តែយ៉ាងណាមន្ត្រីជាន់ខ្ពស់នៃសមាគមមីក្រូហិរញ្ញវត្ថុអះអាងថា អត្រាអតិថិជនសងយឺតលើសពី៣០ក្នុងរង្វង់ជាង៨%នេះ ស្ថិតក្នុងកម្រិតអាចគ្រប់គ្រងបានមិនទាន់ឈានដល់កម្រិតគួរឱ្យព្រួយបារម្ភនោះទេ។
នៅក្នុងកិច្ចសម្ភាសពិសេសជាមួយខេមបូណូមីស លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា បានឱ្យដឹងថា គិតត្រឹមដំណាច់ឆ្នាំ២០២៤ អត្រាអតិថិជនបង់សងត្រលប់យឺតលើសពី៣០ថ្ងៃក្នុងវិស័យមីក្រូហិរញ្ញវត្ថុ មានក្នុងរង្វង់៨,២% នៃចំនួនអតិថិជនសរុបជាង១,៥លាននាក់។ ការបង់សងត្រលប់យឺតនេះ មានការកើនឡើងប្រមាណ២,៣% បើធៀបនឹងឆ្នាំ២០២៣ ដែលមានប្រមាណជិត៦%។ បើតាមការវាយតម្លៃរបស់អ្នកនាំពាក្យរូបនេះ កត្តាដែលធ្វើឱ្យការបង់សងត្រឡប់យឺតលើសពី៣០ថ្ងៃរបស់អតិថិជនក្នុងវិស័យមីក្រូហិរញ្ញវត្ថុមានការកើនឡើង គឺដោយសារការធ្លាក់ចុះប្រាក់ចំណូលរបស់ពលរដ្ឋ គួបផ្សំសេដ្ឋកិច្ចកម្ពុជា ប្រឈមនឹងភាពមិនច្បាស់លាស់ ដែលបង្កឡើងដោយវិបត្តិជំងឺកូវីដ-១៩ និងបញ្ហាសង្រ្គាមរវាងរុស្ស៊ី និងអ៊ុយក្រែន និងបញ្ហាសកលមួយចំនួនទៀត។
ទោះបីការបង់សងត្រលប់យឺតលើសពី៣០ថ្ងៃមានការកើនឡើងក៏ពិតមែន ប៉ុន្តែលោក កាំង តុងងី អះអាងថា អត្រានេះស្ថិតក្នុងកម្រិតអាចគ្រប់គ្រងបាន ពោលគឺមិនទាន់ឈានដល់កម្រិតគួរឱ្យព្រួយបារម្ភនោះទេ ដោយសារទំហំផ្តល់ប្រាក់កម្ចី និងការទទួលប្រាក់បញ្ញើរបស់គ្រឹះស្ថានមីក្រូហិរញ្ញវត្ថុនៅតែរក្សាបានភាពរឹងមាំ។ ជាក់ស្តែងការផ្តល់ឥណទានរបស់គ្រឹះស្ថានមីក្រូហិរញ្ញវត្ថុ នៅឆ្នាំ២០២៤ សម្រេចបានកំណើនជាង១% និងការទទួលប្រាក់បញ្ញើកើនឡើងជាង១៤%។ គិតត្រឹមដំណាច់ឆ្នាំ២០២៤ ការផ្តល់ឥណទានក្នុងវិស័យមីក្រូហិរញ្ញវត្ថុ បានឈានដល់ជាង៥ពាន់លានដុល្លារអាម៉េរិក។
បើតាមការគូសបញ្ជាក់របស់លោក កាំង តុងងី ការបង់សងត្រឡប់យឺតត្រូវបានបែងចែកទៅតាមកម្រិត ពោលគឺលើសពី៣០ថ្ងៃ ៩០ថ្ងៃ ១៨០ថ្ងៃ និង៣៦៥ថ្ងៃ។ កម្ចីដែលអាចចាត់ទុកថា ជាកម្ចីមិនដំណើរការ ឬកម្ចីខូច លុះត្រាអតិថិជនបង់សងត្រឡប់យឺតលើសពី៣៦៥ថ្ងៃ។ តែយ៉ាងណាបើតាមការអះអាងរបស់លោក កាំង តុងងឺ សមាគមបានតាមដានតាំងពីអតិថិជនសងត្រឡប់យឺតលើសពី៣០ថ្ងៃឡើងទៅម៉្លេះ ដើម្បីចាត់វិធានការទាន់ពេលវេលា៕
អត្ថបទ៖ បូ ដូឡា
