តើផែនការកាត់បន្ថយការនាំចេញអង្កររបស់វៀតណាមនេះ នឹងជះឥទ្ធិពលយ៉ាងណា ដល់វិស័យស្រូវ-អង្កររបស់កម្ពុជា?
ឧកញ៉ា ចាន់ សុខឃាំង ប្រធានសហព័ន្ធស្រូវ-អង្ករកម្ពុជា នៅតែបង្ហាញនូវគំនិតសុទិដ្ឋិនិយមខ្ពស់ ចំពោះវិស័យស្រូវ-អង្ករកម្ពុជា នាពេលបច្ចុប្បន្ន និងថ្ងៃអនាគត ជាពិសេសក្រោយរដ្ឋាភិបាលនៃប្រទេសវៀតណាម មានបំណងកាត់បន្ថយការនាំចេញអង្កររបស់ខ្លួនពី ៧,១លានតោន ក្នុងឆ្នាំ២០២២ ឱ្យមកនៅត្រឹម ៤លានតោន ក្នុងមួយឆ្នាំវិញត្រឹមឆ្នាំ២០៣០។ ឧកញ៉ា ចាន់ សុខឃាំង បានគូសបញ្ជាក់ដូច្នេះ ផែនការកាត់បន្ថយការនាំចេញអង្កររបស់វៀតណាម ក៏ក្លាយជាសញ្ញាវិជ្ជមានមួយសម្រាប់ទីផ្សារស្រូវ-អង្ករកម្ពុជា ដែលអាចផ្ដល់នូវឱកាសសម្រាប់អង្ករកម្ពុជា កាន់តែបង្ហាញសក្ដានុពលរបស់ខ្លួនលើទីផ្សារអន្តរជាតិ។ បើតាមប្រធានសហព័ន្ធស្រូវ-អង្ករកម្ពុជារូបនេះ ដើម្បីកម្ពុជាអាចចាប់យកនូវឱកាសដ៏ល្អនេះកម្ពុជា គប្បីគិតគូរ និងជំរុញបន្ថែមនូវវិស័យស្រូវ-អង្កររបស់កម្ពុជា ឲ្យកាន់តែល្អប្រសើរ ជាពិសេសផ្ដោតលើកត្តាសំខាន់ៗ មួយចំនួន ដូចជា កត្តាគុណភាពពូជ និងផលិតផល ជាដើម។
អត្ថបទគួរអាន
សម្រាប់ទីផ្សារអង្ករនាឆ្នាំនេះវិញ ប្រធានសហព័ន្ធស្រូវអង្ករកម្ពុជា នៅតែបង្ហាញពីគំនិតសុទិដ្ឋិនិយមខ្ពស់ថា នឹងនៅអាចរក្សាបាននូវភាពវិជ្ជមាន ដោយលោកបញ្ជាក់ថា អង្ករកម្ពុជាបានក្លាយជាទំនិញយុទ្ធសាស្រ្តរបស់សេដ្ឋកិច្ច។ លើសពីនោះ អង្ករក៏ជាទំនិញយុទ្ធសាស្រ្តសម្រាប់ក្នុងតំបន់ និងពិភពលោក ផងដែរ។ ត្រង់ចំណុចនេះហើយ ទើបប្រធានសហព័ន្ធស្រូវអង្ករកម្ពុជា នៅតែបង្ហាញពីភាពវិជ្ជមានសម្រាប់ទីផ្សារអង្ករកម្ពុជា សម្រាប់ឆ្នាំ២០២៣នេះថា នៅតែមានភាពវិជ្ជមាន និងល្អប្រសើរ ទោះបីជាមានជួបបញ្ហាប្រឈមមួយចំនួនដោយសារស្ថានការណ៍ប្រែប្រួលរបស់ពិភពលោកក្ដី។
នៅរយៈពេល ៥ខែក្នុងឆ្នាំ២០២៣នេះ កម្ពុជា បាននាំចេញអង្ករ ជាង ២៧ម៉ឺន៨ពាន់តោន ទៅកាន់ទីផ្សារអន្តរជាតិ។ នេះបើតាមរបាយការណ៍ដែលបង្ហាញដោយឧកញ៉ា ចាន់ សុខឃាំង ដោយលោកបានកត់សម្គាល់ឃើញថា ប្រទេសចិន នៅតែជាទីផ្សារនាំមុខ និងលេចធ្លោរ ជាងគេសម្រាប់ទីផ្សារនាំចេញអង្កររបស់កម្ពុជា នារយៈពេល ៥ខែក្នុងឆ្នាំ២០២៣នេះ ខណៈសហគមអឺរ៉ុបគឺជាទីផ្សារធំទីពីរសម្រាប់ទីផ្សារអង្កររបស់កម្ពុជា៕
