IMFព្យាករថា ប្រទេសចិន និងឥណ្ឌា រួមចំណែកពាក់កណ្ដាលនៃកំណើនសេដ្ឋកិច្ចសកលឆ្នាំ២០២៣

តាមការព្យាកររបស់ IMF កាលពីខែមេសា បានបង្ហាញថា ផលិតផលក្នុងស្រុកសរុបពិតប្រាកដរបស់តំបន់អាស៊ីប៉ាស៊ីហ្វិក នឹងកើនឡើង ៤,៦% នៅក្នុងឆ្នាំ២០២៣ ដែលអត្រានេះ គឺបានបង្កើនអត្រាព្យាករ ០,៣% បន្ថែមទៀតពីអ្វីដែលបានព្យាករកាលពីខែតុលាកន្លងទៅ។ ដោយឡែក សម្រាប់កំណើនសេដ្ឋកិច្ចពិភពលោកវិញ ត្រូវបាន IMF ព្យាករថា នឹងមានក្នុងអត្រា ២,៨%នៅឆ្នាំ២០២៣។
ជាមួយគ្នានេះ ប្រទេសចិនដែលជាសេដ្ឋកិច្ចធំជាងគេបំផុតទី២ ក្នុងពិភពលោកនោះ នឹងរួមចំណែកដល់ទៅប្រមាណ ៣៥% នៃកំណើនសកលឆ្នាំនេះ ខណៈដែលឥណ្ឌាវិញ នឹងរួមចំណែកដល់ ១៥,៤%។ នេះបើតាមការព្យាកររបស់ IMF ដែលបានបង្កើនអត្រាព្យាករនេះ ដល់ទៅជាង ៥០% ធៀបនឹងអ្វីដែលបានព្យាករកាលពីមុន។
តំបន់អាស៊ីប៉ាស៊ីហ្វិកទាំងមូលត្រូវបានព្យាករថានឹងជំរុញប្រហែល ៧០% នៃកំណើនសេដ្ឋកិច្ចអន្តរជាតិពិភពលោក ព្រមទាំងកំពុងបង្កើនវត្តមានរបស់ខ្លួនកាន់តែខ្លាំងដែរ នៅពេលដែលកំណើនសេដ្ឋកិច្ចរបស់លោកខាងលិចធ្លាក់ចុះ។ នេះបើតាមការអះអាងរបស់ លោក Krishna Srinivasan ប្រធាននាយកដ្ឋានអាស៊ី និងប៉ាស៊ីហ្វិករបស់ IMF ដោយលោកថែមទាំងបានបញ្ជាក់ទៀតថា វាគឺជាការរួមចំណែកកាន់តែធំ ដែលគេមិនធ្លាប់បានឃើញក្នុងរយៈពេលប៉ុន្មានឆ្នាំចុងក្រោយនេះ។