វិធានការទាំង ៧ជុំរបស់រាជរដ្ឋាភិបាលគឺបានជួយបានចូលរួមមួយចំណែកក្នុងការ ដោះស្រាយបញ្ហាដែលបង្កឡើងដោយវិបត្តិនៃមេរោគកូវីដ-១៩ ពិសេសជួយដល់អាជីវកម្ម កម្មករនិយោជិត នៅក្នុងវិស័យកាត់ដេរ និង វិស័យទេសចរណ៍ តាមរយៈការបន្ធូរបន្ថយផ្នែកពន្ធនានា និង ការផ្ដល់ប្រាក់ឧបតម្ថសម្រាប់កម្មករនិយោជិតនិងក្រុមគ្រួសារងាយរងគ្រោះជាដើម។
តើរាជរដ្ឋាភិបាល អាចនឹងចេញវិធានការជួយស្តារ និងជំរុញកំណើនសេដ្ឋកិច្ចកម្ពុជា ជុំទី៨ នៅពេលណា?
ឆ្លើយតបទៅនឹងសំនួរនេះត្រូវបាន លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថបានប្រាប់សារព័ត៌មានសេដ្ឋកិច្ច ឌីជីថល ខេមបូណូមីស តាមប្រព័ន្ធតេឡេក្រាមថា លោកមិនទាន់អាចបញ្ជាក់ប្រាប់ពីពេលវេលាច្បាស់លាស់នោះទេ ថាតើរាជរដ្ឋាភិបាលកម្ពុជានឹងចេញវិធានការជុំទី៨នៅពេលណាដែរ ក៏ប៉ុន្តែបើសិនជាក្នុងករណីដែលចេញវិធានការជុំទី៨ ត្រូវបានដាក់ចេញមែននោះ វាក៏មិនខុសពីវិធានការទាំង៧ជុំកន្លងទៅប៉ុន្មានទេ ពីព្រោះការជួយនឹងគ្របដណ្តប់ទៅលើវិស័យដែលរងផលប៉ះពាល់ខ្លាំងជាងគេពីវិបត្តិកូវីដ-១៩ ដូចជាវិស័យទេសចរណ៍ និង វិស័យ កាត់ដេរជាដើម។
ជុំវិញនឹងផលប៉ះពាល់ដោយសារវិបត្តិជំងឺកូវីដ១៩នេះ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា និង ជាអ្នកប្រកបអាជីវកម្មក្នុងវិស័យទេសចរណ៍ បានប្រាប់ខេមបូណូមីសថា ព្រឹត្តិការណ៍សហគមន៍២០កុម្ភៈ បានធ្វើឲ្យវិស័យទេសចរណ៍កាន់មានភាពលំបាកលំបិន អណ្តែតអណ្តូងហូរទៅកាន់តែឆ្ងាយទៅៗហើយ ដែលបញ្ហានេះវាពិបាកនឹងស្រោចស្រង់ខ្លាំងណាស់ ដូច្នេះលោកវណ្ឌី រំពឹងថា វិធានការស្តារ និង ជួយពីរាជរដ្ឋាភិបាលជុំទី៨ នឹងចេញក្នុងពេលពេលឆាប់ៗនេះ ដើម្បីជួយដល់អ្នករងគ្រោះដែលប្រកបរបរអាជីវកម្ម នៅក្នុងវិស័យទេសចរណ៍ អាចមានក្តីសង្ឃឹមបន្តរស់រាន្តមានជីវិតបានមួយកម្រិតទៀត។
អត្ថបទទាក់ទង
ជាមួយគ្នានេះដែរ ធុរកិច្ចជនដ៏ល្បីល្បាញនៅក្នុងវិស័យអប់រំ គឺឧកញ៉ាវេជ្ជបណ្ឌិត គួច ម៉េងលី បានលើកឡើងថា កាលពីអំឡុងពេលផ្ទុះរាលដាលឆ្លងជំងឺកូវីដ១៩ ឆ្នាំ២០២០កន្លង បានដាក់ចេញវិធានការជាច្រើន ដើម្បីជួយដល់វិស័យដែលរងផលប៉ះពាល់ ជាពិសេសអាចជួយដល់វិស័យឯកជនបានមួយកម្រិតដែរ។ ប៉ុន្តែនៅក្នុងឆ្នាំនេះ ពិសេសចាប់តាំងពីផ្ទុះរីករាលដាលឆ្លងព្រឹត្តិការណ៍សហគមន៍២០កុម្ភៈ ប្រមាណជិត ១ខែកន្លងមកនេះ គឺមិនទាន់ឃើញមានការចេញវិធានថ្មី ដើម្បីជួយដល់ផ្នែកឯកជនបន្តទៀតនៅឡើយទេ។ ឧកញ៉ា គួច ម៉េងលី បានបញ្ជាក់ថា វិស័យឯកជនអាចនឹងប៉ះពាល់កាន់តែខ្លាំងទៀត បើមិនមានវិធានការជួយបានទាន់ពេលវេលាពីរដ្ឋាភិបាលនោះទេ។
