ជុំវិញនឹងភាពល្អប្រសើរនេះបានធ្វើឲ្យកម្មករកម្មការិនីនៅតាមរោងចក្រកាត់ដេរនៅក្នុងព្រះរាជាណាចក្រកម្ពុជាកាន់តែមានក្តីសង្ឃឹមខ្ពស់ ជាមួយនឹងជីវភាពរស់នៅល្អប្រសើរប្រចាំថ្ងៃរបស់ពួកគេផងដែរ។
ហើយជាមួយនឹងប្រាក់ឈ្នួលកាន់តែល្អ បូករួមនឹងអត្ថប្រយោជន៍កាន់តែច្រើន កម្មករកម្មការិនីកំពុងធ្វើការងារតាមរោងចក្រកាត់ដេរនៅក្នុងស្រុក បានអំពាវនាវឲ្យកម្មករដែលបានចំណាកស្រុកទៅធ្វើការនៅក្រៅប្រទេសដោយខុសច្បាប់ ងាកមករកការងារនៅក្នុងប្រទេសរបស់ខ្លួនវិញ។ ត្បិតអី កម្ពុជាបច្ចុប្បន្នពោរពេញទៅដោយរោងចក្រនិងក្រុមហ៊ុនធំៗដែលមានស្តង់ដារការងារល្អៗជាច្រើនកំពុងរង់ចាំពួកគេ។
ការងារក្នុងស្រុកជាជម្រើសល្អជាងការចំណាកស្រុកប្រថុយប្រថានទៅក្រៅប្រទេស
ជាក់ស្តែង សម្រាប់ពលរដ្ឋដែលកំពុងស្វែងរកការងារធ្វើ តំបន់សេដ្ឋកិច្ចពិសេសខេត្តកោះកុងអាចជាជម្រើសល្អជាងការចំណាកស្រុកប្រថុយប្រថានទៅក្រៅប្រទេស។ បើតាមកម្មករនិយោជិតដែលធ្វើការនៅកោះកុង លក្ខខណ្ឌការងារនៅតាមរោងចក្រនៅកោះកុង គឺមានស្ដង់ដារខ្ពស់។ ជាមួយនឹងលក្ខខណ្ឌការងារល្អ កម្មករកម្មការិនីនៅខេត្តកោះកុង បានលើកទឹកចិត្តដល់អ្នកផ្សេងទៀតដែលកំពុងស្វែងរកការងារធ្វើ ឲ្យមកធ្វើការនៅកោះកុង ដោយមិនចាំបាច់ធ្វើចំណាកស្រុកដោយប្រថុយប្រថានទៅកាន់ប្រទេសក្រៅឡើយ។
កញ្ញា ហេង ចន្ទសុមាលី កម្មការិនីរោងចក្រ HANA បាននិយាយថា ធ្វើការនៅរោងចក្រក្នុងតំបន់សេដ្ឋកិច្ចពិសេសខេត្តកោះកុងល្អ ដោយហេតុតែរោងចក្រគេគោរពយកតាមក្របខ័ណ្ឌច្បាប់ការងាររបស់រដ្ឋ គេមានប្រាក់ធ្វើដំណើរ ហើយមានបាយបរិភោគដោយឥតគិតថ្លៃ និងថែមទាំងមានការដឹកជញ្ជូនឥតគិតលុយទៀត។
តំបន់សេដ្ឋកិច្ចពិសេសខេត្តកោះកុង មានក្រុមហ៊ុនជប៉ុន និងក្រុមហ៊ុនបរទេសជាច្រើនមកបោះទុនវិនិយោគ ហើយលក្ខខណ្ឌការងារ ត្រូវគេបានសរសើរថា ល្អ។
តើអ្នកបានអានអត្ថបទនេះឬនៅ?
