លោកស្រី ម៉េង វ៉ានចូវ ដែលជាកូនស្រីបង្កើតរបស់ស្ថាបនិកក្រុមហ៊ុនបច្ចេកវិទ្យា Huawei ត្រូវបានអនុញ្ញាតឲ្យត្រលប់ទៅផ្ទះ បន្ទាប់ពីបញ្ចប់ការកាត់ក្តីកាលពីថ្ងៃសុក្រ ទី ២៤ កន្លងទៅនេះ ដោយមានការលុបចោលនូវ បត្យាប័នសវនាការរបស់លោកស្រី នៅអាមេរិក ពោលគឺត្រូវបញ្ជូនអ្នកទោស ទៅកាន់ប្រទេសដើមវិញ។
បញ្ហានេះ គឺប្រភពកណ្តាលនៃភាពមិនចុះសម្រុងគ្នារវាង រដ្ឋាភិបាលចិន និងរដ្ឋាភិបាលអាមេរិក ដោយមន្ត្រីចិន បានផ្តល់សញ្ញាថា ករណីនេះចាំបាច់ត្រូវតែទម្លាក់ចោល ដើម្បីបញ្ចប់ភាពជាប់គាំងផ្នែកការទូត។
បើតាមសារព័ត៌មាន Nikkei Asia បានលើកឡើងថា សារព័ត៌មានរបស់ប្រទេសចិន ផ្សាយអំពីការវិលត្រលប់នៃលោកស្រី ម៉េង មកកាន់ប្រទេសចិន តែពុំបានផ្សាយអំពី ការដោះស្រាយជនជាតិកាណាដា ២រូប ជាការដោះដូរនោះទេ ដោយនាយករដ្ឋមន្ត្រីជាអ្នកទទួលពួកគេដោយផ្ទាល់ និងអះអាងថា ពួកគេត្រូវបានដោះលែង ក្នុងរយៈពេលប៉ុន្មានម៉ោង ក្រោយការដោះលែងលោកស្រី ម៉េង។
សារព័ត៌មានចិន CCTV បានឲ្យដឹងដែរថា ជើងហោះហើររបស់នាយកប្រតិបត្តិក្រុមហ៊ុន Huawei មួយនេះ បានហោះតាមគន្លងប៉ូលខាងជើង ដើម្បីជៀសចេញពីដែនអាកាសរបស់សហរដ្ឋអាមេរិក ហើយនៅពេលមកដល់ប្រទេសចិន លោកស្រី ម៉េង និយាយទាំងទឹកភ្នែកថា បើសិនជាគ្មានមាតុភូមិដ៏រឹងម៉ាំនេះទេ លោកស្រីប្រហែលជាគ្មានសេរីភាពដូចពេលនេះទេ។
រម្លឹកបន្តិចថា លោកស្រី ម៉េង ត្រូវបានចាប់ខ្លួន កាលពីខែធ្នូ ឆ្នាំ ២០១៨ ក្នុងប្រទេសកាណាដា បន្ទាប់ពីរដ្ឋាភិបាលអាមេរិក ចេញប្រកាសចាប់ខ្លួន ដោយអះអាងថា លោកស្រី ព្យាយាមលាក់បាំងនូវ បណ្តាញក្រុមហ៊ុន Huawei ដែលលក់ឧបករណ៍ទៅកាន់ប្រទេសអឺរ៉ង់ បំពានការដាក់ទណ្ឌកម្មរបស់អាមេរិក។
អ្នកនាំពាក្យក្រសួងការបរទេសចិន បានលើកឡើងថា ការចោទប្រកាន់ទៅលើ លោកស្រី ម៉េង គឺជារឿងប្រឌិត ដើម្បីដាក់សម្ពាធទៅលើ វិស័យឧស្សាហកម្មបច្ចេកវិទ្យាទំនើបរបស់ប្រទេសចិន ហើយសកម្មភាពរបស់អាមេរិក និងកាណាដា គឺជាការឃុំខ្លួនទៅតាមអំពើចិត្តរបស់ពួកគេ។
គួរជម្រាបថា ក្រុមហ៊ុន Huawei ក៏បានចេញសេចក្តីប្រកាសដែរថា នឹងរង់ចាំលោកស្រី ម៉េង ត្រលប់មកផ្ទះ និងជួបជុំគ្រួសារដោយសុវត្ថិភាព ហើយក្រុមហ៊ុននឹងបន្តការពារខ្លួនប្រឆាំងនឹងការចោទប្រកាន់របស់ អាមេរិក៕