ដោយឡែក អ្នកជំនួញស្ត្រីដ៏ល្បីមួយនៅក្នុងវិស័យសហគ្រាសខ្នាតតូច និងមធ្យមនៅកម្ពុជា គឺលោកស្រី ឧកញ៉ា កែវ មុំ ក៏បានឲ្យដឹងដែរថា វិធានការរបស់រាជរដ្ឋាភិបាលក្នុងពេលកន្លងមក សម្រាប់សហគ្រាសខ្នាតតូចនិងមធ្យម គឺជួយបានតិចតួចនៅឡើយ ដោយសារតែមានតម្រូវការលក្ខខណ្ឌច្រើនពេក ដែលធ្វើ សហគ្រាសខ្នាតតូច និងមធ្យមខ្លះ មិនអាចបំពេញលក្ខខណ្ឌបាន ដូចនេះលោកស្រី បានស្នើឲ្យមានការបន្ធូរបន្ថយលក្ខខណ្ឌមួយចំនួនផងដែរ។
យ៉ាងណាមិញ បើតាមអ្នកនាំពាក្យក្រសួងសេដ្ឋកិច្ច និង ហិរញ្ញវត្ថុបានបញ្ជាក់អះអាងថា បើទោះបីជាការផ្ទុះរាលដាលឆ្លងព្រឹត្តិការណ៍សហគមន៍លើកនេះ មានសភាពធ្ងន់ធ្ងរជាងមុនក៏ដោយ ក៏ការចេញវិធានការជួយនេះ ស្ថិតនៅក្នុងកញ្ចប់ថវិកាដែលរដ្ឋបានគ្រោងទុក ។
សូមបញ្ជាក់ថា រាជរដ្ឋាភិបាលកម្ពុជាបានដាក់ចេញនូវវិធានការចំនួន៧ជុំរួចហើយក្នុងការជួយដោះស្រាយផលប៉ះពាល់ដោយសារតែបញ្ហាកូវីដ-១៩ តាំងពីឆ្នាំ២០២០មក ក្នុងនោះដែរ បើតាមអ្នកនាំពាក្យក្រសួងសេដ្ឋកិច្ច និង ហិរញ្ញវត្ថុ បានអះអាងថា ថវិកាជាង១ពាន់លានដុល្លារដែលរដ្ឋាភិបាលបានត្រៀមទុកនោះ បានប្រើប្រាស់ជិតអស់ហើយ ខណៈដែលនៅឆ្នាំ២០២១នេះ រដ្ឋាភិបាលបានត្រៀមថវិកាប្រមាណ៨០០លានដុល្លារបន្ថែមទៀតដើម្បីទុកដោះស្រាយបញ្ហាកូវីដ-១៩នេះ។
អ្នកវិភាគសេដ្ឋកិច្ចបានលើកឡើងថា ការស្តារសេដ្ឋកិច្ចជាតិឲ្យល្អប្រសើរឡើងវិញនៅអំឡុងពេលនេះ ឬក្រោយកូវីដ១៩ គឹសុទ្ធតែមិនអាចខ្វះបានពីការបង្កើតឲ្យមាន ក្របខណ្ឌយុទ្ធសាស្ត្រថវិកា និងយុទ្ធសាស្ត្រសម្រាប់គ្រប់គ្រងការវិនិយោគសាធារណៈ ព្រមទាំងសេចក្តីព្រាងច្បាប់ស្តីពីភាពជាដៃគូរវាងរដ្ឋ និង ឯកជន និង ច្បាប់វិនិយោគថ្មីជាដើម ដែលត្រូវនឹងប្រកាសឱ្យប្រើនាពេលខាងមុខនេះ នឹងក្លាយជាឧបករណ៍ដ៏សំខាន់ សម្រាប់ផ្តល់លទ្ធភាពទាំង រដ្ឋ និងឯកជន ដើម្បីបង្កើនការវិនិយោគបន្ថែម ក្នុងការទ្រទ្រង់ស្តារសេដ្ឋកិច្ចជាតិ។
កត្តាសំខាន់មួយទៀត កម្ពុជាក៏ត្រូវចេះប្រើប្រាស់ធនធានមនុស្ស ប្រកបដោយប្រសិទ្ធភាពផងដែរ ដោយម្ខាងបែងចែក និងប្រើប្រាស់ធនធានមនុស្សឱ្យចំទិសដៅ និងម្ខាងទៀតត្រូវលើកកម្ពស់ផលិតភាពតាមរយៈការបង្កើនគុណភាពការអប់រំ និងជំនាញបច្ចេកទេស។ ជាមួយគ្នានេះ កម្ពុជាក៏ត្រូវគ្រប់គ្រង និងប្រើប្រាស់ធនធានធម្មជាតិ ប្រកបដោយភាពឆ្លាតវៃ ដើម្បីបង្កើតតម្លៃឬចំណូលបន្ថែម ដោយម្ខាងធានាឱ្យមាននូវ ចីរភាពខាងផ្នែកបរិស្ថាន និងម្ខាងទៀត ដើម្បីបានផលចំណេញដល់សេដ្ឋកិច្ច៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
