ទុរេនវៀតណាម​ដាំក្បាលចុះសល់ត្រឹម១ដុល្លារក្នុង១គីឡូក្រាម​ក្រោយចិនផ្អាកទិញបន្ទាប់ពីរកឃើញសារធាតុគីមី

វិស័យដាំដុះទុរេននៅវៀតណាម កំពុងរងសម្ពាធយ៉ាងខ្លាំងពីបញ្ហាតម្លៃធ្លាក់ចុះ ស្របពេលដែលពាណិជ្ជករជាច្រើនបានលុបចោលការបញ្ជាទិញ រីឯថ្លៃដើមនៃការបង្កបង្កើនផលវិញបែរជាហក់ឡើងខ្ពស់។ បើយោងតាមការចុះផ្សាយរបស់សារព័ត៌មាន VN Express បច្ចុប្បន្នតម្លៃទុរេននៅវៀតណាម បានធ្លាក់ចុះមកនៅត្រឹមចន្លោះពី០,៨ ទៅ១,១ដុល្លារប៉ុណ្ណោះក្នុងមួយគីឡូក្រាម មានការធ្លាក់ចុះយ៉ាងគំហុករហូតដល់៦៦% បើប្រៀបធៀបទៅនឹងតម្លៃកាលពីខែមករា កន្លងទៅ។
ស្ថានភាពនេះ បានបង្ខំឱ្យកសិករជាច្រើននៅក្នុងខេត្តដុងថាប់ និងទីក្រុងកឹងធើ ដាច់ចិត្តដឹកទុរេនមកដាក់លក់តាមដងផ្លូវ និងតាមទីផ្សារក្នុងស្រុកដោយខ្លួនឯងជំនួសឱ្យការលក់ដុំ ក្រោយការបញ្ជាទិញពីសំណាក់ឈ្មួញកណ្តាលធំៗត្រូវបានលុបចោល។
ក្រុមកសិករវៀតណាម បានស្រែកត្អូញត្អែរថា តម្លៃជី និងថ្នាំកសិកម្មសុទ្ធតែឡើងថ្លៃខ្ពស់ ប៉ុន្តែតម្លៃទុរេនបែរជាធ្លាក់ថោកហួសហេតុ ដែលធ្វើឱ្យចម្ការមួយចំនួនត្រូវរងការខាតបង់ទឹកប្រាក់រហូតដល់ខ្ទង់ម៉ឺនដុល្លារ។ ប្រភពដដែលបានឱ្យដឹងថា មូលហេតុចម្បងនៃការដាំក្បាលចុះរបស់ទុរេនវៀតណាមនេះ គឺដោយសារការបញ្ជាទិញពីប្រទេសចិន ដែលជាទីផ្សារធំជាងគេបានជួបការរាំងស្ទះជាថ្មី ក្រោយចិន បានរកឃើញសារធាតុគីមីកសិកម្មលើសកម្រិតកំណត់នៅក្នុងទុរេននាំចូលមួយចំនួនរបស់វៀតណាម។
មិនត្រឹមតែទីផ្សារប្រទេសចិន នោះទេ សូម្បីតែទីផ្សារធំៗផ្សេងទៀត ដូចជា សហភាពអឺរ៉ុប សហរដ្ឋអាម៉េរិក ជប៉ុន និងកូរ៉េខាងត្បូង ក៏កំពុងតែរឹតបន្តឹងស្តង់ដាគុណភាព និងអនាម័យលើការនាំចូលទុរេនពីវៀតណាមយ៉ាងតឹងរ៉ឹងផងដែរ ដែលនេះបានក្លាយជាសម្ពាធដ៏ធំមួយសម្រាប់កសិករ និងអ្នកនាំចេញវៀតណាមនាពេលបច្ចុប្បន្ន៕

ដោយៈ សរ សុជាតិ