តៃវ៉ាន់ បានស្វះស្វែងរកកិច្ចចរចាពាណិជ្ជកម្មជាមួយឥណ្ឌា អស់រយៈពេលជាច្រើនឆ្នាំមកហើយ ប៉ុន្ដែ រដ្ឋាភិបាលរបស់លោកនាយករដ្ឋមន្ត្រីឥណ្ឌា Narendra Modi ហាក់មានការស្ទាក់ស្ទើរ ក្នុងការឈានទៅមុខ ពីព្រោះតែឥណ្ឌាខ្លាចមានបញ្ហារកាំរកូសជាមួយនឹងចិន នៅពេលដែលមានកិច្ចព្រមព្រៀងណាមួយ ត្រូវបានចុះបញ្ចីនៅក្នុងអង្គការពាណិជ្ជកម្មពិភពលោក។ នេះបើតាមការអះអាងរបស់មន្ត្រីជាន់ខ្ពស់រដ្ឋាភិបាលឥណ្ឌា ដែលស្នើសុំមិនបញ្ចេញឈ្មោះ បានបញ្ជាក់ប្រាប់ប្រព័ន្ធផ្សព្វផ្សាយ។
អត្ថបទទាក់ទង
មន្ត្រីរូបនោះបាននិយាយទៀតថា កិច្ចព្រមព្រៀងពាណិជ្ជកម្មជាមួយនឹងតៃវ៉ាន់ អាចនឹងជួយដល់គោលដៅរបស់ឥណ្ឌា ក្នុងការស្វែងរកការវិនិយោគកាន់តែប្រសើរឡើង នៅក្នុងវិស័យបច្ចេកវិទ្យា និងអេឡិចត្រូនិក។ លោកបានបន្ថែមថា វាមិនច្បាស់ទេថា តើការសម្រេចចិត្តចុងក្រោយ នឹងត្រូវធ្វើឡើងនៅពេលណា នឹងចាប់ផ្ដើមចរចានៅពេលណានោះ។
កាលពីដើមខែតុលា រដ្ឋាភិបាលលោក Modi បានអនុម័តគម្រោងវិនិយោគរបស់ក្រុមហ៊ុនមួយចំនួន រួមទាំង ក្រុមហ៊ុន Foxconn Technology Group របស់តៃវ៉ាន់, ក្រុមហ៊ុន Wistron Corp និង Pegatron Corp ខណៈដែលលោកកំពុងទាក់ទាញការវិនិយោគ ដែលមានតម្លៃជាទឹកប្រាក់ជាង ១០,៥ពាន់លានរូពី ឬស្មើនឹង ១៤៣ ពាន់លានដុល្លារ សម្រាប់ផលិតកម្មទូរស័ព្ទ Smartphone ក្នុងរយៈពេល ៥ឆ្នាំ។
បើសិនជាមានកិច្ចពិភាក្សាជាផ្លូវការណាមួយ ជាមួយនឹងណ្ឌាមែននោះ ត្រូវបានគេមើលឃើញថា វាគឺជាភាពជោគជ័យធំមួយសម្រាប់តៃវ៉ាន់បាត់ទៅហើយ ខណៈដែលតៃវ៉ាន់កន្លងមកនេះ បានជួយការរាំងស្ទះក្នុងការចាប់ផ្ដើមការចរចាពាណិជ្ជកម្ម ជាមួយនឹងប្រទេសសេដ្ឋកិច្ចធំៗ ដោយសារតែមានសម្ពាធពីប្រទេសចិន។ ដូចទៅនឹងប្រទេសភាគច្រើនទៀតដែរ ឥណ្ឌា គឺមិនបានទទួលស្គាល់តៃវ៉ាន់ជាផ្លូវការនោះទេ ដោយរដ្ឋាភិបាលទាំងពីរ រក្សាបេសកកម្មការទូតក្រៅផ្លូវការ ក្នុងទម្រង់ជា ការិយាល័យតំណាង។
កាលពីឆ្នាំ២០១៨ ឥណ្ឌា និងតៃវ៉ាន់ បានចុះហត្ថលេខា លើកិច្ចព្រមព្រៀងវិនិយោគទ្វេភាគី ដើម្បីពង្រីកទំនាក់ទំនងសេដ្ឋកិច្ចបន្ថែមទៀត។ ពាណិជ្ជកម្មទ្វេភាគីរវាងឥណ្ឌា និងតៃវ៉ាន់ បានកើនឡើង ១៨% ដល់ទៅ ៧,២ ពាន់លានដុល្លារ នៅឆ្នាំ២០១៩។ នេះបើតាមតួលេខពីនាយកដ្ឋានពាណិជ្ជកម្មឥណ្ឌា។
អ្នកនាំពាក្យក្រសួងការបរទេសចិន លោក Zhao Lijian បាននិយាយថា ប្រទេសឥណ្ឌា គួរតែនៅបន្ដប្តេជ្ញាចំពោះគោលការណ៍ចិនតែមួយ និងខិតទៅរកបញ្ហាដែលទាក់ទងនឹងកោះតៃវ៉ាន់ ដោយប្រុងប្រយ័ត្ន និងត្រឹមត្រូវវ។ លោកបន្ថែមថា មានតែប្រទេសចិនតែមួយគត់ នៅក្នុងពិភពលោកនេះ ហើយតៃវ៉ាន់ គឺផ្នែកមួយនៃប្រទេសចិន។ គោលការណ៍ចិនតែមួយ គឺជាការមូលមតិគ្នាជាសកលរបស់ហគមន៍អន្តរជាតិ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