មិនខុសពីកញ្ញា ហេង ចន្ទសុមាលី នោះទេ កញ្ញា ពេជ្រ ថារណី កម្មការិនី HANA បានអះអាងដែរថា ខ្ញុំទទួលស្គាល់ថា ធ្វើការនៅស្រុកគេ ដូចជា កូរ៉េ ថៃ ម៉ាឡេស៊ី ទទួលបានប្រាក់ខែច្រើន ប៉ុន្តែ ត្រូវគិតថា ការចាយវាយនៅស្រុកគេមិនដូចនៅស្រុកខ្មែរយើងទេ អ្វីៗសុទ្ធតែថ្លៃ ត្រូវបង់ថ្លៃជួលផ្ទះ ទឹកភ្លើង ហូបចុកប្រចាំថ្ងៃ ក៏ថ្លៃដែរ។
កញ្ញា ពេជ្រ ថារណី បន្តយ៉ាងដូច្នេះថា៖ «និយាយទៅ បើតាមខ្ញុំ មិនបាច់ចេញទៅស្រុកគេទេ គឺថាល្មមៗ ធ្វើការនៅក្នុងស្រុកយើងសុវត្ថិភាពល្អបំផុត ធ្វើការនៅស្រុកគេ ត្រូវបែកឆ្ងាយពីក្រុមគ្រួសារ ឪពុកម្តាយ សាច់ញាតិបងប្អូន»។
មិនមែនមានតែរោងចក្រនៅក្នុងតំបន់សេដ្ឋកិច្ចពិសេសខេត្តកោះកុងមួយនោះទេ ដែលមានលក្ខខណ្ឌការងារល្អ ប្រាក់ឈ្នួលសមរម្យ រោងចក្រនៅក្នុងរាជធានីភ្នំពេញ និងនៅតាមបណ្តាខេត្តនានាទូទាំងប្រទេសកម្ពុជា ក៏ល្អប្រសើរដូចគ្នាដែរ។
ហើយភាពល្អប្រសើរនៅក្នុងវិស័យឧស្សាហកម្មរោងចក្រកាត់ដេរកម្ពុជា ត្រូវបានទទួលស្គាល់ពីអង្គការពលកម្មអន្តរជាតិ ILO និងសមាគមរោងចក្រកាត់ដេរកម្ពុជា ដែលបានធ្វើការផ្សព្វផ្សាយឲ្យដឹងថា លក្ខខណ្ឌការងារនៅក្នុងវិស័យរោងចក្រកាត់ដេរនៅកម្ពុជា មានភាពកាន់តែល្អប្រសើរ ដោយសារតែមានរោងចក្រប្រមាណ ៨៥ភាគរយ គោរពតាមច្បាប់ការងារត្រឹមត្រូវ។
តើអ្នកបានអានអត្ថបទនេះ ឬនៅ?
ប្រាក់ឈ្នួលអប្បបរមាកម្មកររោងចក្រកាត់ដេរទាំង៩ប្រទេស
យោងតាមរបាយការណ៍ពីអង្គការពលកម្មអន្តរជាតិ (ILO) បានបង្ហាញថា គិតមកដល់ត្រឹមខែមករា ដើមឆ្នាំ២០១៧ ប្រាក់ឈ្នួលអប្បបរមាកម្មកររោងចក្រកាត់ដេរនៅកម្ពុជា មានចំនួន ១៥៣ដុល្លារ បូករួមនឹងប្រាក់អត្ថប្រយោជន៍ផ្សេងៗ សរុប ១៧០ដុល្លារ។
ប្រាក់ឈ្នួលកម្មករកាត់ដេរនៅកម្ពុជា ខ្ពស់ជាងប្រទេសបង់ក្លាដេស ដែលមានប្រាក់ឈ្នួល ៦៧ដុល្លារ ប្រទេសឡាវ ១១០ដុល្លារ ភូមា ៧៩ដុល្លារ ឥណ្ឌា ១៤៣ដុល្លារ ស្រីលង្ការ ៦៧ដុល្លារ ប៉ាគិស្ថាន ១៣៤ដុល្លារ។
ប៉ុន្តែ ទាបជាងប្រទេសជិតខាង ដូចជា ប្រទេសវៀតណាម ប្រាក់ឈ្នួលអប្បបរមាកម្មករកាត់ដេរមានប្រាក់ឈ្នួល ១៦៥ដុល្លារ និងថៃ ២២៥ដុល្លារ។
តំបន់សេដ្ឋកិច្ចពិសេស Kerry WorldBridge ដែលរំពឹងថា នឹងបង្កើតការងារធ្វើបានរាប់ម៉ឺនកន្លែងដល់ប្រជាជនកម្ពុជា។
មតិលើកឡើងពីក្រុមអ្នកជំនាញជុំវិញសញ្ញាល្អក្នុងវិស័យកាត់ដេរកម្ពុជា
ប្រធានសមាគមរោងចក្រកាត់ដេរកម្ពុជា លោកឧកញ៉ា វ៉ាន់ ស៊ូអៀង បានមានប្រសាសន៍ថា បច្ចុប្បន្ន សម្រាប់លក្ខខណ្ឌការងារក្នុងឧស្សាហកម្មកាត់ដេរ មិនមានអ្វីដែលជាការព្រួយបារម្ភនោះឡើយ បានន័យថា ក្នុងវិស័យនេះ មានរោងចក្រគោរពច្បាប់ការងារច្រើន បើធៀបនឹងបណ្តាឆ្នាំមុនៗ។
