ក្រសួងហិរញ្ញវត្ថុជប៉ុនបានធ្វើការប៉ាន់ប្រមាណសេវាបំណុល ដែលត្រូវទូទាត់នៅក្នុងរយៈពេល៥ឆ្នាំ ដោយក្នុងនោះ នៅឆ្នាំសារពើពន្ធ២០២៣ ជប៉ុនមានសេវាបំណុលត្រូវទូទាត់ជាង២១២ពាន់លានដុល្លារ និងអាចកើនឡើងដល់ជាង ២៥០ពាន់លានដុល្លារនៅឆ្នាំ២០២៥ ដោយសន្មតថាអត្រាការប្រាក់មាននៅក្នុងកម្រិត១,៣%។
ក៏ប៉ុន្ដែ បើក្នុងករណីអត្រាការប្រាក់កើនខ្ពស់ដល់ ២,៣% នោះសេវាបំណុលរបស់ជប៉ុននឹងមានដល់ជាង ២៦០ពាន់លានដុល្លារអាមេរិក ហើយសេវាបំណុលនេះ អាចនឹងកើនថែមទៀតដល់ជាង ៣០០ពាន់លានដុល្លារ ប្រសិនបើអត្រាការប្រាក់កើនដល់ ៣,៣% គួបផ្សំនឹងមានសម្ពាធលើការចំណាយដែលត្រូវការ ទាក់ទងនឹងគោលនយោបាយក្នុងវិស័យអប់រំ ការការពារជាតិ និងការងារសាធារណៈជាដើម។
សូមបញ្ជាក់ថា សេវាបំណុល គឺសម្ដៅលើសាច់ប្រាក់ដែលរដ្ឋាភិបាលជប៉ុនត្រូវសងទាំងដើមទាំងការទៅឲ្យម្ចាស់បំណុល។
អត្ថបទគួរអាន
បើទោះបីជា សេវាបំណុលមានការកើនឡើង ប៉ុន្ដែរាជរដ្ឋាភិបាលជប៉ុននៅតែអាចចំណាយលើការជំរុញកំណើនសេដ្ឋកិច្ច ដោយសារតែគោលនយោបាយអត្រាការប្រាក់ទាបរបស់ធនាគារកណ្ដាលរបស់ជប៉ុន ដែលជួយរក្សាការចំណាយលើការខ្ចីប្រាក់ឲ្យមាននៅកាន់តែមានតិច។
នៅប្រទេសជប៉ុន នៅក្រោយពេលមានវិធានការជំរុញសារពើពន្ធដ៏ច្រើនដ៏សម្បើម បានបន្សល់នូវហេដ្ឋរចនាសម្ព័ន្ធ សម្រាប់តំបន់ទីជនបទជាច្រើនផងដែរ បើទោះបីជាគំនរបំណុល និងសេវាបំណុលដែលត្រូវសង នាពេលបច្ចុប្បន្នកំពុងមានដល់ទៅប្រមាណ ១ភាគ៤នៃថវិការដ្ឋនៅឆ្នាំ២០២២ ដែលមានជាង៩៤០ពាន់លានដុល្លារអាមេរិកក៏ដោយ។
ជាមួយនឹងកំណើន៣% កញ្ចប់ថវិកាឆ្នាំសារពើពន្ធរបស់ជប៉ុននៅឆ្នាំ២០២៥ នឹងកើនឡើងដល់ ៩៧៥ពាន់លានដុល្លារ ដោយក្នុងនោះ ប្រាក់ចំណូលពន្ធរំពឹងថានឹងកើនដល់ ៦៣០ពាន់លានដុល្លារ ចំណូលមិនមែនពន្ធ នឹងកើនដល់ជិត៥០ពាន់លានដុល្លារ និងបំណុលថ្មីរបស់រដ្ឋាភិបាលនឹងមានជិត៣០០ពាន់លានដុល្លារផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
