គោលនយោបាយនេះ ត្រូវបានបែងចែកសម្រាប់អនុវត្តនៅក្នុងវិស័យប្រើប្រាស់ថាមពលសំខាន់ៗ មានជាអាទិ៍៖ ឧស្សាហកម្ម អគារពាណិជ្ជកម្ម និងអគារផ្សេងទៀត អគារលំនៅឋាន សេវាសាធារណៈ និងដឹកជញ្ជូន។
វិស័យថាមពល គឺជាសសរស្តម្ភ និងជាស្នូលដ៏សំខាន់នៃការអភិវឌ្ឍសេដ្ឋកិច្ចជាតិ ដូច្នេះការបន្តអភិវឌ្ឍវិស័យថាមពលឱ្យមានតុល្យភាព និរន្តរភាព និងប្រសិទ្ធភាព គឺជាកូនសោគន្លឹះមួយដ៏សំខាន់ក្នុងការបន្តជំរុញវឌ្ឍនភាពសេដ្ឋកិច្ចកម្ពុជា។ ក្នុងរយៈពេល ២ទស្សវត្ស ចុងក្រោយនេះ រាជរដ្ឋាភិបាលកម្ពុជា បានអនុវត្តដោយជោគជ័យនូវយុទ្ធសាស្ត្រចតុកោណ ដើម្បីកំណើនការងារ សមធម៌ និងប្រសិទ្ធភាព។
ប្រសិទ្ធភាពថាមពល គឺជាការប្រើប្រាស់ថាមពលតិចជាងមុន ប៉ុន្តែរក្សាបានទិន្នផលដូចមុន ឬប្រសើរជាងមុន។ តាមនិយមនេះ ប្រសិទ្ធភាពថាមពលធ្វើឲ្យទិន្នផលនៃការប្រើប្រាស់ថាមពលមួយឯកតាកើនឡើងច្រើនជាងមុន ដូច្នេះ ប្រសិទ្ធភាពថាមពល គឺជាវិធីសាស្រ្តដ៏សំខាន់មួយក្នុងការតាមបន្ថយតម្រូវការថាមពល ការសន្សំសំចៃ និងកាត់បន្ថយថ្លៃចំណាយលើការប្រើប្រាស់ថាមពល ការគាំទ្រដល់ការដោះស្រាយបញ្ហាសន្តិសុខថាមពល និងបញ្ហាចីរភាពបរិស្ថាននៃការផ្គត់ផ្គង់ថាមពល។
អត្ថបទគួរអាន
ក៏ប៉ុន្តែ កម្ពុជានៅមិនទាន់បានប្រើប្រាស់សក្ដានុពលថាមពលប្រសិទ្ធភាពថាមពលច្រើននៅឡើយទេ ដូច្នេះ ការប្រើប្រាស់កាលានុវត្តភាពទាំងនេះ អាចនឹងនាំមកនូវអត្ថប្រយោជន៍ជាច្រើន ជាពិសេស ការពង្រឹងសន្តិសុខថាមពលឲ្យកាន់តែប្រសើរឡើង, ការកាត់បន្ថយថ្លៃចំណាយលើថាមពល និងការបង្កើនភាពប្រកួតប្រជែងសេដ្ឋកិច្ចឲ្យខ្ពស់ជាងមុន, ការកាត់បន្ថយការចំណាយ និងភាពក្រីក្រ, ការកាត់បន្ថយការបញ្ចេញឧស្ម័នផ្ទះកញ្ចក់ និងការបំពុលបរិស្ថាន និងការបង្កើតទីផ្សារថ្មីសម្រាប់បច្ចេកវិទ្យា និងសេវាកម្មប្រសិទ្ធភាពថាមព។
នៅក្នុងសេក្ដីរាយការណ៍មួយរបស់អង្គការ UNDP បានឲ្យដឹងថា ធនាគារពិភពលោក (World Bank) បានចាត់ទុកកម្ពុជា ជាប្រទេសមួយក្នុងចំណោម “ប្រទេសផ្គត់ផ្គង់អគ្គិសនីលឿនបំផុតនៅលើពិភពលោក”។ នេះជាលទ្ធផលបន្ទាប់ពីកម្ពុជា បានពង្រីកការទទួលបានថាមពលរបស់ខ្លួនពី ៦,៦% នៅឆ្នាំ២០០០ ទៅដល់ ៩៧,៥% ត្រឹមចុងឆ្នាំ២០២១៕
