ដោយមានបញ្ហាឧបទ្ទវហេតុដ៏រន្ធត់ ការរលំអគារបាក់សង្កត់មនុស្សស្លាប់ និងរបួសរាប់សិបនាក់នៅក្នុងក្រុងព្រះសីហនុនេះ មានមតិមហាជនជាច្រើននៅតាមបណ្ដាញសង្គមហ្វេសប៊ុក ក៏បានរិះគន់ការគ្រប់គ្រងរបស់លោក យន្ដ មីនយ៉ាងចាស់ដៃផងដែរ និងស្នើដល់រាជរដ្ឋាភិបាលឲ្យដកដំណែងអភិបាលខេត្តរូបនេះ។
នៅរសៀល ថ្ងៃទី ២៤នេះ សម្ដេច ហ៊ុន សែន បានបញ្ជាក់លើទំព័រហ្វេសបរបស់ខ្លួនថា លោក យន្ដ មីណបានទទួលស្គាល់កំហុសរបស់ខ្លួន ដែលបានបណ្ដាលឲ្យមានរឿងឈឺចាប់នៅក្នុងដែនគ្រប់គ្រងរបស់ខ្លួន ហើយបានស្នើសម្ដេច លាលែងពីតំណែងជាអភិបាលខេត្តព្រះសីហនុ។
អត្ថបទទាក់ទង!
សម្តេចបានលើកឡើងយ៉ាងដូច្នេះ «ក្នុងពេលបំពេញការងារនៅខេត្តព្រះសីហនុ ឯកឧត្តម យន្ត មីន អភិបាលខេត្តព្រះសីហនុបានទទួលស្គាល់កំហុសលើការគ្រប់គ្រងក្នុងដែនសមត្ថកិច្ចរបស់ខ្លួន ដែលបណ្តាលអោយមានរឿងឈឺចាប់កើតឡើង។ គាត់បានស្នើមកខ្ញុំដើម្បីលាលែងចេញពីអភិបាលខេត្តព្រះសីហនុ។ ខ្ញុំបានយល់ព្រមអោយគាត់លាលែងនិង បានពិភាក្សាជាមួយ សម្តេច ស ខេង យកឯកឧត្តម គួច ចំរើន ពីអភិបាលខេត្តកំពង់ចាម មកធ្វើជាអភិបាលខេត្តព្រះសីហនុវិញ។»
ទោះយ៉ាងណា សម្តេច បញ្ជាក់ថា លោក យន្ដ មីននៅតែបន្តយុទ្ធនាការរុករក និងសង្គ្រោះជនរងគ្រោះតទៅទៀត រហូតដល់ចប់កិច្ចការ និងអភិបាលខេត្តថ្មីចូលកាន់តំណែង។
បើតាមការ បញ្ជាក់ ពីសម្ដេច ហ៊ុន សែន មិនមែនតែមានការបញ្ចប់តំណែងអភិបាលខេត្តព្រះសីហនុ នោះទេ សម្តេចក៏បានសម្រេចចិត្តដក ឯកឧត្តម ញឹម វណ្ណដា ចេញពីតំណែងជាទេសរដ្ឋមន្ត្រី និងជាអនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយដោយមូលហេតុខ្វះការទទួលខុសត្រូវ និងភូតភរ៕
None
