នៅថ្ងៃទី១៣ ខែតុលា ឆ្នាំ២០២២ ក្រុមហ៊ុនរថយន្តអគ្គិសនីថ្មីមួយត្រូវបានបង្កើតជាផ្លូវការដោយមានឈ្មោះថា Sony Honda Mobility ដែល Honda និង Sony បានសហវិនិយោគរួមគ្នា ក្នុងចំណែកកាន់កាប់ភាគហ៊ុនម្នាក់ពាក់កណ្តាល។ ការផលិតរថយន្តរបស់ក្រុមហ៊ុនថ្មីនេះ នឹងធ្វើឡើងនៅរោងចក្រ ដែលមានស្រាប់ចំនួន១២កន្លែង របស់ Honda ក្នុងទឹកដីសហរដ្ឋអាមេរិក។
លោក Yasuhide Mizuno ប្រធានក្រុមប្រឹក្សាភិបាលក្រុមហ៊ុនថ្មី Sony Honda Mobility បាននិយាយថា កិច្ចសហការរវាងក្រុមហ៊ុនទាំងពីរ នឹងនាំមកទាំងផ្នែករឹង (Hardware) និងផ្នែកទន់ (Software) រួមគ្នា ដើម្បីផ្តល់ជូនដល់អតិថិជននូវភាពពេញចិត្តជាមួយបទពិសោធន៍ថ្មីៗ។
លោកបន្ថែមថា អាមេរិកត្រូវបានជ្រើសរើសសម្រាប់ការចាប់ផ្តើមរថយន្តអគ្គិសនីដែលកំពុងមានការផលិតយ៉ាងព្រោងព្រៀតនៅទីនោះ បន្ទាប់មក គឺទីផ្សារជប៉ុន និងបន្ដពង្រីកទៅដល់ទីផ្សារអឺរ៉ុបផងដែរ ហើយរថយន្ដដែលផលិតបាន នឹងប្រគល់ដល់ដៃអតិថិជនក្នុងឆ្នាំ២០២៦។
ចំណែកលោក Izumi Kawanishi ប្រធានមន្ត្រីប្រតិបត្តិការ ដែលមកពីក្រុមហ៊ុន Sony ក៏បានលើកឡើងដែរថា តម្រូវការរថយន្តដែលមិនបញ្ចេញផ្សែងបំពុលបរិស្ថាន នឹងកាន់តែកើនឡើងបន្ថែមទៀត ខណៈដែលមានការបារម្ភពីការប្រែប្រួលអាកាសធាតុកាន់តែខ្លាំងឡើង។
សូមរំលឹកថា ក្រុមហ៊ុន Sony និង Honda បានប្រកាសរួមគ្នាកាលពីខែមីនាកន្លងទៅថា ពួកគេនឹងបង្កើតក្រុមហ៊ុនរថយន្តអគ្គិសនីថ្មីមួយជាមួយនឹងទំហំទឹកប្រាក់ប្រមាណ ៦៨លានដុល្លារ ដោយក្រុមហ៊ុននីមួយៗកាន់កាប់ភាគហ៊ុន ៥០% ម្នាក់។
អត្ថបទគួរអាន
សម្ព័ន្ធភាពរវាងក្រុមហ៊ុនទាំងពីរ គឺនឹងប្រើប្រាស់សមត្ថភាពផលិតរថយន្តរបស់ Honda ដូចជាការផលិតតួខ្លួន ការឌីហ្សាញ និងការអភិវឌ្ឍគំរូផលិតកម្ម។ ចំណែក Sony នឹងប្រើជំនាញរបស់ខ្លួនចូលរួមដូចជា បច្ចេកវិទ្យារូបភាព, សេនស័រ, ទូរគមនាគមន៍, បណ្តាញ និងបច្ចេកវិទ្យាប្រព័ន្ធកម្សាន្តនានានៅក្នុងរថយន្ដ។
កាលពីដើមឆ្នាំ២០២២កន្លងទៅ ក្រុមហ៊ុន Sony បានបង្ហាញចេញគំរូរថយន្តអគ្គិសនីមួយជាប្រភេទ SUV គឺម៉ូដែល Vision-S 02។ រថយន្តនេះ បំពាក់ម៉ូទ័រអគ្គិសនី២ រត់ប៉ុង២ ផលិតបានកម្លាំង ៥៣៦សេះ និងមានល្បឿនអតិបរមា ១៨០គីឡូម៉ែត្រក្នុង១ម៉ោង។
រថយន្តអគ្គិសនីរបស់ក្រុមហ៊ុនរួមទុនថ្មីរវាង Sony និង Honda នេះ ត្រូវបានគេមើលឃើញ នឹងប្រកួតប្រជែងក្នុងទីផ្សារ EV ជាមួយក្រុមហ៊ុនធំៗដូចជា Tesla, BYD និង Apple ដែលមានគម្រោងផលិតរថយន្តអគ្គិសនីផ្ទាល់ខ្លួនផងដែរ៕
អត្ថបទ៖ នៅ សំភី
