ក្រសួងសុខាភិបាលអ៊ីស្រាអែលបានរកឃើញប្រសិទ្ធភាពនៃការចាក់វ៉ាក់សាំងដូសទី៣ ដែលធ្វើឱ្យមានភាពប្រសើរឡើងនូវការការពារ និងអាចកាត់បន្ថយហានិភ័យនៃការឆ្លងជំងឺកម្រិតស្រាល និងជំងឺធ្ងន់ធ្ងរក្នុងចំណោមមនុស្សដែលមានអាយុលើស ៦០ឆ្នាំ បើប្រៀបធៀបទៅនឹងអ្នកដែលបានទទួលការចាក់តែពីរដូស។
ទិន្នន័យនេះត្រូវបានបង្ហាញនៅក្នុងកិច្ចប្រជុំរបស់ក្រសួងជំនាញផ្នែកវ៉ាក់សាំងកាលពីថ្ងៃព្រហស្បតិ៍សប្តាហ៍មុន ហើយបានបញ្ចូលទៅក្នុងគេហទំព័ររបស់ខ្លួនកាលពីថ្ងៃអាទិត្យ ប៉ុន្ដែព័ត៌មានលំអិតនៃការសិក្សានេះមិនត្រូវបានចេញផ្សាយនោះទេ។
ទន្ទឹមនេះ មន្ត្រីអ៊ីស្រាអែលបាននិយាយថា ស្ថិតិពីវិទ្យាស្ថានធំៗចំនួន២របស់អ៊ីស្រាអែលបានឱ្យដឹងថាក្នុងចំណោមមនុស្ស ដែលមានអាយុលើសពី ៦០ឆ្នាំ ក្រោយចាក់ដូសទី៣បាន១០ថ្ងៃ ការការពារប្រឆាំងនឹងការឆ្លងមេរោគ គឺមានខ្ពស់ជាងកាលពីបានចាក់ដូសទី២ រហូតទៅដល់៤ដង។ សូមជម្រាបដែរថា ការចាក់វ៉ាក់សាំងដូសទី៣ មានប្រសិទ្ធភាព ៨៦%ក្នុងការពារការឆ្លងកូវីដ-១៩ ក្នុងចំណោមវ័យចាប់ពី៦០ឆ្នាំឡើងទៅ។
អត្ថបទទាក់ទង
ជាក់ស្ដែង កាលពីថ្ងៃសុក្រសប្ដាហ៍មុន នាយករដ្ឋមន្ត្រីអ៊ីស្រាអែល ក៏បានចាក់ដូសទី៣នេះផងដែរ។ អ៊ីស្រាអែលបានចាប់ផ្តើមយុទ្ធនាការចាក់ដូសទី៣ ដល់មនុស្សលើសពី ៦០ឆ្នាំ កាលខែកក្កដាកន្លងទៅ និងថ្មីនេះបាននិងកំពុងពង្រីកយុទ្ធនាការចាក់ដូសទី៣នេះ ដល់មនុស្សមានអាយុលើស៤០ឆ្នាំ និងបុគ្គលិកអប់រំបន្ថែមទៀត។ យ៉ាងណាមិញមនុស្សជិត ១លាន ៥សែននាក់ក្នុងចំណោមប្រជាជន ៩លាន ៣សែននាក់របស់ប្រទេសនេះ បានទទួលការចាក់ដូសទី៣ហើយ។
សូមបញ្ជាក់ថាប្រទេសអ៊ីស្រាអែលកាលពីខែឧសភាមក ករណីឆ្លងប្រចាំថ្ងៃមានសភាពស្ងប់ស្ងាត់ ប៉ុន្ដែ ចាប់ពីខែកក្កដាមក ចំនួនអ្នកឆ្លងថ្មី បានហក់ឡើងជាលំដាប់។ ជាក់ស្ដែង តួលេខនៅថ្ងៃទី២២ ខែសីហាបង្ហាញថា អ្នកឆ្លងថ្មីដែលបានរកឃើញនៅអ៊ីស្រាអែលមានជាង ៥ពាន់នាក់ ខណៈដែលអ្នកឆ្លងសរុបនៅក្នុងប្រទេសនេះ មានជិត១លាននាក់ហើយ និងអ្នកស្លាប់វិញមានជិត៧ពាន់នាក់៕
អត្ថបទ៖ ស៊ើង និមល់
None
