តើអ្នកជំនាញ និងអ្នកជំនួញវិញ យល់ឃើញបែបណាដែរ ចំពោះវិធានការណ៍ជុំទី៨នេះ នៅចំពេលកម្ពុជាកំពុងជួបបញ្ហាឆ្លងរាលដាលកូវីដ-១៩ ក្នុងសហគមន៍ធ្ងន់ធ្ងរមិនធ្លាប់មានយ៉ាងដូច្នេះ?
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ខេមបូណូមីសថា ការដាក់ចេញនូវវិធានការរបស់រាជរដ្ឋាភិបាលចំនួន ៨ជុំនេះ បានជួយដោះស្រាយបញ្ហាដល់វិស័យឯកជនបានមួយផ្នែកដែរ ជាពិសេសជួយដល់ការទ្រទ្រង់កម្លាំងពលកម្មបានខ្លះ មិនឲ្យក្រុមហ៊ុនដួលរលំ ដែលនេះ ជាការជំរុញទឹកចិត្តដល់វិស័យឯកជនឲ្យប្រឹងប្រែងរស់បន្តទៀត។
ជុំវិញនឹងវិធានការជុំទី៨ នេះដែរ សម្រាប់វិស័យទេសចរណ៍វិញ ត្រូវបានលោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បញ្ជាក់ថា អាចជួយបានខ្លះ ក្នុងការកាត់បន្ថយការចំណាយរបស់អាជីវកម្មទេសចរណ៍។ តែយ៉ាងណាមិញ លោកជំទាវ បានស្នើដល់រាជរដ្ឋាភិបាលពិចារណា ក្នុងការចាក់វ៉ាក់សាំងដល់អ្នក ដែលធ្វើការក្នុងវិស័យទេសចរណ៍ជួរមុខផងដែរ ដើម្បីអាចឲ្យវិស័យនេះ អាចរស់រានបានបន្តទៀត ព្រោះវិស័យទេសចរណ៍រងទុក្ខធំធេងជាងគេបើធៀបនឹងវិស័យផ្សេងៗទៀត។
ដោយឡែកសម្រាប់វិស័យអាកាសចរណ៍វិញ ត្រូវបានឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការរដ្ឋានអាកាសចរស៊ីវិល បញ្ជាក់ថា ការដាក់ចេញវិធានការជុំទី៨ ក្នុងការស្តារ និងជំរុញកំណើនសេដ្ឋកិច្ចរបស់រាជរដ្ឋាភិបាលនេះ គឺជាការល្អសម្រាប់វិស័យមួយចំនួន ដែលកំពុងតែដុនដាប ព្រោះតែលេបត្របាក់ដោយកូវីដ-១៩នេះ ប៉ុន្តែសម្រាប់វិស័យអាកាសចរណ៍វិញ គឺជួយបានតិចតួចបំផុត។
យ៉ាងណាក៏ដោយចុះ ជុំវិញនឹងការទប់ទល់នឹងជាមួយនឹងវិបត្តិកូវីដ-១៩ នេះដែរ ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ លើកឡើងថ្មីៗនេះថា កម្ពុជាអាចមានលទ្ធភាពទ្រទ្រង់សេដ្ឋកិច្ចរបស់ខ្លួនបានពីរឆ្នាំទៅមុខទៀត ដើម្បីប្រយុទ្ធទប់ទល់ជាមួយវិបត្តិជំងឺកូវីដ-១៩នេះ។ ប៉ុន្តែ ឯកឧត្តម វង្សី វិស្សុតបានអះអាងទៀតថា បើការឆ្លងរីករាលដាលនៃជំងឺកូវីដ-១៩ បន្តអូសបន្លាយលើសពីរយៈពេលពីរឆ្នាំ នោះលទ្ធផលអាចនឹងពិបាកធានាបានណាស់។
ទោះយ៉ាងណា ឯកឧត្តម វង្សី វិស្សុត បានបញ្ជាក់អះអាងទៀតថា សម្រាប់ការទិញវ៉ាក់សាំងកូវីដ-១៩ ដើម្បីចាក់ជូនប្រជាពលរដ្ឋ គឺកម្ពុជាមានលទ្ធភាពគ្រប់គ្រាន់ និង មិនបារម្ភពីរឿងខ្វះថវិកាទិញវ៉ាក់សាំងនោះទេ អ្វីដែលបារម្ភ គឺខ្លាចថាមិនមានវ៉ាក់សាំងគ្រប់គ្រាន់សម្រាប់លក់មកឲ្យកម្ពុជាទៅវិញទេ0x017d7
