លោក Mariusz Kaminski រដ្ឋមន្ត្រីមហាផ្ទៃប៉ូឡូញ បានប្រាប់សន្និសីទសារព័ត៌មានរួមជាមួយភាគីលីទុយអានី ឡាតវី និងអេស្តូនីថា «យើងទាមទារឱ្យអាជ្ញាធរនៅទីក្រុង Minsk ធ្វើយ៉ាងណាឱ្យក្រុមទាហាន Wagner ដកចេញពីទឹកដីប្រទេសបេឡារុស្សជាបន្ទាន់ និងជនចំណាកស្រុកខុសច្បាប់បេឡារុស្សផ្សេងទៀតនៅតំបន់ព្រំដែន ត្រូវត្រឡប់ទៅស្រុកកំណើតរបស់ពួកគេវិញ»។ លោក Mariusz បានបន្ថែមថា «ប្រសិនបើមានឧប្បត្តិហេតុធ្ងន់ធ្ងរណាមួយកើតឡើង មិនថានៅព្រំដែនប៉ូឡូញ ឬលីទុយអានី យើងនឹងសងសឹកភ្លាមៗ ហើយច្រកព្រំដែនទាំងអស់នឹងត្រូវបិទ»។
អត្ថបទគួរអាន
សមាជិកសហភាពអឺរ៉ុបនិងណតូ ឡាតវី លីទុយអានី និងប៉ូឡូញ ដែលមានព្រំប្រទល់ជាប់ប្រទេសបេឡារុស្ស កំពុងមានការព្រួយបារម្ភកាន់តែខ្លាំងឡើងអំពីសន្តិសុខព្រំដែន ចាប់តាំងពីទាហានស៊ីឈ្នួល Wagner ដែលបះបោរបរាជ័យកាលពីខែមុន បានមកឈរជើងក្នុងប្រទេសបេឡារុស្សកាន់តែច្រើនឡើង តាមការអញ្ជើញរបស់ប្រធានាធិបតីបេឡារុស្សលោក Alexander Lukashenko។ ជាមួយគ្នានេះ ប្រទេសប៉ូឡូញក៏បានឃើញអំពីកើនឡើងនៃចំនួនជនចំណាកស្រុកនៅមជ្ឈិមបូព៌ា និងអាហ្រ្វិក ដែលព្យាយាមឆ្លងកាត់ព្រំដែនក្នុងប៉ុន្មានខែថ្មីៗនេះ ហើយបានចោទប្រកាន់បេឡារុស្សថា បានជួយសម្របសម្រួលពួកគេ។
ទន្ទឹមគ្នានេះ រដ្ឋមន្ត្រីក្រសួងមហាផ្ទៃប្រទេសលីទុយអានី លោកស្រី Agne Bilotaite បានប្រាប់ប្រព័ន្ធផ្សព្វផ្សាយរួមនោះថា មានលក្ខណៈវិនិច្ឆ័យពីរដែលអាចនាំទៅដល់ការបិទព្រំដែន។ ទីមួយប្រសិនបើមានឧប្បត្តិហេតុប្រដាប់អាវុធនៅព្រំដែននៃប្រទេសមួយ។ ឧបទ្ទវហេតុនេះ នឹងត្រូវការគំរាមកំហែងយ៉ាងធ្ងន់ធ្ងរដល់សន្តិសុខជាតិ។ និងមួយទៀតលោកស្រី Bilotaite ថា គឺជាការទម្លាយចូលនៃជនចំណាកស្រុកឆ្លងកាត់ព្រំដែននៃរដ្ឋណាមួយ»។ មុននឹងឈានទៅដល់បិទព្រំដែនទាំងស្រុងនោះ ក្រសួងមហាផ្ទៃរបស់ប្រទេសលីទុយអានី នឹងស្នើទៅរដ្ឋាភិបាលបិទច្រកព្រំដែនចំនួនពីរក្នុងចំណោមចំណុចឆ្លងកាត់ព្រំដែន ដែលនៅសល់ចំនួន៤ របស់ខ្លួនជាមួយប្រទេសបេឡារុស្ស។ ការធ្វើបែបនេះ គឺដើម្បីទប់ស្កាត់ការលួចចូល និងអាចប្រមូលផ្តុំកងកម្លាំងការពារព្រំដែនកាន់តែច្រើននៅច្រកទាំង២។
គួរជម្រាបថា កាលពីដើមខែសីហានេះ ប៉ូឡូញបានចោទប្រកាន់បេឡារុស្សថា បានរំលោភដែនអាកាសរបស់ខ្លួន ខណៈទីក្រុងមីនស៍បដិសេធ។ គិតមកទល់នឹងពេលនេះ ប៉ូឡូញបានបញ្ចូនកងទ័ពប្រមាណ២ពាន់នាក់រួចមកហើយ ទៅកាន់ព្រំដែនជាមួយបេឡារុស្ស និងគ្រោងពង្រាយ១ម៉ឺននាក់ទៀតនាពេលខាងមុខ។ ការដាក់ពង្រាយនេះបានកើតឡើង បន្ទាប់ពីសេចក្តីរាយការណ៍កាលពីដើមខែសីហាថា ទាហានស៊ីឈ្នួល Wagner ប្រមាណ១០០នាក់ បានមានវត្តមាននៅតាមព្រំដែនជាមួយប៉ូឡូញ ហើយចំនួននេះអាចលើសពីនេះទៅទៀតក្នុងពេលបច្ចុប្បន្ន។
