រដ្ឋាភិបាលឥណ្ឌាបានដាក់ពន្ធគយ ២០% លើការនាំចេញអង្ករធម្មតា និងអង្ករសម្រូប និងហាមលក់អង្ករគ្រាប់បាក់ទៅបរទេស។ វិធានការទប់ស្កាត់នេះត្រូវបានអនុវត្តចំពោះអង្ករប្រហែល ៦០% នៃអង្ករដែលត្រូវនាំចេញសរុបរបស់ឥណ្ឌា។ នេះបើយោងតាមការគណនារបស់ Bloomberg។
ចំណាត់ការរបស់ឥណ្ឌា ដែលមានចំណែកទីផ្សារពាណិជ្ជកម្មអង្ករពិភពលោកចំនួន ៤០% នេះនឹងដាក់សម្ពាធបន្ថែមទៀតទៅលើប្រទេសដែលកំពុងប្រឹងប្រែងតស៊ូជាមួយភាពអត់ឃ្លាន និងការកើនឡើងអតិផរណាស្បៀងអាហារផងដែរ។ អង្ករគឺជាអាហារដ៏សំខាន់សម្រាប់ប្រជាជនពិភពលោកប្រហែលពាក់កណ្ដាលដោយតំបន់អាស៊ីបានផលិត និងប្រើប្រាស់ច្រើនជាងគេរហូតទៅដល់ប្រហែល ៩០% នៃការផ្គត់ផ្គង់សរុបរបស់ពិភពលោក។
ឥឡូវនេះអង្ករ គឺជាទំនិញកសិកម្មដ៏សំខាន់ទី៣នៅក្នុងប្រទេសឥណ្ឌា ដែលត្រូវប្រឈមនឹងការរឹតបន្តឹងលើការលក់នៅក្រៅប្រទេសនៅក្នុងឆ្នាំនេះ បន្ទាប់ពីប្រទេសអាស៊ីខាងត្បូងមួយនេះបានទប់ស្កាត់ការនាំចេញស្រូវសាលី និងស្ករសរួចទៅហើយនាពេលកន្លងទៅនេះ ដោយបន្ថែមទៅក្នុងប្រព័ន្ធគាំពារស្បៀងអាហារនិយម ហើយវាកាន់តែធ្វើឱ្យមានភាពវឹកវរកាន់តែខ្លាំងឡើងនៅក្នុងទីផ្សារស្បៀងអាហារពិភពលោក ដែលបានរងគ្រោះដោយសារសង្រ្គាមនៅអ៊ុយក្រែនរួចទៅហើយនោះ។
បន្ទាប់ពីការលុកលុយរបស់រុស្ស៊ីនៅអ៊ុយក្រែន តម្លៃស្រូវសាលី និងគ្រាប់ពោតបានកើនឡើងយ៉ាងខ្លាំងខណៈដែលតម្លៃអង្ករបានធ្លាក់ចុះដោយសារតែការស្តុកទុកច្រើនពេកដែលបានជួយការពារវិបត្តិអាហារបានច្រើន ប៉ុន្តែ តម្លៃអង្ករអាចនឹងមានការប្រែប្រួលខ្លាំង ដោយសារវិធានការចុងក្រោយរបស់ឥណ្ឌានេះ។
អត្ថបទគួរអាន
រដ្ឋាភិបាលឥណ្ឌាបាននិយាយកាលពីថ្ងៃទី ៨ កញ្ញាថា ការរឹតបន្តឹងនេះអនុវត្តចំពោះប្រភេទអង្ករស និងអង្ករសម្រូប ហើយអង្ករគ្រាប់ល្អ និងអង្ករគ្រាប់បាក់នឹងក៏ត្រូវទទួលកាតព្វកិច្ចស្រដៀងគ្នានេះដែរ។ អង្ករបាសម៉ាទី(Basmati) និងអង្ករផ្សេងទៀតមិនត្រូវបានហាមឃាត់នោះឡើយ។
អង្ករដែលឥឡូវនេះត្រូវបានដាក់ពន្ធគយសម្រាប់ការនាំចេញនោះមានចំនួនប្រហែល ៦០% នៃការនាំចេញអង្ករដែលមិនមែនជាប្រភេទអង្ករបាសម៉ាទីរបស់ប្រទេសឥណ្ឌា។ នេះបើតាមលោក Krishna Rao ប្រធានសមាគមអ្នកនាំចេញអង្ករឥណ្ឌា។ លោកបានបន្តថា ការរឹតបន្តឹងនេះនឹងផ្តល់អត្ថប្រយោជន៍ដល់ប្រទេសផ្គត់ផ្គង់ ដែលជាគូប្រជែងផ្សេងទៀតដូចជាប្រទេសថៃ និងវៀតណាមជាដើម ដែលកំពុងតែសហការគ្នាដើម្បីបង្កើនតម្លៃអង្ករ។
លោក Rao បាននិយាយថា វិធានការរបស់រដ្ឋាភិបាលនេះនឹងបង្កើនតម្លៃអង្ករពិភពលោកថែមទៀតដោយគេបានប៉ាន់ប្រមាណថាតម្លៃនាំចេញអង្ករសអាចកើនឡើងពីតម្លៃបច្ចុប្បន្ន ៣៥០ ដុល្លារក្នុងមួយតោនឡើងរហូតដល់ជាង ៤០០ ដុល្លារក្នុងមួយតោន។
លោកបានបន្ថែមទៀតថា ក្រុមហ៊ុននាំចេញអង្ករមួយចំនួននឹងស្នើឱ្យរដ្ឋាភិបាលឥណ្ឌាលើកលែងពន្ធលើអង្ករប្រមាណ ២ លានតោនដែលបានចុះកិច្ចសន្យានាំចេញរួចហើយនោះ ប៉ុន្តែមិនទាន់បានដឹកជញ្ជូននៅឡើយ។
សូមបញ្ជាក់ថា ការដាំដុះស្រូវនៅឥណ្ឌាបានធ្លាក់ចុះជាង៥% នៅក្នុងរដូវដាំដុះនៅឆ្នាំនេះ ដោយសារតែតំបន់មួយចំនួនខ្វះទឹកភ្លៀង។ ប្រទេសឥណ្ឌា គឺជាប្រទេសនាំចេញអង្ករដ៏ធំរបស់ជាងគេបង្អស់របស់ពិភពលោកដោយក្នុងមួយឆ្នាំៗនាំចេញប្រហែលជាង២០លានតោន៕
អត្ថបទ៖ សុខ ជា
