លើសពីនេះ លោក Widodo មានក្តីសង្ឃឹមធំមួយទៀត គឺការធ្វើឱ្យទីក្រុងថ្មីនេះក្លាយជាមជ្ឈមណ្ឌលបច្ចេកវិទ្យាហិរញ្ញវត្ថុឈានមុខគេនៅតំបន់អាស៊ីតាមរយៈការទាក់ទាញនៃក្រុមហ៊ុនបច្ចេកវិទ្យាហិរញ្ញវត្ថុសំខាន់ៗ រួមទាំងការចាប់ផ្តើមអាជីវកម្មថ្មីផងដែរ។ នេះបើតាមការចេញផ្សាយដោយសារព័ត៌មានជប៉ុន Nikkie Asia។
កាលពីថ្ងៃទី២៣ ខែកុម្ភៈកន្លងទៅ លោក Widodo អមដោយគណៈរដ្ឋមន្ត្រីរបស់លោកបានទៅពិនិត្យមើលព្រៃឈើនៅតំបន់ Kalimantan ជាផ្នែកមួយនៃកោះ Borneo នៅភាគខាងកើតប្រទេសឥណ្ឌូនេស៊ីជាទីដែលរដ្ឋធានីថ្មីនឹងត្រូវសាងសង់នៅទីនោះ។ លោក Widodo បានស្នាក់នៅមួយយប់ក្នុងផ្ទះតូចមួយ ដែលសង់នៅការដ្ឋានសំណង់ ហើយលោកបានផុសនៅលើធ្វីតធឺរបស់លោកថា ការរៀបចំកំពុងដំណើរការរួចរាល់ហើយសម្រាប់ពិធីបុណ្យឯករាជ្យជាតិរបស់ឥណ្ឌូនេស៊ីនៅក្នុងខែសីហា ឆ្នាំ២០២៤ នៅវិមានប្រធានាធិបតីថ្មីនេះ។
ក្រោយពីជាប់ឆ្នោតជាថ្មីនៅឆ្នាំ២០១៩ លោក Widodo បានប្រកាសពីផែនការផ្លាស់ប្តូររដ្ឋធានី ហើយគម្រោងនេះត្រូវបានផ្តល់សច្ចាប័នដោយសភាក្នុងខែមករា ឆ្នាំ២០២២ ហើយលោកប្រធានាធិបតីបានដាក់ឈ្មោះទីក្រុងថ្មីថា នូសានតារ៉ា (Nusantara) ជាភាសាឥណ្ឌូនេស៊ីដែលមានន័យថា«ប្រជុំកោះ»។ លោក វីដូដូ គ្រោងនឹងផ្ទេរមុខងាររដ្ឋាភិបាលមួយចំនួនទៅកាន់ទីក្រុងថ្មីនេះនៅដើមឆ្នាំ២០២៤ផងដែរ។
អត្ថបទគួរអាន
ទីក្រុង Nusantara គឺជាទីក្រុងបៃតង និងឆ្លាតវៃ ដែលមានប្រើប្រាស់បច្ចេកវិទ្យាឌីជីថលពេញលេញ។ នៅក្នុងបទសម្ភាសន៍ជាមួយសារព័ត៌មាន Nikkei Asia កាលពីខែវិច្ឆិកាកន្លងទៅ លោក Widodo បាននិយាយថា ឥណ្ឌូនេស៊ីនឹងសាងសង់មជ្ឈមណ្ឌលហិរញ្ញវត្ថុនៅទីក្រុង Nusantara ប៉ុន្តែមិនដូចនៅប្រទេសសិង្ហបុរី ឬហុងកុងនោះទេ។ ទីក្រុងនេះនឹងក្លាយជាមជ្ឈមណ្ឌលហិរញ្ញវត្ថុបច្ចេកវិទ្យា ហើយឥណ្ឌូនេស៊ីក៏នឹងផ្តល់នូវការលើកទឹកចិត្តក្នុងការវិនិយោគ ដែលមានការប្រកួតប្រជែងខ្លាំងនៅទីនោះផងដែរ។
រដ្ឋាភិបាលកំពុងពិចារណាពីវិធានការមួយចំនួន ដើម្បីទាក់ទាញក្រុមហ៊ុនហិរញ្ញវត្ថុបច្ចេកវិទ្យាទៅកាន់រដ្ឋធានីថ្មីនេះដូចជាការលើកលែងពន្ធសាជីវកម្មសម្រាប់ធនាគារ និងក្រុមហ៊ុនធានារ៉ាប់រងក៏ដូចជាផ្នែកហិរញ្ញវត្ថុអ៊ីស្លាមដែលផ្អែកលើច្បាប់អ៊ីស្លាមសារៀ (Shariah) ផងដែរ។ រដ្ឋាភិបាលក៏កំពុងថ្លឹងថ្លែងលើផែនការលើកលែងពន្ធលើប្រាក់ចំណូលដល់បុគ្គលិកឥណ្ឌូនេស៊ីក្នុងវិស័យហិរញ្ញវត្ថុដល់ឆ្នាំ២០៣២ និងផ្ដល់ឱ្យពួកគេនូវការកាត់បន្ថយពន្ធចំនួន ៥០% នៅក្រោយឆ្នាំ២០៣២ ហើយការលើកលែងពន្ធនឹងអនុវត្តចំពោះបុគ្គលិកបរទេសផងដែរ។
តាមរយៈកំណែទម្រង់ទាំងនេះ រដ្ឋបាលរបស់លោក Widodo សង្ឃឹមថានឹងដាក់រដ្ឋធានីថ្មីនេះមិនត្រឹមតែជាមជ្ឈមណ្ឌលនយោបាយ និងរដ្ឋបាលរបស់ប្រទេសនេះតែប៉ុណ្ណោះទេ ប៉ុន្តែគឺជាបេះដូងសេដ្ឋកិច្ច និងហិរញ្ញវត្ថុផងដែរ។
រដ្ឋាភិបាលបានបង្ហាញរួចហើយពីការលើកទឹកចិត្តក្នុងបំណងជំរុញការវិនិយោគនៅក្នុងឧស្សាហកម្មមិនមែនហិរញ្ញវត្ថុដូចជាការវិនិយោគលើហេដ្ឋារចនាសម្ព័ន្ធ និងឧស្សាហកម្មសេវាកម្ម ដែលនឹងត្រូវបានលើកលែងពីពន្ធសាជីវកម្មរយៈពេល ៣០ ឆ្នាំសម្រាប់គម្រោងដែលធ្វើឡើងនៅចន្លោះឆ្នាំ២០២២ ដល់ឆ្នាំ២០៣៥ និងលើកលែងពន្ធសាជីវកម្មសម្រាប់រយៈពេល ២៥ ឆ្នាំសម្រាប់គម្រោងដែលបានចាប់ផ្តើមនៅចន្លោះឆ្នាំ២០៣៦ និងឆ្នាំ២០៤៥។ ក្រុមហ៊ុនទាំងនេះ ក៏នឹងមានសិទ្ធិទទួលបានការកាត់ពន្ធ ១០០% សម្រាប់១០ឆ្នាំប្រសិនបើពួកគេសាងសង់ទីស្នាក់ការកណ្តាលនៅក្នុងទីក្រុង Nusantara ឬក៏ផ្លាស់ប្ដូរទៅទីនោះ ហើយពន្ធលើតម្លៃបន្ថែមក៏នឹងត្រូវកាត់បន្ថយដែរ៕
