អស់រយៈពេលជាច្រើនឆ្នាំមកហើយ ឧក្រិដ្ឋកម្មស្កេមអនឡាញក្នុងតំបន់ដោយរួមទាំងកម្ពុជាផង ត្រូវបានគេផ្សារភ្ជាប់ទៅនឹងបញ្ហាចន្លោះប្រហោងនៃសមត្ថកិច្ច ភ្នាក់ងារប្រឆាំងការជួញដូរមនុស្ស និងអាជ្ញាធរព្រំដែន។ ប៉ុន្តែនៅពេលនេះ រដ្ឋាភិបាលក្នុងតំបន់បានបង្ហាញឆន្ទៈ និងការប្តេជ្ញាចិត្តផ្នែកនយោបាយយ៉ាងម៉ឺងម៉ាត់ក្នុងការលុបបំបាត់ការគំរាមកំហែងនេះ ទោះជាក្រុមឧក្រិដ្ឋជននៅតែបន្តរកវិធីសាស្ត្របំភាន់ និងប្រឈមមុខតតាំងក៏ដោយ។
តាមសេចក្តីរាយការណ៍ ក្រុមឧក្រិដ្ឋជនកំពុងព្យាយាមប្រើប្រាស់ប្រព័ន្ធធនាគារអន្តរជាតិ រូបិយប័ណ្ណឌីជីថល បណ្តាញទូរគមនាគមន៍ទំនើបៗ និងបណ្តាញជួញដូរ ដែលស្ថិតក្រោមការការពាររបស់ក្រុមប្រដាប់អាវុធ ឬក្រុមដែលមានឥទ្ធិពលនយោបាយ។ មកដល់ពេលនេះ រដ្ឋាភិបាលនានាក្នុងតំបន់អាស៊ាន បាននិងកំពុងយករឿងនេះធ្វើជាអាទិភាពសន្តិសុខជាតិ ដោយសកម្មភាពបង្ក្រាបក្តៅៗត្រូវបានបង្ហាញជាបន្តបន្ទាប់នៅថៃ កម្ពុជា មីយ៉ាន់ម៉ា និងឥណ្ឌូនេស៊ីជាដើម។
អង្គការសហប្រជាជាតិ បានអះអាងថា ឧក្រិដ្ឋកម្មស្កេមអនឡាញ ដែលមានមូលដ្ឋានធំនៅអាស៊ីអាគ្នេយ៍នេះមានទំហំទឹកប្រាក់ដ៏មហាសាល ដោយបង្កើតចំណូលខ្មៅចន្លោះពី៨៨ពាន់លានដុល្លារដល់១១៤ពាន់លានដុល្លារឯណោះ។ តួលេខដ៏ច្រើនលើសលប់នេះបានធ្វើឱ្យក្រុមឧក្រិដ្ឋជនមានលទ្ធភាពហិរញ្ញវត្ថុខ្ពស់ ក្នុងការបង្កើន និងអភិវឌ្ឍសមត្ថភាពបច្ចេកវិទ្យារបស់ពួកគេ ដើម្បីបន្សាំខ្លួនទៅនឹងវិធានការបង្ក្រាបរបស់អាជ្ញាធរ។ បច្ចុប្បន្នក្រុមឧក្រិដ្ឋជនបានឈានទៅប្រើប្រាស់បច្ចេកវិទ្យាបញ្ញាសិប្បនិម្មិត រូបិយប័ណ្ណគ្រីបតូ និងបច្ចេកវិទ្យាក្លែងបន្លំរូបភាព និងសំឡេង ដើម្បីបោកប្រាស់ជនរងគ្រោះកាន់តែស៊ីជម្រៅ និងស្មុគស្មាញជាងមុន៕
ដោយៈ សរ សុជាតិ
