សម្ដេច ហ៊ុន សែន បានបញ្ជាក់ថា មានអ្នកបង្ហោះលើបណ្ដាញសង្គមហ្វេសប៊ុក និងមន្ត្រីរដ្ឋាភិបាលផង បានផ្ញើសារទៅក្នុងបណ្ដាញទំនាក់ទំនងរបស់សម្ដេច ដូចជា Whatapp និង Telegram ជាមួយ ក្នុងគោលបំណងឲ្យដកតំណែងអ្នកនេះ អ្នកនោះ តែសម្ដេចថា នេះ ជាពេលវេលាគិតពីរឿងសំខាន់ក្នុងការជួយសង្គ្រោះជីវិតពលរដ្ឋមិនមែនជាពេលគិតគូរពីអ្នកណាខុស អ្នកណាត្រូវនោះឡើយ។
សម្តេច ហ៊ុន សែន មានប្រសាសន៍ថា««នៅពេលដែលកើតរឿងភ្លាម មានអ្នកបង្ហោះតាមហ្វេសប៊ុក ហើយក៏មានអ្នកវាយសារ ចូលមកក្នុង Whatapp និង Telegram របស់ខ្ញុំ ធ្វើការស្ដីបន្ទោសអ្នកនេះ ស្ដីបន្ទោសអ្នកនោះ ត្រូវការដកអ្នកនេះ ត្រូវការដកអ្នកនោះ ក្នុងពេលដែលយើង ជាប់ជំពាក់ក្នុងអ្វីដែលជាការគិតធំបំផុត គឺបញ្ហាសង្គ្រោះអាយុជីវិតរបស់ពលរដ្ឋរបស់យើង។ មិនមែនជាបញ្ហាត្រូវរករឿងអ្នកណាខុសអ្នកណាត្រូវ នៅពេលនោះទេ នេះជារឿងនៅពេលក្រោយ។ ក៏ប៉ុន្ដែ ខ្ញុំអាចបញ្ជាក់ក្នុងការជៀសវាងនូវការសង្ស័យណាមួយ អភិបាលខេត្តកែប និងមន្ត្រីមិនត្រូវបានដកចេញពីតំណែងទេ»។
អត្ថបទទាក់ទង!
សម្ដេច ហ៊ុន សែន ក៏បានព្រមាននឹងពិនិត្យទៅលើមន្ត្រីក្នុងជួរដ្ឋាភិបាលមួយចំនួនដែលបានបង្ហោះសារលើហ្វេសប៊ុក និងអ្នកផ្ញើសារមកសម្ដេច ក្នុងគោលបំណងឲ្យដកតំណែងអភិបាលខេត្តកែបផងដែរ។
សម្តេច ហ៊ុន សែនបានគូសបញ្ជាក់ទៀតថា ការរលំបាក់អគារនេះ វាមិនមែនមានតែនៅកម្ពុជា នៅបណ្ដាប្រទេសជាច្រើនក៏មានដែរ តែមិនដែលឃើញមានការដកតំណែងអភិបាលខេត្ត ឬក្រុងនៅប្រទេសទាំងនោះទេ។ សម្តេច បន្តថា កំហុសធំគឺដោយសារតែការសាងសង់ខុសបច្ចេកទេសរបស់មេការសំណង់ ប៉ុន្ដែយ៉ាងណាមេការសំណង់និងកូនរបស់គាត់ក៏បានបាត់បង់ជីវិតក្នុងហេតុការណ៍នេះដែរ។
សម្តេចហ៊ុន សែនមានប្រសាសន៍ដូច្នេះ «បឋមវិភាគលើបច្ចេកទេស៖ ទីមួយ សសៃដែកតូចជាងស្តង់ដារ; ទីពីរ ក្តារពុម្ព ដកមុនកំណត់ ប្រហាក់ប្រហែលតែជាងដប់ថ្ងៃ! តែមេការសំណង់និងកូនប្រុសបានស្លាប់ក្នុងកម្ទេចសំណង់»
សូមជម្រាបថា ក្រោយពីបានបិទបញ្ចប់ការរុករកក្រុមរុករកបានរកឃើញ អ្នករងគ្រោះក្នុងឧបទ្ទវេហេតុនេះ ចំនួន ៥៩នាក់ ក្នុងនោះ អ្នកស្លាប់មានចំនួន ៣៦ នាក់អ្នកដែលរស់រានមានជីវិតចំនួន ២៣នាក់។
ក្នុងនោះដែរ អ្នករបួសម្នាក់ៗទទួលបានថវិការបស់រដ្ឋាភិបាលចំនួន ១ម៉ឺនដុល្លារ និងអ្នករបួស ៧នាក់ដែលជាករណីពិសេសចុងក្រោយទទួលបានថវិកា ២ ម៉ឺនដុល្លារ,សាកសពទទួលបានម្នាក់ ៥ ម៉ឺនដុល្លារអាមេរិក និងថវិកាធ្វើបុណ្យចំនួន ១០លានរៀល។
មកទល់នឹងម៉ោង១២ថ្ងៃត្រង់ថ្ងៃទី ០៥ មករានេះ រដ្ឋាភិបាលបានទទួលថវិកាឧបត្ថម្ភពីសប្បុរសជនចំនួន 1,៧ លានដុល្លាអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