សូមបញ្ជាក់ថា កាលពីថ្ងៃទី២៥ ខែមីនា ឆ្នាំ២០២១ រដ្ឋាភិបាលកម្ពុជាបានសម្រេចដាក់វិធានការជុំទី៨ ដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ច ដើម្បីស្តារ និងជំរុញកំណើនសេដ្ឋកិច្ចកម្ពុជាក្នុងអំឡុងពេល និងក្រោយវិបត្តិកូវីដ-១៩។ វិធានការណ៍នេះ មានរយៈពេល៣ខែទៅមុខទៀត ចាប់ពីខែមេសា ដល់ខែមិថុនា ដោយផ្តោតទៅលើវិស័យកាត់ដេរ ទេសចរណ៍ អាកាសចរណ៍ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះជាដើម។
អត្ថបទទាក់ទង
នៅក្នុងវិធានការជុំទី៨នេះ កម្មករកម្មាការិនីរោងចក្រកាត់ដេរវាយនភណ្ឌ ស្បែកជើង ផលិតផលធ្វើដំណើរ និងកាបូប នឹងទទួលបានប្រាក់ឧបត្ថម្ភពីរដ្ឋ ៤០ដុល្លារក្នុងមួយខែ សម្រាប់រយៈពេល៣ខែ ពីខែមករាដល់ខែមិថុនា ឆ្នាំ២០២១។ រីឯម្ចាស់រោងចក្រ សហគ្រាសក្នុងវិស័យនេះ ត្រូវបន្ដបន្ថែមផ្ដល់ជូន៣០ដុល្លារ សម្រាប់កម្មករនិយោជិតម្នាក់ៗ។ សរុបកម្មករម្នាក់នឹងទទួលបាន៧០ដុល្លារក្នុងមួយខែ។
ជាមួយគ្នានេះ កម្មករនិយោជិតនៅក្នុងវិស័យទេសចរណ៍ ដូចជាសណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ ក៍នឹងទទួលបានប្រាក់ឧបត្ថម្ភពីរដ្ឋ៤០ដុល្លារ ក្នុងមួយខែ សម្រាប់រយៈពេល៣ខែ ចាប់ពីខែមេសា ដល់ខែមិថុនាឆ្នាំ២០២១។
រាជរដ្ឋាភិបាល ក៏បន្ដលើកលែងការបង់ពន្ធប្រចាំខែគ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ចីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្ម នៅក្នុងរាជធានីភ្នំពេញ សៀមរាប ព្រះសីហនុ កែប កំពត ក្រុងបាវិត និងក្រុងប៉ោយប៉ែត សម្រាប់រយៈពេល៣ខែ បន្ថែមទៀត ពីខែមេសា ដល់ខែ មិថុនាឆ្នាំ២០២១។
សម្រាប់វិស័យអាកាសចរណ៍ ក៏ត្រូវបានទទួលការលើកលែងការបង់ពន្ធអប្បបរមា សម្រាប់រយៈពេល៣ខែបន្ថែមទៀត ពីខែមេសា ដល់ខែមិថុនាឆ្នាំ២០២១។ ជាមួយគ្នានេះ នឹងបន្ដពន្យារការបង់ប្រាក់ជំពាក់កម្រៃអាកាសចរណ៍ស៊ីវិលសម្រាប់រយៈពេល៣ខែផងដែរ។
សម្រាប់គ្រួសារក្រីក្រ និងងាយរងគ្រោះ ក៏នឹងទទួលបានប្រាក់ឧបត្ថម្ភសម្រាប់រយៈពេល ៣ខែបន្ថែមទៀត ពីខែមេសា ដល់ខែមិថុនាឆ្នាំ២០២១
រាជរដ្ឋាភិបាលក៏បន្ដណែនាំដល់ក្រសួងស្ថាប័នរដ្ឋា និងអំពាវដល់បុគ្គលឯកជន ដែលជាម្ចាស់អគារទីតាំងអាជីវកម្ម និងរោងចក្រ ជួយសម្រួលដល់ភាគីអ្នកជួល ដោយជៀសវាងការបញ្ឈប់កិច្ចសន្យា ឬការបណ្ដេញចេញ ក្នុងករណីដែលភាគីអ្នកជួលមិនមានលទ្ធភាពបង់សេវាជួល បានទាន់ពេលវេលាផងដែរ។
រាជរដ្ឋាភិបាលក៏សូមលើកទឹកចិត្តដល់ភាគីម្ចាស់អគារទីតាំងអាជីវកម្ម និងរោងចក្រ ចរចាជាមួយនឹងភាគីជួល លើការពន្យារពេលនៃការបង់ថ្លៃសេវាជួល និងការប្រែប្រួលថ្លៃសេវាជួល ជាយថាហេតុ។ បន្ថែមលើនេះ រាជរដ្ឋាភិបាលក៏សូមអំពាវនាវដល់ក្រុមហ៊ុនអភិវឌ្ឍអចលនវត្ថុទាំងអស់ ចូលរួមអនុវត្តតាមស្មារតីនៃសេចក្ដីប្រកាសរួមនៃក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា ស្ដីពីលទ្ធផលកិច្ចប្រជុំស្ដីពីបញ្ហាអចលនវត្ថុនៅកម្ពុជាចុះថ្ងៃទី ២២ ខែមីនាឆ្នាំ២០២១៕
None
