អាម៉េរិកដាក់ទណ្ឌកម្មបុគ្គលនិងស្ថាប័នរុស្ស៊ីចំនួន៥០០ នៅថ្ងៃខួប២ឆ្នាំនៃសង្គ្រាមនៅអ៊ុយក្រែន

ក្រសួងហិរញ្ញវត្ថុនិងក្រសួងការបរទេសអាម៉េរិក បាននិយាយកាលពីពេលថ្មីៗថា គោលដៅដែលត្រូវរងទណ្ឌកម្មទាំងនេះរួមមានស្ថាប័ន និងវិស័យមួយចំនួនរបស់រុស្ស៊ី ដូចជាប្រព័ន្ធទូទាត់ប្រាក់មៀ (Mir) របស់រុស្ស៊ី ស្ថាប័នហិរញ្ញវត្ថុ និងមូលដ្ឋានឧស្សាហកម្មយោធា ការគេចវេសពីទណ្ឌកម្ម និងការផលិតថាមពលនាពេលអនាគត ហើយក៏នឹងរួមបញ្ចូលទាំងមន្ត្រីមួយចំនួនដែលជាប់ពាក់ព័ន្ធនឹងការស្លាប់របស់លោក ណាវ៉ាលនី ផងដែរ។

លោក ចូ បៃដិន ប្រធានាធិបតីអាម៉េរិក បាននិយាយថា ក្រុងវ៉ាស៊ីនតោនក៏បានរឹតបន្តឹងលើការនាំចូលទៅលើស្ថាប័នចំនួនជិត១០០ ដែលផ្ដល់ការគាំទ្រដល់ប្រទេសរុស្ស៊ី និងចាត់វិធានការ ដើម្បីកាត់បន្ថយទុនបម្រុងថាមពលរបស់រុស្ស៊ី។ កញ្ចប់ទណ្ឌកម្មនេះបានតំណាងឱ្យការពិន័យដ៏ធំបំផុតរបស់សហរដ្ឋអាម៉េរិក ចាប់តាំងពីរុស្ស៊ីបានឈ្លានពានអ៊ុយក្រែននៅថ្ងៃទី២៤ ខែកុម្ភៈ ឆ្នាំ២០២២ ហើយទណ្ឌកម្មនេះ ក៏បានផ្តោតលើពាណិជ្ជកររុស្ស៊ីមួយចំនួនរួមទាំងប្រធានធនាគារ VTB ដែលគ្រប់គ្រងដោយរដ្ឋ និងជាធនាគារធំបំផុតទីពីររបស់រុស្ស៊ីផងដែរ។

អនុរដ្ឋមន្ត្រីក្រសួងហិរញ្ញវត្ថុអាម៉េរិក លោក វ៉ល់លី អាដេយ៉េម៉ូ (Wally Adeyemo) បានលើកឡើងថា ទណ្ឌកម្មនេះក៏នឹងត្រូវធ្វើឡើងក្នុងភាពជាដៃគូជាមួយនឹងប្រទេសដទៃទៀតដែលចង់បន្តដាក់សម្ពាធលើរុស្ស៊ីជុំវិញសង្គ្រាមរបស់ខ្លួនទៅលើប្រទេសអ៊ុយក្រែនដើម្បីកាត់ផ្ដាច់រុស្ស៊ីចេញពីសេដ្ឋកិច្ចសកលផងដែរ​។

ជាក់ស្ដែងកាលពីថ្ងៃសុក្រសប្ដាហ៍មុន សហភាពអឺរ៉ុប បានប្រកាសពីកញ្ចប់ទណ្ឌកម្មទី១៣របស់ខ្លួនប្រឆាំងនឹងប្រទេសរុស្ស៊ី ដោយហាមឃាត់ស្ថាប័ន និងបុគ្គលចំនួនជិត២០០ដោយចោទពួកគេថា បានពាក់ព័ន្ធនឹងជម្លោះដែលមានរយៈពេល២ឆ្នាំមកនេះ។

ប្រធានគោលនយោបាយការបរទេសរបស់សហភាពអឺរ៉ុប លោក ចូសេហ្វ បូរែល (Josep Borrell) បាននិយាយថា ឥឡូវពួកគេកំពុងបន្តឹងវិធានការរឹតត្បិតថែមទៀតទៅលើវិស័យ យោធា និងការពារជាតិរបស់រុស្ស៊ី ហើយពួកគេនៅតែប្ដេជ្ញាចិត្តរួមគ្នាក្នុងការកម្ទេចក្បាលម៉ាស៊ីនសង្គ្រាមរបស់រុស្ស៊ី និងជួយអ៊ុយក្រែនឱ្យឈ្នះការប្រយុទ្ធដោយស្របច្បាប់សម្រាប់ការការពារខ្លួន៕

អត្ថបទ៖ សុខ ជា