របាយការណ៍ដែលរៀបចំដោយក្រសួងសន្តិសុខសាធារណៈ និងក្រសួងសន្តិសុខរដ្ឋចិនបានវិភាគថា តើនឹងមានអ្វីកើតឡើងប្រសិនបើសហរដ្ឋអាមេរិក អឺរ៉ុប និងជប៉ុន ប្រមូលគ្នាដាក់ទណ្ឌកម្មលើប្រទេសចិន ដូចដែលពួកគេបានធ្វើចំពោះប្រទេសរុស្ស៊ី ជុំវិញការឈ្លានពានលើអ៊ុយក្រែន។ របាយការណ៍នេះបានបញ្ជាក់ច្បាស់ៗថា ប្រសិនបើសហរដ្ឋអាមេរិក និងសម្ព័ន្ធមិត្តដាក់ទណ្ឌកម្មមក នោះចិននឹងត្រលប់ទៅរកសេដ្ឋកិច្ចផែនការ ហើយបិទទ្វារពីទីផ្សារពិភពលោកដូចកាលពីច្រើនទសវត្សមុនដូច្នេះដែរ។ នេះបើតាមសេចក្ដីរាយការណ៍ដោយសារព័ត៌មានជប៉ុន Nikkei។
អ្វីដែលរដ្ឋចិនបារម្ភបំផុតនោះ គឺវិបត្តិស្បៀងអាហារ ដែលជាចំណុចខ្សោយមួយរបស់ខ្លួន។ ប្រសិនបើការនាំចេញ និងការនាំចូលរបស់ចិនត្រូវបានរំខានដោយសារការដាក់ទណ្ឌកម្មរបស់បស្ចិមប្រទេស ប្រាក់ចំណូលរបស់ចិនដែលបានពីក្រៅប្រទេសនឹងរលាយបាត់ ហើយទំនិញសំខាន់ៗនឹងបិទលែងឱ្យនាំចូល។
ជាក់ស្តែង ការបញ្ឈប់ការនាំចូលសណ្តែកសៀងមួយមុខក្នុងចំណោមរបស់សំខាន់ៗផ្សេងទៀត នឹងប៉ះពាល់ដល់ចិនយ៉ាងខ្លាំង ដោយសារប្រទេសនេះពឹងផ្អែកលើសហរដ្ឋអាមេរិកសម្រាប់នាំចូល ៣០% នៃការនាំចូលសណ្តែកសៀងសរុបរបស់ខ្លួន។ ចិនជាប្រទេសធ្វើកសិកម្មដ៏ធំពិតមែន ប៉ុន្តែធាតុពិតការដាំដុះនិងផ្គត់ផ្គង់សណ្តែកសៀងក្នុងស្រុកមានតិចជាង២០%ប៉ុណ្ណោះ។
លើសពីនេះ សណ្តែកសៀងមិនគ្រាន់តែប្រើប្រាស់ក្នុងការផលិតជាប្រេងសម្រាប់ចំអិនអាហារប៉ុណ្ណោះទេ តែវាក៏ជាចំណីក្នុងការចិញ្ចឹមជ្រូកផងដែរ។ សាច់ជ្រូកតំណាងឱ្យ ៦០% នៃសាច់ដែលប្រើប្រាស់ក្នុងម្ហូបអាហារសរុបនៅក្នុងប្រទេសចិន។ ប្រសិនបើការផ្គត់ផ្គង់សណ្តែកសៀងទៅប្រទេសចិនត្រូវបានបញ្ឈប់ប្រជាជនទាំង ១,៤ពាន់លាននាក់នឹងប្រឈមមុខបញ្ហាស្បៀងអាហារភ្លាមៗ។
អត្ថបទគួរអាន
ខ្វះខាតស្បៀងអាហារសំខាន់នឹងជំរុញឱ្យតម្លៃរបស់វាលើទីផ្សារកើនឡើង ហេតុនេះវានឹងជំរុញឱ្យការចំណាយរបស់ពលរដ្ឋកើនខ្ពស់ដូចគ្នាដែរ។ មែនទែនទៅ សន្ទស្សន៍តម្លៃទំនិញប្រើប្រាស់នៅចិនបានកើនឡើងរួចទៅហើយនៅក្នុងឆ្នាំនេះ បើធៀបនឹងកំណើនកាលពីឆ្នាំមុន ពោលគឺវាបានកើនឡើងចន្លោះពី ២០% ទៅ ៣០%។
