បន្ទាប់ពីបានធ្វើជាប្រធានអាស៊ានចំនួន២លើករួចមក ពោលគឺ លើកទី១នៅឆ្នាំ២០០២ និងលើកទី២នៅឆ្នាំ២០១២ ឥឡូវនេះ កម្ពុជាកំពុងត្រៀមខ្លួនធ្វើជាប្រធានអាស៊ានជាលើកទី៣ ហើយព្រឹត្តិការណ៍នេះ វាជាឱកាសដែលកម្ពុជាអាចបង្ហាញពីសមត្ថភាពខាងធនធានមនុស្ស និងហិរញ្ញវត្ថុក្នុងការរៀបចំព្រឹត្តិការណ៍អន្តរជាតិធំៗ បែបនេះ ហើយព្រឹត្តិការណ៍ទាំងនេះ អាចរៀបចំទៅបានវាក៏ត្រូវមានការចូលរួមពីសុខសន្ដិភាព និងស្ថិរភាពនយោបាយដែលកម្ពុជាកំពុងមាននាពេលសព្វថ្ងៃនេះផងដែរ។
តើក្នុងនាមជាប្រធានអាស៊ាននៅឆ្នាំនេះ កម្ពុជានឹងផ្ដោតទៅលើការដោះស្រាយបញ្ហាអ្វីខ្លះ?
បើតាមសុន្ទរកថា របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាដែលបានថ្លែងសម្រាប់អង្គមហាសន្និបាតអង្គការសហប្រជាជាតិលើកទី ៧៦ កាលពីថ្ងៃទី ២៥ ខែកញ្ញាឆ្នាំ២០២១បានឲ្យដឹងថា ក្នុងនាមជាប្រធានអាស៊ាននៅឆ្នាំក្រោយនេះ កម្ពុជានឹងព្យាយាមដោះស្រាយបញ្ហាប្រឈមរួមនៅក្នុងតំបន់។ ក៏ប៉ុន្ដែ សម្តេច តេជោ មិនបានបញ្ជាក់លម្អិតថា បញ្ហាប្រឈមទាំងនោះមានអ្វីខ្លះនោះទេ។
អត្ថបទគួរអាន
យ៉ាងណាក៏ដោយចុះ បើតាមនាយករដ្ឋមន្ត្រីកម្ពុជា ជាមួយនឹងសាមគ្គីភាពដ៏រឹងមាំ រវាងប្រទេសសមាជិកអាស៊ាន និងការគាំទ្រពីដៃគូខាងក្រៅ កម្ពុជានឹងបន្ដជំរុញដំណើរការកសាងសហគមន៍អាស៊ាន និងថែរក្សាតួនាទីរបស់អាស៊ាន ដែលជាតំបន់ដ៏មានសារៈសំខាន់សម្រាប់ពាណិជ្ជកម្ម, ការវិនិយោគ និងខ្សែច្រវ៉ាក់ផ្គត់ផ្គង់របស់ពិភពលោក។ បន្ថែមពីនេះទៀត កម្ពុជានឹងបន្ដជំរុញការកសាងសហគមន៍អាស៊ានមួយដែលប្រកបដោយភាពរស់រវើក និងសុខដុមរមនា ជាមួយនឹងការការពារដល់ពលករចំណាកស្រុក, របៀបវារៈការអភិវឌ្ឍ ដែលមានភាពបៃតង និងបរិយាប័ន្ន ការធ្វើបរិវត្តកម្មឌីជីថល ការអភិវឌ្ឍសិប្បកម្ម និងសហគ្រាសធុនតូច និងមធ្យម ក៏ដូចជាការលើកកម្ពស់សហគ្រិនភាពរបស់ស្ត្រី និងយុវ័យ។
របាយការណ៍ពីក្រសួងពាណិជ្ជកម្មកម្ពុជាបានបង្ហាញថា កាលពីឆ្នាំ២០២០ទំហំពាណិជ្ជកម្មកម្ពុជា និងប្រទេសជាសមាជិកអាស៊ាន សម្រេចបានជាង១១ពាន់លានដុល្លារ កើនឡើងជាង២២% ធៀបនឹងឆ្នាំ២០១៩។ ការដោះដូរពាណិជ្ជកម្មភាគច្រើនរបស់កម្ពុជា គឺជាមួយនឹងប្រទេសជាប់ព្រំដែនរួមមានថៃ និងវៀតណាម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
