តាមការប៉ាន់ប្រមាណរបស់មូលនិធិរូបិយវត្ថុអន្តរជាតិ ផលិតផលក្នុងស្រុកសរុបរបស់ប្រទេសឥណ្ឌា អាចនឹងលើសប្រទេសជប៉ុន នៅត្រឹមឆ្នាំ២០២៥ ហើយក្លាយជាប្រទេស ដែលមានសេដ្ឋកិច្ចធំជាងគេលំដាប់ទី៤របស់ពិភពលោក។ តាមការវាយតម្លៃរបស់ស្ថាប័ននេះ GDP របស់ឥណ្ឌាទំនងជានឹងកើនដល់ជាង៤,៣៣ទ្រីលានដុល្លារ ក្នុងឆ្នាំ២០២៥ ខណៈដែលជប៉ុន គឺអាចមានត្រឹមតែជាង៤,៣១ទ្រីលានដុល្លារតែប៉ុណ្ណោះ។ នេះបើយោងការចុះផ្សាយរបស់សារព័ត៌មាន Nikkei Asia។
បើតាមការព្យាកររបស់ IMF កាលពីខែតុលា កន្លងទៅ សេដ្ឋកិច្ចឥណ្ឌា អាចវ៉ាដាច់ជប៉ុននៅឆ្នាំ ២០២៦ ឯណោះ ប៉ុន្តែកាលពីពេលថ្មីៗ ស្ថាប័នហិរញ្ញវត្ថុដែលមានមូលដ្ឋាននៅទីក្រុងវ៉់ាស៊ីនតោននេះ បានកែប្រែការព្យាករផលិតផលក្នុងស្រុកសរុបសម្រាប់ប្រទេសទាំងពីរ។ កម្រិតនៃតម្លៃ GDP របស់ជប៉ុនត្រូវបានអាល្លឺម៉ង់ទាញទម្លាក់ចុះកាលពីពេលថ្មីៗនេះ ហើយប្រសិនបើវាត្រូវបានវ៉ាដាច់ដោយឥណ្ឌាទៀតនោះ ជប៉ុននឹងធ្លាក់ចុះមកចំណាត់ថ្នាក់ទី៥។
អត្តបទគួរអាន
ចាប់តាំងពីសហរដ្ឋអាម៉េរិករិតបន្តឹង និងពង្រឹងការធ្វើពាណិជ្ជកម្មជាមួយនឹងទីក្រុងប៉េកាំង មកដល់ពេលនេះសេដ្ឋកិច្ចរបស់ប្រទេសឥណ្ឌា បានកើនឡើងស្រើតៗគួរឱ្យកត់សម្គាល់។ ឥណ្ឌាកាលពីប៉ុន្មានឆ្នាំកន្លងទៅបានផ្តួលអង់គ្លេសឲ្យធ្លាក់ទៅជាមហាអំណាចសេដ្ឋកិច្ចទី៦ បន្ទាប់ពីឥណ្ឌាបានឈរជើងជាមហាអំណាចសេដ្ឋកិច្ចទី១០ នៅក្នុងឆ្នាំ២០១៤។
អ្នកវិភាគបានលើកឡើងថា និន្នាការប្រឆាំងចិន ដោយអាម៉េរិក និងសម្ព័ន្ធមិត្តលោកខាងលិច នឹងកាន់តែធ្វើឲ្យឥណ្ឌា ដែលជាប្រទេសមានប្រជាជនច្រើនជាងគេបំផុតនៅលើពិភពលោក កាន់តែសកម្មឡើងនៅក្នុងចរន្តសេដ្ឋកិច្ចពិភពលោក ប៉ុន្តែទោះបីជាយ៉ាងណាក៏ដោយ បើនិយាយអំពីអត្រាផលិតផលក្នុងស្រុកសរុបរបស់ពលរដ្ឋម្នាក់ៗ គឺមានតម្លៃទាបជាងមហាអំណាចផ្សេងៗឆ្ងាយណាស់ ដោយពលរដ្ឋឥណ្ឌាអាចរកចំណូលត្រឹមតែប្រមាណជា២ពាន់ដុល្លារប៉ុណ្ណោះនៅក្នុងមួយឆ្នាំ ពោលគឺប្រហែលមួយភាគប្រាំនៃចំណូលពលរដ្ឋចិន៕
ដោយៈ សរ សុជាតិ
None
