បើតាមការចុះផ្សាយពី Nikkei កម្មវិធីលើកទឹកចិត្តការវិនិយោគរបស់រដ្ឋាភិបាលឥណ្ឌាសម្រាប់ក្រុមហ៊ុនផលិតបន្ទះឈីបនេះ ត្រូវបានអនុម័តដោយគណៈរដ្ឋមន្ត្រី កាលពីថ្ងៃទី ១៥ ខែធ្នូ ហើយបច្ចុប្បន្ន ឥណ្ឌាបានចាប់ផ្តើមបើកទ្វារទទួលយកក្រុមហ៊ុនដាក់ពាក្យចូលមកវិនិយោគចាប់តាំងពីថ្ងៃទី ១ ខែមករាមកម្ល៉េះ ខណៈដែលប្រទេសនេះ ក៏ដូចជាប្រទេសជាច្រើនផ្សេងទៀត កំពុងពង្រឹងកិច្ចខិតខំប្រឹងប្រែងយ៉ាងខ្លាំង ដើម្បីជំរុញការផ្គត់ផ្គង់សមាសធាតុឧស្សាហកម្មដ៏សំខាន់ក្នុងស្រុករបស់ខ្លួន។
កញ្ចប់ទឹកប្រាក់សម្រាប់ប្រើប្រាស់លើការលើកទឹកចិត្តការវិនិយោគជាង ១០ពាន់លានដុល្លារនេះ គឺគ្របដណ្តប់រហូតដល់ពាក់កណ្តាលនៃការចំណាយដំបូងសម្រាប់ក្រុមហ៊ុនវិនិយោគលើការបង្កើតមជ្ឈមណ្ឌលផលិតបន្ទះឈីបក្នុងប្រទេសឥណ្ឌា។ រដ្ឋាភិបាលឥណ្ឌានឹងសហការជាមួយ អាជ្ញាធរតាមបណ្ដារដ្ឋនានាក្នុងការសាងសង់សួនឧស្សាហកម្មបច្ចេកវិទ្យាខ្ពស់ដែលបំពាក់ដោយ ទឹកស្អាត ថាមពល និង ហេដ្ឋារចនាសម្ព័ន្ធដឹកជញ្ជូនកាន់តែប្រសើរផងដែរ។ លើសពីនេះ ឥណ្ឌានឹងផ្តល់ជំនួយសម្រាប់គ្រឿងបរិក្ខារ ដែលគ្រប់គ្រងក្នុងដំណើរការផលិត និងការធ្វើតេស្ត ហើយព្រមទាំងគាំទ្រដល់ការចាប់ផ្តើមអាជីវកម្មរចនាបន្ទះឈីប និងបណ្តុះជំនាញបន្ថែមទៀត។
អត្ថបទគួរអាន
រដ្ឋមន្ត្រីក្រសួងអេឡិចត្រូនិក និងបច្ចេកវិទ្យាព័ត៌មានរបស់ឥណ្ឌាបានបញ្ជាក់ថា ក្រុមហ៊ុនធំៗទាំងអស់កំពុងពិភាក្សាជាមួយដៃគូក្នុងប្រទេសឥណ្ឌា ដោយពួកគេជាច្រើនចង់មកបង្កើតក្រុមហ៊ុនបុត្រសម្ព័ន្ធរបស់ពួកគេដោយផ្ទាល់នៅទីនេះ។ រដ្ឋាភិបាលឥណ្ឌារំពឹងថា ក្នុងរយៈពេល ២ ទៅ ៣ ឆ្នាំខាងមុខទៀត រោងចក្រផលិតបន្ទះឈីបជាច្រើននឹងចាប់ផ្តើមផលិតនៅក្នុងប្រទេសឥណ្ឌា។
សូមជម្រាបថា នេះមិនមែនជាលើកទី១ ដែលឥណ្ឌាបានផ្ដល់ការលើកចិត្ត ក្នុងការទាក់ទាញក្រុមហ៊ុនផលិតបន្ទះឈីបកំពូលៗរបស់ពិភពលោកឲ្យចូលមកវិនិយោគក្នុងប្រទេសខ្លួន កាលពីប៉ុន្មានឆ្នាំកន្លងមកឥណ្ឌាក៏មានការផ្ដល់ការលើកចិត្តនេះដូចគ្នាដែរ។ ប៉ុន្ដែ ការចាប់អារម្មណ៍ពីក្រុមហ៊ុនផលិតបន្ទះឈីបធំៗ នៅប្រទេសនេះ មានការធ្លាក់ចុះដោយសារតែកន្លងមក មានការផ្ទុះការតវ៉ាប្រឆាំងពីប្រជាពលរដ្ឋឥណ្ឌាជុំវិញការប្រើប្រាស់ដីធ្លី និងបញ្ហាទាក់ទងនឹងលក្ខខណ្ឌច្បាប់ការងារជាដើម៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
