ថ្លែងក្នុងសន្និសីទធុរកិច្ចអន្តរជាតិ ដ៏ល្បីរបស់ចិន នៅទីក្រុងប៉េកាំង លោកស្រី ចចហ្គីវ៉ា បាននិយាយថា សេដ្ឋកិច្ចពិភពលោក បានបង្ហាញពីភាពធន់គួរឱ្យកត់សម្គាល់ ប៉ុន្តែវាឆ្ពោះទៅរកកំណើនដែល«ចុះខ្សោយជាស្តង់ដាប្រវត្តិសាស្ត្រ»ក្នុងរយៈពេលមធ្យម ខណៈដែលកំណើនផលិតភាពទាប និងកម្រិតបំណុលកើនខ្ពស់បានរារាំងដល់ការវិវឌ្ឍន៍។ជាមួយនឹងកំណែទម្រង់គាំទ្រទីផ្សារជាកញ្ចប់ដ៏ទូលំទូលាយនោះ ចិនអាចបន្ថែម២០% ឬ ៣,៥ទ្រីលានដុល្លារដល់សេដ្ឋកិច្ចរបស់ខ្លួនក្នុងរយៈពេល១៥ឆ្នាំខាងមុខ។
លោកស្រីបានប្រាប់វេទិកាអភិវឌ្ឍន៍ចិនថា ប្រទេសចិនប្រឈមមុខនឹងផ្លូវរបត់ ដោយត្រូវសម្រេចចិត្តថា តើត្រូវបន្តគោលនយោបាយដែលបានដំណើរការកាលពីអតីតកាល ឬក៏ត្រូវបង្កើតឡើងវិញសម្រាប់យុគសម័យថ្មី នៃកំណើនប្រកបដោយគុណភាពខ្ពស់។ថ្លែងក្នុងពិធីបើកវេទិកាសេដ្ឋកិច្ចនេះ លោក លី ឈាង នាយករដ្ឋមន្ត្រីចិន បាននិយាយថា វេទិកានៅឆ្នាំនេះត្រូវបានចូលរួមដោយនាយកប្រតិបត្តិពិភពលោកជាច្រើនរួមទាំងលោក ទីម ឃុក (Tim Cook) របស់ក្រុមហ៊ុន Apple ផងដែរ។
អត្តបទគួរអាន
លោក លី បានសន្យានៅចំពោះមុខនាយកប្រតិបត្តិទាំងនោះថា ទីក្រុងប៉េកាំងនឹងរៀបចំបទប្បញ្ញត្តិថ្មីមួយចំនួន ដើម្បីដំណើរការទីផ្សារដោយរលូនសម្រាប់សហគ្រាសបរទេស និងការខិតខំ ដើម្បីជំរុញបង្កើនការប្រើប្រាស់ក្នុងស្រុកផងដែរ។
សន្និសីទនេះបានធ្វើឡើងនៅចំពេលក្រុមដៃគូពាណិជ្ជកម្មរបស់ប្រទេសចិនកំពុងប្រឈមមុខនឹងហានិភ័យនៃការផ្គត់ផ្គង់លើសកម្រិតក្នុងឧស្សាហកម្មសំខាន់ៗរួមទាំងរថយន្តអគ្គិសនី និងដែក ដែលអាចជំរុញឱ្យផលិតករផលិតទំនិញលើសកម្រិតនៅលើទីផ្សារពិភពលោក។ ទីក្រុងប៉េកាំងបានកំណត់គោលដៅកំណើនសេដ្ឋកិច្ច៥% សម្រាប់ឆ្នាំនេះ គឺដូចឆ្នាំ២០២៣ ដែរ ប៉ុន្តែវាទាបជាងឆ្នាំ២០២២ ហើយអ្នកវិភាគរំពឹងថា សេដ្ឋកិច្ចចិននឹងធ្លាក់ចុះបន្ថែមទៀតក្នុងរយៈពេលមធ្យមដោយសារការធ្លាក់ចុះទីផ្សារអចលនទ្រព្យ និងការធ្លាក់ចុះប្រជាសាស្រ្ត៕
អត្ថបទ៖ សុខ ជា
None
