ក្រសួងកសិកម្មនិងអភិវឌ្ឍន៍ជនបទវៀតណាម បានបង្កើតនាយកដ្ឋានថ្មីមួយ ដើម្បីជួយសង្គ្រោះកសិផលរបស់ប្រទេសនេះ។ ទោះបីមានភាពខ្លាំងផ្នែកកសិកម្មក្ដី វៀតណាមប្រើប្រាស់កសិផលរបស់ខ្លួនមិនអស់ទេ។ ភាពខ្សោយផ្នែកផ្សារភ្ជាប់រវាងកសិករនិងឈ្មួញ និងអសមត្ថភាពក្នុងការព្យាករទីផ្សារ បាននាំឲ្យមានការផលិតលើសតម្រូវការ ជាហេតុធ្វើឲ្យកសិករនិងផលិតករប្រឈមនឹងភាពក្ស័យធន។
តាំងពីដើមឆ្នាំនេះមកម្ល៉េះ អាជ្ញាធរបានអំពាវនាវឲ្យប្រជាជនមូលដ្ឋានជួយទិញកសិផលដែលសល់គរចោល ដូចជា ចេក ឪឡឹក និងសាច់ជ្រូក ជាដើម។
ជាដំណោះស្រាយ នាយកដ្ឋានថ្មីរបស់ក្រសួងកសិកម្មនិងអភិវឌ្ឍន៍ជនបទ នឹងផ្ដល់ការព្យាករទីផ្សារ និងតាមដានការប្រើប្រាស់ផលិតផលពីកសិដ្ឋានក្នុងស្រុក រួចហើយសម្របសម្រួលជាមួយទីភ្នាក់ងារពាក់ព័ន្ធ ដើម្បីរក្សាបាននូវតុល្យភាពរវាងការផ្គត់ផ្គង់និងតម្រូវការ ព្រមទាំងធ្វើការជាមួយក្រសួងពាណិជ្ជកម្មដើម្បីគ្រប់គ្រងការនាំចូល និងការនាំចេញ។
ក្នុងពេល៣០ឆ្នាំកន្លងមកនេះ វៀតណាមបានប្រែក្លាយខ្លួនពីប្រទេសហូបមិនគ្រប់ មកជាប្រទេសនាំចេញស្បៀងអាហារដ៏ធំមួយ។ ឆ្នាំ២០១៦ វៀតណាមរកចំណូលបានពីការនាំចេញផលិតផលកសិកម្ម ព្រៃឈើ និងជលផល ចំនួន ៣២ពាន់លានដុល្លារ។
ប៉ុន្តែ ប្រទេសវៀតណាមជួបបញ្ហាប្រឈមចំនួន ៣ គឺទីមួយ កសិករវៀតណាមប្រមាណ ១០លានគ្រួសារ នៅមានកម្រិតផលិតភាពកសិកម្មទាបនៅឡើយ បើធៀបនឹងកម្រិតក្នុងតំបន់និងពិភពលោក។ ទីពីរ វៀតណាមស្ថិតក្នុងចំណោមប្រទេស៥នៅលើពិភពលោកដែលរងគ្រោះខ្លាំងបំផុតពីការប្រែប្រួលអាកាសធាតុ ជាពិសេស ក្នុងវិស័យកសិកម្ម។ ទីបី ក្នុងយុគសម័យសមាហរណកម្ម វៀតណាមប្រឈមនឹងការប្រកួតប្រជែងយ៉ាងខ្លាំងក្លាពីក្រៅប្រទេស។
ដើម្បីដោះស្រាយបញ្ហាទាំងនេះ ក្រសួងកសិកម្មវៀតណាមប្រកាសថា នឹងកែទម្រង់រចនាសម្ព័ន្ធវិស័យកសិកម្ម និងផ្ដោតច្រើនថែមទៀតទៅលើការកែច្នៃ និងការរកទីផ្សារ៕
