ឥណ្ឌូណេស៊ីជាប្រជាជាតិមួយដែលមានតម្រូវការសាច់គោខ្ពស់មួយ នៅពេលនេះ កំពុងតែមានគម្រោងកាត់បន្ថយការនាំចូលគោពីប្រទេសអូស្ត្រាលី ដោយស្វែងរកជម្រើសនៃការផ្គត់ផ្គង់សាច់គោពីអាហ្វ្រិកខាងត្បូង និងម៉ិកស៊ិកជំនួសវិញ ។
តាមសេចក្តីរាយការណ៍ដែលចុះផ្សាយនៅលើសារព័ត៌មាន the Star បានឲ្យដឹងថា ឥណ្ឌូណេស៊ី គ្រោងនឹងពង្រីកការនាំចូលគោពីអាហ្វ្រិកខាងត្បូង និងម៉ិកស៊ិក ដើម្បីកាត់បន្ថយការពឹងផ្អែកទាំងស្រុងលើការផ្គត់ផ្គង់ពីប្រទេសអូស្ត្រាលី ។
លោក ស៊ូ ហានតូ ( Suhanto ) អគ្គលេខាធិការនៃក្រសួងពាណិជ្ជកម្ម បាននិយាយថា នៅពេលនេះឥណ្ឌូនេស៊ីកំពុងស្ថិតក្នុងដំណើរការចរចាពាណិជ្ជកម្មជាមួយម៉ិកស៊ិកលើកិច្ចព្រមព្រៀងមួយដើម្បីនាំចូលគោ ដើម្បីធានាការផ្គត់ផ្គង់សម្រាប់តម្រូវការក្នុងស្រុក។
អត្ថបទគួរអាន
ក្រៅពីនេះ លោក លូហុត ប៊ីនសា ផានចៃតាន ( Luhut Binsar Panjaitan) រដ្ឋមន្រ្តីក្រសួងកិច្ចការសមុទ្រនិងបណ្តាក់ទុន ក៏បានបញ្ជាក់អំពីបញ្ហាស្រដៀងគ្នានេះ នៅក្នុងជំនួប ជាមួយនឹងលោក ស៊ីវិល រ៉ាម៉ាផូសា (Cyril Ramaphosa) ប្រធានាធិបតីអាហ្រ្វិកខាងត្បូង អំពីផែនការ នាំចូលសត្វគោចំនួន ៥ម៉ឺនក្បាលពីអាហ្វ្រិកខាងត្បូងផងដែរ។
លោក ស៊ូ ហានតូ បាននិយាយថា ការនាំចូលសត្វគោពីអាហ្វ្រិកខាងត្បូង និងម៉ិកស៊ិកនឹងត្រូវបានអនុវត្ត ដូច្នេះឥណ្ឌូណេស៊ីនឹងមិនពឹងផ្អែកទាំងស្រុងលើការផ្គត់ផ្គង់ពីអូស្ត្រាលីទេ ដោយសារតម្លៃគោក្របីអូស្ត្រាលីមាននិន្នាការកើនឡើងជារៀងរាល់ឆ្នាំ ដែលប៉ះពាល់ដល់តម្លៃក្នុងស្រុក។
ទិន្នន័យពីការិយាល័យស្ថិតិរបស់ប្រទេសឥណ្ឌូនេស៊ី បានបង្ហាញថា អូស្ត្រាលីគឺជាអ្នកនាំចេញសត្វគោច្រើនជាងគេទៅកាន់ប្រទេសឥណ្ឌូនេស៊ី ដោយនៅក្នុងឆ្នាំ២០១៧ ការនាំចូលគោរបស់អូស្ត្រាលីចូលមកឥណ្ឌូណេស៊ីបានកើនដល់ជាង ៨ម៉ឺន៥ពាន់តោន ហើយនៅឆ្នាំ២០២២បានកើនដល់ជាង ១២ម៉ឺន៣ពាន់តោន៕
ដោយៈ សរ សុជាតិ
