តើប្រទេសជប៉ុននឹងចំណេញប៉ុន្មានពាន់លានដុល្លារពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP? អង្គការពាណិជ្ជកម្ម និងអភិវឌ្ឍន៍របស់អង្គការសហប្រជាជាតិ បាននិយាយថា ការនាំចេញរបស់ជប៉ុនទៅកាន់ប្រទេសសមាជិកទាំង ១៥ របស់កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ហៅកាត់ថា RCEP នឹងកើនឡើង ៥,៥% ធៀបនឹងឆ្នាំ២០១៩ ដែលជាឆ្នាំមិនទាន់មានកូវីដ១៩រាតត្បាត។
ប្រទេសជប៉ុននឹងទទួលបានអត្ថប្រយោជន៍រហូតដល់ ៤៨% នៃការកើនឡើងសរុប ឬស្មើនឹងទំហំទឹកប្រាក់ប្រហែល ២០ ពាន់លានដុល្លារពីការកិច្ចព្រមព្រៀង RCEP ខណៈដែលការនាំចេញរបស់ជប៉ុន រួមទាំងគ្រឿងបន្លាស់រថយន្ត ដែក និងផលិតផលគីមី ត្រូវបានគេរំពឹងថានឹងកើនឡើងកាន់តែខ្ពស់។ ទន្ទឹមនេះ ប្រទេសដែលទទួលបានផលធំទី ២ និង ទី៣ គឺប្រទេសចិន និងកូរ៉េខាងត្បូង ដោយចិននឹងទទួលបានអត្ថប្រយោជន៍ប្រមាណ ១១ ពាន់លានដុល្លារ និងកូរ៉េខាងត្បូងប្រមាណ ៧ពាន់លានដុល្លារ ពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP នេះដូចគ្នាដែរ។
អង្គការពាណិជ្ជកម្ម និងអភិវឌ្ឍន៍របស់អង្គការសហប្រជាជាតិ បញ្ជាក់អះអាងថា ពាណិជ្ជកម្មក្នុងតំបន់នេះនឹងកើនឡើងប្រហែល ២% ដែលទឹកប្រាក់រហូតដល់ ៤២ ពាន់លានដុល្លារដោយសារតែការកាត់បន្ថយពន្ធ។ សូមជម្រាបថា កាលពីខែវិច្ឆិកា ឆ្នាំ ២០២០ ប្រទេសសមាជិកចំនួន ១៥ របស់ RCEP បានចុះហត្ថលេខាលើកិច្ចព្រមព្រៀង RCEP ដែលលុបបំបាត់ពន្ធលើទំនិញប្រហែល ៩០%។
អត្ថបទគួរអាន
គួរឱ្យកត់សម្គាល់ដែរថា ចំពេលមានវិបត្តិកូវីដ១៩ ការចូលជាធរមាននៃ កិច្ចព្រមព្រៀង RCEP ក៏អាចលើកកម្ពស់ភាពធន់នៃពាណិជ្ជកម្មផងដែរ។ ជាក់ស្ដែងថ្មីៗនេះ អង្គការពាណិជ្ជកម្ម និងអភិវឌ្ឍន៍របស់អង្គការសហប្រជាជាតិបង្ហាញថា ពាណិជ្ជកម្មនៅក្នុងកិច្ចព្រមព្រៀងនេះមានភាពធន់នឹងការប្រឈមមុខជាមួយការធ្លាក់ចុះនៃពាណិជ្ជកម្មសកលលោក ដែលបណ្តាលមកពីជំងឺរាតត្បាតកូវីដ១៩។
គួរជម្រាបថា កិច្ចព្រមព្រៀង RCEP នឹងត្រូវចូលជាធរមាន នៅថ្ងៃទី ០១ ខែមករាឆ្នាំ២០២២ ហើយកិច្ចព្រមព្រៀងនេះ គឺជាកិច្ចព្រមព្រៀងពាណិជ្ជកម្មដ៏ធំបំផុតមួយក្នុងពិភពលោក ដោយវាតំណាងឲ្យជាង៣០% នៃទំហំ GDP សរុបរបស់ពិភពលោក និងមានចំនួនប្រជាជនសរុបដល់ទៅជាង២ពាន់លាននាក់៕
អត្ថបទ ស៊ើង និមល់
None
