អ្វីជាទស្សនវិស័យនៃយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ របស់រាជរដ្ឋាភិបាលកម្ពុជា?

ថ្លែងនៅថ្ងៃទី១០ ខែតុលា ឆ្នាំ២០២៣ ក្នុងពិធីប្រកាសឲ្យប្រើប្រាស់ជាផ្លូវការនូវ «យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨» សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបង្ហាញពីគោលបំណងក្នុងការដាក់ចេញនូវ «យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨»នេះ។ ប្រមុខរាជរដ្ឋាភិបាលកម្ពុជា បានគូសបញ្ជាក់ថា យុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ មានគោលបំណងសំខាន់ក្នុងការលើកកម្ពស់សេដ្ឋកិច្ចកម្ពុជាឲ្យកាន់តែល្អប្រសើរ។

លើសពីនោះ ការដាក់ចេញយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ មានទស្សនវិស័យសំខាន់ៗ ចំនួន៣ រួមមាន ការកាត់បន្ថយភាពក្រីក្រ និងវិសមភាពសង្គម ការពង្រឹងភាពធន់នៃសេដ្ឋកិច្ច-សង្គម និងការជំរុញកំណើនសេដ្ឋកិច្ចជាតិ។ សម្រាប់សម្ដេចធិបតី ហ៊ុន ម៉ាណែត មិនថា ប្រជាពលរដ្ឋដែលប្រកបរបរក្នុងសេដ្ឋកិច្ចក្នុងប្រព័ន្ធ និងក្រៅប្រព័ន្ធ សុទ្ធតែសំខាន់សម្រាប់កំណើនសេដ្ឋកិច្ចជាតិ។ ក៏ប៉ុន្តែ បើទោះជាបែបនេះក្ដី សម្ដេចធិបតី នៅតែបន្តលើកទឹកចិត្តដល់ប្រជាពលរដ្ឋ ដែលប្រកបរបរក្រៅប្រព័ន្ធសេដ្ឋកិច្ចទាំងអស់ចូលក្នុងសេដ្ឋកិច្ចក្នុងប្រព័ន្ធ ​ហើយការចូលក្នុងសេដ្ឋកិច្ចក្នុងប្រព័ន្ធពីសំណាក់អ្នកប្រកបរបរក្រៅប្រព័ន្ធ មិនមានការបង្ខិតបង្ខំពីរាជរដ្ឋាភិបាលនោះឡើយ ពោលគឺអនុវត្តទៅតាមគោលការណ៍ស្ម័គ្រចិត្ត។​

ជាមួយគ្នានោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញគោលការណ៍អនុគ្រោះ ៩ចំណុច ចំពោះសហគ្រាសធុនតូច និងមធ្យម ដែលស្ម័គ្រចិត្តចុះឈ្មោះអាជីវកម្ម ផងដែរ​។ បើតាមសម្ដេចធិបតី ហ៊ុន ម៉ាណែត ចំពោះសហគ្រាសធុនតូច និងមធ្យម ដែលស្ម័គ្រចិត្តចុះឈ្មោះអាជីវកម្ម គឺមិនទទួលបានការបង្ខិតបង្ខំនោះទេ តែគឺទទួលបានការលើកទឹកចិត្តខ្ពស់ ហើយរាល់ពេលការចូលរួមដោយស្ម័គ្រចិត្តនោះ នឹងទទួលបានការលើកលែងពន្ធ និងការអនុគ្រោះនូវការផាកពិន័យផ្សេងៗ ដែលពាក់ព័ន្ធនឹងការធ្វើអនុលោមភាពកន្លងមក និងការលើកទឹកចិត្តផ្នែកពន្ធផ្សេងៗទៀត។

ប្រមុខរាជរដ្ឋាភិបាលកម្ពុជាបន្ថែមថា ចំពោះសហគ្រាសធុនតូច និងមធ្យម ដែលស្ម័គ្រចិត្តចុះឈ្មោះអាជីវកម្ម ក្រៅពីការលើកលែងការផាកពិន័យបំណុល និងការលើកទឹកចិត្តខាងពន្ធដារ ក៏នឹងទទួលបានលទ្ធភាពក្នុងការបណ្តុះបណ្តាលនានា ពាក់ព័ន្ធនឹងការអភិវឌ្ឍ ការគ្រប់គ្រងសហគ្រាស ការបណ្តុះបណ្តាលដល់បុគ្គលិក និងកម្មករ នៅក្នុងសហគ្រាស ដើម្បីលើកកម្ពស់សមត្ថភាពផលិតផល និងសហគ្រាសកាន់តែរឹងមាំ ដែលនេះគឺជាអ្វីដែលរាជរដ្ឋាភិបាលចង់ផ្តល់ឱ្យ។ ​

សូមបញ្ជាក់ថា ថ្មីៗនេះ រាជរដ្ឋាភិបាលនីតិកាលទី៧ បានជំរុញឲ្យមានការរៀបចំ ការចុះបញ្ជី អ្នកប្រកបការងារ និងមុខរបរសេដ្ឋកិច្ចក្រៅប្រព័ន្ធ ដើម្បីផ្ដល់ការគាំពារសង្គមឲ្យបានគ្រប់ជ្រុងជ្រោយ និងផ្ដល់អត្ថប្រយោជន៍ជូនកម្មករនិយោជិតដែលប្រកបការងារផ្នែកសេដ្ឋកិច្ចក្រៅប្រព័ន្ធ ក៏ដូចជា បន្តគិតគូរដល់អ្នកប្រកបការងារ និងមុខរបរផ្នែកសេដ្ឋកិច្ចក្រៅប្រព័ន្ធ ក៏ដូចជា បុគ្គលស្វ័យនិយោជន៍ ផងដែរ។ ខណៈរាជរដ្ឋាភិបាលយល់ឃើញថា វិស័យនេះចូលរួមចំណែកយ៉ាងសំខាន់ក្នុងការទ្រទ្រង់កំណើនសេដ្ឋកិច្ចជាតិ។ បើតាមរបាយការណ៍ដែលបង្ហាញដោយសម្ដេចធិបតី ហ៊ុន ម៉ាណែត សេដ្ឋកិច្ចក្រៅប្រព័ន្ធ បានគ្របដណ្តប់ប្រមាណ២០% នៃផលិតផលក្នុងស្រុកសរុប និងប្រមាណ១៦% នៃការងារសរុបក្នុងប្រទេសអភិវឌ្ឍ៕