើទីផ្សារអន្តរជាតិ មានតម្រូវការច្រើន គួបផ្សំបញ្ហាសង្រ្គាម និងបញ្ហានយោបាយនៅលើពិភពលោកបានរាំងខ្ទប់ការបញ្ចេញមាសទៅលើទីផ្សារ ដែលបណ្តាលឱ្យតម្លៃមាសកើនឡើង។ យ៉ាងណាក៏ដោយអាជីវករលក់មាសពេជ្ររូបនេះជឿជាក់ថា តម្លៃមាសនៅកម្ពុជានឹងមានការប្រែប្រួលបន្ថែមនាពេលខាងមុខនេះ។ ជាការកត់សម្គាល់របស់អាជីវកររូបនេះ ការកើនឡើងតម្លៃមាសនៅកម្ពុជា អាចមានរយៈពេលខ្លីតែប៉ុណ្ណោះ តែការឡើងថ្លៃមានសន្ទុះលឿនជាងការធ្លាក់ចុះ។

ពាក់ព័ន្ធតម្លៃមាសកើនឡើងនេះដែរ លោកបណ្ឌិត ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី បានគូសបញ្ជាក់ថា តម្លៃមាសនៅកម្ពុជា និងពិភពលោក ពិតជាបានហក់ឡើងថ្លៃខ្ពស់ពិតមែននៅរយៈពេលពីរសប្តាហ៍មកនេះ ខណៈនៅដើមខែធ្នូ នេះ តម្លៃមាសបានហក់ឡើងខ្ពស់ខ្លាំងដល់ជាង២ពាន់៥រយដុល្លារក្នុង១តម្លឹងឯណោះ ដែលតម្លៃនេះមិនធ្លាប់មានពីមុនមកនោះទេ។ ប៉ុន្តែបច្ចុប្បន្នតម្លៃមាសហាក់បានធ្លាក់ចុះបន្តិចមកនៅត្រឹមជិត២ពាន់៥រយដុល្លារ ក្នុង១តម្លឹងប៉ុណ្ណោះ។ បើតាមអ្នកជំនាញទីផ្សារជួញដូរមាសរូបនេះ មានកត្តាដែលជំរុញឱ្យតម្លៃមាសនៅកម្ពុជា ក៏ដូចជាលើពិភពលោកហក់ឡើងថ្លៃខ្ពស់ គឺដោយសារឥទ្ធិពលនៃសង្គ្រាមរវាងអ៊ីស្រាអែល និងក្រុមហាម៉ាសបានផ្ទុះឡើងខ្លាំងម្តងទៀត គួបផ្សំតម្លៃប្រាក់ដុល្លារហាក់មានទំនោរធ្លាក់ចុះ ខណៈអ្នកវិនិយោគមាសធំៗនៅលើទីផ្សារអន្តរជាតិ បានបង្កើនការបញ្ជាទិញមាសកាន់តែច្រើន ដែលធ្វើឱ្យតម្លៃមាសឡើងដល់កម្រិតខ្ពស់។ តែយ៉ាងណាអ្នកជំនាញរូបនេះជឿជាក់ថា ក្រោយអ្នកវិនិយោគទាំងនោះបានកាត់ប្រាក់ចំណេញរបស់ពួកគេរួចរាល់ នោះតម្លៃមាសអាចនឹងធ្លាក់ចុះមកវិញ។

បើតាមការវាយតម្លៃរបស់លោកបណ្ឌិត ឡុង សំណាង ស្ថិតក្នុងស្ថានភាពនាពេលបច្ចុប្បន្ននេះ លោកជឿជាក់ថា តម្លៃហាងឆេងមាសនឹងនៅតែបន្តកើនឡើងដដែល ក៏ប៉ុន្តែគ្រាន់តែសន្ទុះនៃកំណើននេះអាចនឹងយឺតជាងប៉ុន្មានថ្ងៃមុនបន្តិច៕