របាយការណ៍ដដែលបានសរុបជារួម ដោយប៉ាន់ស្មានថា ពាណិជ្ជកម្មដែលមានតម្លៃទឹកប្រាក់សរុបចំនួន២,៦១ទ្រីលានដុល្លារ នឹងត្រូវបាត់បង់ចេញពីសេដ្ឋកិច្ចពិភពលោក ប្រសិនបើតៃវ៉ាន់ពិតជាត្រូវវាយប្រហារដោយប្រទេសចិន ហើយប្រទេសលោកខាងលិចបានដាក់ទណ្ឌកម្មលើចិនមែននោះ។ ចំនួននេះស្មើនឹងប្រមាណ ៣% នៃផលិតផលក្នុងស្រុកសរុបរបស់ពិភពលោកទៅហើយ ខណៈដែលចិនអាចនឹងរងគ្រោះខ្លាំងជាងរុស្ស៊ីទៅទៀត ដោយហេតុថា GDP របស់ចិនគឺធំជាងរុស្ស៊ីដល់ទៅ ១០ដង។
ដោយឡែក បើផ្អែកលើការវិភាគដែលបានប្រើប្រាស់ទិន្នន័យកាលពីឆ្នាំ២០១៨ ប្រសិនបើការនាំចេញរបស់ចិនទៅជប៉ុន ទៅអាមេរិកនិងអឺរ៉ុប ត្រូវផ្អាក វានឹងធ្វើឱ្យចិនខាត ១,៦ទី្រលានដុល្លារពីសេដ្ឋកិច្ចរបស់ខ្លួន។ បរិមាណនេះ មានសេចក្តីថា ចិននិងបាត់បង់ប្រមាណ ៧,៦% នៃផលិតផលក្នុងស្រុករបស់ខ្លួន។ នេះគេនៅមិនទាន់រាប់បញ្ចូល បើសិនជាប្រទេសសមាជិកអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ (OECD) ទាំង៣៨ប្រទេសត្រូវប្រឈមមុខជាមួយចិនទៀត នោះផលប៉ះពាល់នឹងកាន់តែធំធេង។
ទោះយ៉ាងណា ដូចបានដឹងស្រាប់ហើយថា ទណ្ឌកម្មដែលភាគីម្ខាងបានដាក់លើភាគីម្ខាង រមែងជះផលប៉ះពាល់ត្រឡប់មកខ្លួនឯងវិញ។ ជាក់ស្តែងបើតាមការវិភាគ ប្រទេសជប៉ុននឹងទទួលរងការខាតបង់ធំជាងគេ គិតជាភាគរយនៃGDP ពោលគឺខាតបង់ច្រើនជាង សហរដ្ឋអាមេរិក និងអឺរ៉ុបទៅទៀត។ ប្រសិនបើការនាំចេញរបស់ជប៉ុនទៅកាន់ប្រទេសចិនត្រូវបានបញ្ឈប់ នោះទំហំសេដ្ឋកិច្ចជប៉ុននឹងធ្លាក់ចុះចំនួន ១៩០ពាន់លានដុល្លារ ឬស្មើនឹង ៣,៧% នៃផលិតផលក្នុងស្រុកសរុប ខណៈអឺរ៉ុបនឹងបាត់បង់ ២,១% នៃGDP រីឯអាមេរិកនឹងទទួលរងផលប៉ះពាល់ ១,៣%។
សូមបញ្ជាក់ថា មិនត្រឹមតែប្រទេសនីមួយៗដែលនឹងរងប៉ះពាល់នោះទេ សូម្បីតែក្រុមហ៊ុន និងបុគ្គលដែលមានឥទ្ធិពលទាំងអស់ក៏ត្រូវរងគ្រោះដូចគ្នាដែរ ដោយហេតុថា បុគ្គលនឹងក្រុមហ៊ុនទាំងនោះសុទ្ធតែមានការរកស៊ី ជាប់ពាក់ព័ន្ធនឹងប្រទេសចិនតាមគ្រប់មធ្យោបាយផ្សេងៗ៕
