ផ្សារហ៊ុនជប៉ុន ហក់ឡើងដល់កម្រិតខ្ពស់បំផុតមិនធ្លាប់មានក្នុងពេលជាង៣ទសវត្សរ៍មកនេះ

សន្ទស្សន៍ផ្សារហ៊ុនជប៉ុន នីកេ (Nikkei) បានហក់ឡើង១.២% កាលពីថ្ងៃអង្គារ ទី៩ ខែមករា ដោយឡើងជិតដល់៣ម៉ឺន៤ពាន់ពិន្ទុ ដែលជាកម្រិតខ្ពស់បំផុតមិនធ្លាប់មានគិតចាប់តាំងពីខែមីនា ឆ្នាំ១៩៩០។ ភាគហ៊ុនរបស់ក្រុមហ៊ុនដែលរកស៊ីពាក់ព័ន្ធការផលិតបន្ទះឈីបដូចជាក្រុមហ៊ុន តូក្យូ អេឡិចត្រុន (Tokyo Electron) ជាដើម បានហក់ឡើង បន្ទាប់ពីភាគហ៊ុនបច្ចេកវិទ្យាទំនើបនៅសហរដ្ឋអាម៉េរិកបានហក់ឡើង។

សន្ទស្សន៍ផ្សារហ៊ុនគោលនេះបានបន្តហក់ឡើងថែមទៀតនៅព្រឹកថ្ងៃពុធ ទី១០ ខែមករា ដោយវាបានហក់ឡើងលើស៣ម៉ឺន៤ពាន់ពិន្ទុ ដោយក្នុងនោះភាគហ៊ុនរបស់សាជីវកម្មបច្ចេកវិទ្យាអាម៉េរិក អិនវីឌា (NVIDIA) បានបន្តហក់ឡើងខ្ពស់បំផុត២ថ្ងៃជាប់ៗគ្នាចាប់តាំងពីបានចុះបញ្ជីលើទីផ្សារហ៊ុនមក។

ខណៈមានការរំពឹងថា នឹងមានការបញ្ចុះអត្រាការប្រាក់ពីសំណាក់ធនាគារកណ្ដាលអាម៉េរិក បានជំរុញការទិញភាគហ៊ុននៅសង្កាត់ហិរញ្ញវត្ថុ Wall Street កើនឡើង ក្រុមអ្នកវិនិយោគសកលក៏រំពឹងដែរថា ភាគហ៊ុនជប៉ុន នឹងមានឱកាសហក់ឡើងដែរ។

លើសពីនេះ កម្មវិធីវិយោគរួចពន្ធ ដែលត្រូវបានកែសម្រួលថ្មីៗរបស់ជប៉ុន ហៅកាត់ថា NISA ត្រូវបានរំពឹងថា នឹងជំរុញឱ្យប្រាក់វិនិយោគផ្នែកលក់រាយបន្ថែមទៀតហូរចូលមកកាន់ផ្សារហ៊ុនជប៉ុន។

ទោះជាយ៉ាងណា គេនៅមិនទាន់ដឹងថា តើការបន្តហក់ឡើងក្នុងផ្សារហ៊ុននេះនឹងអាស្រ័យលើការដំឡើងប្រាក់ឈ្នួល និងសូចនាករផ្សេងៗទៀត ដែលឆ្លុះបញ្ចាំងពីវដ្ដសេដ្ឋកិច្ចវិជ្ជមានប្រកបដោយនិរន្តរភាព ឬយ៉ាងណានោះទេ។

សូមរំឭកថា តម្លៃផ្សារហ៊ុនជប៉ុន ក៏ធ្លាប់បានហក់ឡើងទ្វេដងម្ដងដែរនៅចុងឆ្នាំ១៩៨៩ មុនពេលធ្លាក់ចុះវិញនៅខែមីនា ឆ្នាំ១៩៩០ ជាពេលដែលក្រសួងហិរញ្ញវត្ថុជប៉ុន បានដាក់ការរឹតបន្តឹងលើទំហំសរុបនៃកម្ចីអចលនទ្រព្យជាហេតុធ្វើឱ្យតម្លៃផ្សារហ៊ុនចាប់ផ្ដើមធ្លាក់ចុះចាប់តាំងពីពេលនោះមក៕

អត្ថបទ៖ សុខ ជា