លោកឧកញ៉ា វ៉ាន់ ស៊ូអៀង បានអះអាងយ៉ាងដូច្នេះថា ៖ «ខ្ញុំអាចនិយាយបានថា រោងចក្រកាត់ដេរនៅប្រទេសកម្ពុជា បានគោរពលក្ខខណ្ឌការងារប្រមាណ ៨០ភាគរយ តួលេខនេះល្អណាស់ គ្មាននរណាល្អជាងនេះទៀតនោះទេ»។
ជាមួយគ្នានេះដែរ ឯកឧត្តមបណ្ឌិត សុក ស៊ីផាន់ណា ទីប្រឹក្សារដ្ឋាភិបាលកម្ពុជា ក៏បានមើលឃើញភាពប្រសើរឡើងជាបន្តបន្ទាប់ក្នុងវិស័យមួយនេះ ទាំងប្រាក់បៀវត្សរ៍ និងទាំងលក្ខខណ្ឌការងារល្អ។ ឯកឧត្តមបន្តថា កម្ពុជាមានមូលដ្ឋានគ្រឹះរឹងមាំរួចហើយក្នុងវិស័យឧស្សាហកម្មកាត់ដេរនេះ ហើយបានអភិវឌ្ឍវិស័យនេះ ដល់កម្រិតតម្លៃបន្ថែមខ្ពស់។ ឯកឧត្តមបញ្ជាក់ថា កម្ពុជាកំពុងតែបន្តបង្ហាញពីសក្តានុពលរបស់ខ្លួនក្នុងការទាក់ទាញវិនិយោគិន និងក៏បានកំពុងកា្លយជាកន្លែង ដែលត្រជាក់សម្រាប់វិនិយោគិនមកវិនិយោគក្នុងប្រទេសកម្ពុជា ផងដែរ។
តើអ្នកបានអានអត្ថបទនេះ ឬនៅ?
ដើម្បីឆ្លើយតបទៅនឹងគោលនយោបាយឧស្សាហកម្មរបស់រាជរដ្ឋាភិបាល លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើលប៊ី្រដ គ្រុប បានមានប្រសាសន៍ថា ដើម្បីជំរុញវិស័យមួយនេះឲ្យកាន់តែរីកចម្រើន គោលនយោបាយរបស់រាជរដ្ឋាភិបាលកម្ពុជា ក្នុងការអភិវឌ្ឍវិស័យឧស្សាហកម្មឆ្នាំ២០១៥-២០២៥ នឹងផ្តល់ផលប្រយោជន៍ជាច្រើន ដល់ការអភិវឌ្ឍសេដ្ឋកិច្ចជាតិ ជាពិសេស ជួយបង្កើតការងារនិងជំរុញកំណើនប្រាក់ចំណូលរបស់ពលរដ្ឋកម្ពុជា ពីទាបមកចំណូលមធ្យមកម្រិតទាបនាពេលបច្ចុប្បន្ន។
លោកឧកញ៉ា សៀ ឫទ្ធី ដែលជាម្ចាស់តំបន់អភិវឌ្ឍន៍សេដ្ចកិច្ចពិសេស ឃើរី វើលប្រ៊ីដ ផងដែរនោះ បានបញ្ជាក់ទៀតថា គោលនយោបាយជាតិអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ នឹងកែប្រែនិងធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម ទៅជាឧស្សាហកម្មផ្អែកលើជំនាញត្រឹមឆ្នាំ២០២៥ សំដៅផ្លាល់ប្តូរពីឧស្សាហកម្មដែលមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ ដើម្បីលើកកម្ពស់ភាពប្រកួតប្រជែង និងផលិតភាពការងារ។
យោងតាមរបាយការណ៍ពីក្រសួងការងារ សហគ្រាសគ្រឹះស្ថានបានបន្តកើនឡើងជាលំដាប់ ជាក់ស្តែង ឆ្នាំ២០១៦ សហគ្រាសដែលបានចុះបញ្ជីនៅក្រសួងការងារនិងបណ្តុះបណ្តាលវិជ្ជាជីវៈមានចំនួន ១ ម៉ឺន ១ពាន់ ១៦៨គ្រឹះស្ថាន ក្នុងនោះ ឧស្សាហកម្មវាយនភណ្ឌកាត់ដេរ និងផលិតស្បែកជើងមានចំនួន ១ពាន់ ១០៧ ដែលមានកម្មករនិយោជិតចំនួនជាង១លាននាក់ និងបានផ្តល់ការងារដោយប្រយោលដល់ប្រជាពលរដ្ឋប្រមាណ ២លាននាក់។
សម្រាប់ការវិវឌ្ឍនៃឧស្សហកម្មកាត់ដេរ ដែលមានកម្មករប្រមាណជាង ៦០ម៉ឺននាក់ បានរួមចំណែកដល់ប្រាក់ខែកម្មករកាត់ដេរ សរុបប្រមាណ ជា ១៦០លានដុល្លារជារៀងរាល់ខែ៕
None
