ចាប់តាំងពីឆ្នាំ២០២០មក ប្រទេសជប៉ុនបានចាត់ទុកថា ប្រទេសចិនបាននិងកំពុងគំរាមកំហែងសន្តិសុខជាតិរបស់ខ្លួន តាមរយៈសំណុំរឿងកោះតៃវ៉ាន់ដែលមានទីតាំងគៀកទៅនឹងកោះរបស់ជប៉ុន ដែលឈ្មោះថា កោះសេនកាគូ ដែលស្ថិតនៅក្នុងតំបន់សមុទ្រចិនខាងកើត ត្រូវបានគេស្គាល់ថា ជាតំបន់ជម្លោះរវាងមហាក្សសេដ្ឋកិច្ចលេខទី២ លេខ៣ក្នុងលោក គឺ ចិន ហើយនិងជប៉ុន។
នៅក្នុងរយៈពេល១០ឆ្នាំកន្លងមកនេះ រដ្ឋាភិបាលជប៉ុនបានដំឡើងថវិការសម្រាប់វិស័យការពារជាតិជាបន្តបន្ទាប់។ ជាក់ស្ដែងសំណើសុំថវិការការពារជាតិសម្រាប់ឆ្នាំ២០២២ កើនឡើង ២,៦% នៃ ការចំណាយសរុប ស្មើនឹងជិត ៥០ពាន់លានដុល្លារអាមេរិក។
ការដំឡើងថវិការឥតឈប់ឈរនៅក្នុងវិស័យការពារជាតិជប៉ុន បានសបញ្ជាក់ឱ្យឃើញពីការប្ដេជ្ញាចិត្តរបស់រដ្ឋាភិបាលក្រុងតូក្យូ ក្នុងការបង្កើនសម្ថភាពយោធា និង លើកកម្ពស់ការអភិវឌ្ឍបច្ចេកវិទ្យាថ្មីៗ ក្នុងនោះការអភិវឌ្ឍយន្តហោះចំបាំងទំនើបៗ ព្រមទាំងហេដ្ឋារចនាសម្ព័ន្ធយោយោធាទាក់ទងនឹងអវកាស ដូចជា ផ្កាយរណប ឡាស៊ែរ ប្រព័ន្ធតាមដានសកម្មភាពក្នុងលំហអាកាស ប្រព័ន្ធរាដា ដើម្បីពង្រឹងការការពារប្រឆាំងនឹងការវាយប្រហារតាមអ៊ីនធឺណិតជាដើម។
សូមជម្រាបថា ក្រសួងការពារជាតិជប៉ុនបានស្នើសុំថវិការចំនួនជាង
១ពាន់១រយលានដុល្លារអាមេរិក
សម្រាប់បញ្ជាទិញយន្តហោះចម្បាំងបំបាំងកាយទំនើប ប្រភេទ F-35
បន្ថែមទៀត និងថវិកាប្រមាណ ៩០លានដុល្លារអាមេរិកទៀត
សម្រាប់នាវាដឹកជញ្ជូនខ្នាតតូចនិងមធ្យម
ដើម្បីគាំទ្រដល់ប្រតិបត្តិការការពារដែនកោះដាច់ស្រយាលនៅភាគនិរតីនៃប្រទេសជប៉ុន
នៅតាមបណ្តោយសមុទ្រចិនខាងកើត។
អត្ថបទគួរអាន
ទន្ទឹមនេះ ជប៉ុនគ្រោងចំណាយថវិកាប្រមាណ ៩៥០លានដុល្លារទៀត ដើម្បីអភិវឌ្ឍយន្តហោះចម្បាំងក្នុងស្រុកថ្មីដំបូងរបស់ខ្លួននៅឆ្នាំក្រោយ។ គម្រោងនេះត្រូវបានគេរំពឹងថានឹងបញ្ចប់នៅឆ្នាំ ២០៣០ ក្នុងតម្លៃប្រហែល ៤០ ពាន់លានដុល្លារ ដែលជាការដឹកនាំផលិតដោយក្រុមហ៊ុនឧស្សាហកម្ម Mitsubshi ។
ដូចនេះ យុទ្ធសាស្ត្ររបស់ទីក្រុងតូក្យូ គឺបង្កើតកម្លាំងប្រដាប់អាវុធបំពាក់ដោយឧបករណ៍ទំនើបៗចុងក្រោយបង្អស់ដើម្បីរារាំងទីក្រុងប៉េកាំងពីសកម្មភាពយោធា ដើម្បីដោះស្រាយជម្លោះដែនទឹក ឬជម្លោះផ្សេងៗទៀតនៅក្នុងតំបន់។
ទោះយ៉ាងណាក៏ដោយ ការបង្កើនថវិកាលើការចំណាយលើវិស័យការពារជាតិរបស់ជប៉ុនមិនគ្រប់គ្រាន់ដើម្បីរក្សាល្បឿនថវិកាយោធារបស់ចិននោះទេ ជាក់ស្ដែងថវិកាយោធាចិនកើនឡើង ៦.៨% នៅឆ្នាំក្រោយ បើប្រៀបធៀបទៅនឹងការកើនឡើង ២,៦% របស់យោធាជប៉ុន៕
អត្ថបទ៖ ស៊ើង និមល់
None
