ក្រសួងផែនការនិងការវិនិយោគរបស់វៀតណាមបានអះអាងថា ក្រសួងនេះកំពុងធ្វើសេចក្ដីព្រាងដំណោះស្រាយមួយស្ដីពីវិធានការមួយចំនួន ដើម្បីបង្កើនប្រសិទ្ធភាពសួនឧស្សាហកម្ម និងតំបន់សេដ្ឋកិច្ចនៅប្រទេសនេះ ខណៈដែលតំបន់សេដ្ឋកិច្ចទាំង២នេះបានរួមចំណែក ៥០% នៅក្នុងតម្លៃនាំចេញសរុបរបស់ប្រទេសនេះ។
ទោះជាយ៉ាងណាក៏ដោយ ក្រសួងផែនការនេះបានចង្អុលបង្ហាញពីបញ្ហាមួយចំនួនទាក់ទងនឹងតំបន់សួនឧស្សាហកម្ម និងតំបន់សេដ្ឋកិច្ច រួមទាំងការអភិវឌ្ឍដែលគ្មានស្ថិរភាពក្នុងទិដ្ឋភាពផ្សេងៗគ្នាផងដែរ ខណៈដែលស្ថានភាពរស់នៅតាមសហគមន៍មូលដ្ឋានជាទីដែលតំបន់ទាំងនេះស្ថិតនៅ ក្នុងនោះគឺនៅមិនទាន់ឃើញមានការរីកចម្រើនគួរឱ្យកត់សម្គាល់នៅឡើយទេ។
នៅក្នុងសេចក្តីព្រាងដំណោះស្រាយរបស់ក្រសួងផែនការវៀតណាម ក្រសួងនេះបានស្នើឱ្យកសាងច្បាប់ស្តីពីតំបន់សួនឧស្សាហកម្ម និងតំបន់សេដ្ឋកិច្ច នៅឆ្នាំ២០២២ និងការចេញសេចក្តីសម្រេចរបស់នាយករដ្ឋមន្រ្តីវៀតណាម ស្តីពីយន្តការសម្របសម្រួលក្នុងចំណោមក្រសួង វិស័យ និងតំបន់ក្នុងការគ្រប់គ្រងតំបន់លើតំបន់ទាំងនេះ ។
សេចក្តីព្រាងដំណោះស្រាយនេះ ក៏បានសំឡឹងឃើញពីការកំណត់ផ្ទៃដីអតិបរិមាសម្រាប់តំបន់សួនឧស្សាហកម្ម និងតំបន់សេដ្ឋកិច្ច ក៏ដូចជាកំណត់ទិសដៅក្នុងការស្រូបទាញវិនិយោគ ដើម្បីផ្គូផ្គងពីគុណសម្បត្តិនៃតំបន់នីមួយៗ និងមូលដ្ឋាន និងការបង្កើតយន្តការសហប្រតិបត្តិការរវាងរដ្ឋ និងវិស័យឯកជនក្នុងការអភិវឌ្ឍតំបន់សួនឧស្សាហកម្ម និងតំបន់សេដ្ឋកិច្ចថ្មីៗ សម្រាប់វិស័យ និងឧស្សាហកម្មជាក់លាក់មួយចំនួនផងដែរ។
អត្ថបទគួរអាន
សេដ្ឋកិច្ចប្រទេសវៀតណាម ត្រូវបានគេមើលឃើញថា គឺបានឈរជើងជាមួយភាពរឹងមាំអ និងកំណើនល្អប្រសើរជាងគេនៅអំឡុងវិបត្តិជំងឺកូវីដ១៩រាតត្បាតប៉ុន្មានឆ្នាំចុងក្រោយនេះ។ ក្នុងនោះដែរបើតាមធនាគារពិភពលោកដែលទើបតែបានចេញរបាយការណ៍ថ្មីចុងក្រោយរបស់ខ្លួននោះ បានព្យាករថា សេដ្ឋកិច្ចរបស់ប្រទេសក្បែរខាងកម្ពុជាមួយនឹង នឹងសម្រេចបានកំណើនសេដ្ឋកិច្ច ៧,៥% នៅឆ្នាំ២០២២ ដោយសារការងើបឡើងវិញនៃសេដ្ឋកិច្ចរបស់ខ្លួននៅក្នុងឆមាសទីមួយ។ ចំណែកមូលនិធិរូបិយវត្ថុអន្តរជាតិបានព្យាករនៅមុននេះថា កំណើនសេដ្ឋកិច្ចវៀតណាមនឹងកើនឡើងត្រឹម ៦% ខណៈដែលធនាគារ HSBC បានរំពឹងទុកថា នឹងមានកំណើន៦,៩%។
យ៉ាងណាមិញ ធនាគារពិភពលោកបានគូសបញ្ជាក់ថា សេដ្ឋកិច្ចវៀតណាមបានកើនឡើង ៧,៧% នៅក្នុងត្រីមាសទី២ ខណៈដែលតម្រូវការប្រើប្រាស់មានការកើនឡើង ហើយចំនួនភ្ញៀវទេសចរបរទេសក៏បានកើនឡើងផងដែរ។
ធនាគារពិភពលោកបានរំពឹងថា វៀតណាមនឹងមានអតិផរណាជាមធ្យម ៣,៨% សម្រាប់ឆ្នាំនេះ ប៉ុន្តែក៏បានព្រមានដែរថា ហានិភ័យជាច្រើននៅតែអាចមានរួមទាំងការធ្លាក់ចុះកំណើន និងការជាប់គាំងនៅក្នុងទីផ្សារនាំចេញសំខាន់ៗរបស់វៀតណាម ការកើនឡើងតម្លៃទំនិញ និងការបន្តរំខាននៃខ្សែចង្វាក់ផ្គត់ផ្គង់ពិភពលោក។ វៀតណាមក៏អាចប្រឈមនឹងបញ្ហាក្នុងស្រុកមួយចំនួនទៀតផងដែរដូចជា ការបន្តខ្វះខាតកម្លាំងពលកម្ម ហានិភ័យអតិផរណាចេះតែខ្ពស់ឡើងៗ និងហានិភ័យវិស័យហិរញ្ញវត្ថុដែលចេះតែកើនឡើងផងដែរ៕
អត្ថបទ៖ សុខ ជា
