រដ្ឋមន្ត្រីសេដ្ឋកិច្ចជប៉ុន លោក Daishiro Yamagiwa នៅក្នុងសន្និសិទសារព័ត៌មានកាលពីថ្ងៃចុងសប្តាហ៍មុន បានបង្ហាញជំនឿចិត្តថា ចក្រភពអង់គ្លេសទំនងអាចចូលជាសមាជិករបស់កិច្ចព្រមព្រៀងវឌ្ឍនភាពគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក ឬ CPTPP នៅក្នុងឆ្នាំ២០២២នេះ។ ការលើកឡើងបែបនេះ ធ្វើឡើងបន្ទាប់ពី មានជំនួបប្រជុំថ្នាក់រដ្ឋមន្ត្រី CP TPP ក្នុងប្រទេសសិង្ហបុរី ក្រោមការដឹកនាំប្រជុំដោយប្រទេសជប៉ុនដែលជា ប្រធានក្រុងការងារត្រួតពិនិត្យលើសមាជិកភាពរបស់អង់គ្លេស ហើយសមាជិកភាពច្រើនបានបង្ហាញទស្សនវិជ្ជមានទៅលើចក្រភពអង់គ្លេស។
ជាងនេះទៅទៀត រដ្ឋមន្ត្រីសេដ្ឋកិច្ចជប៉ុនរូបនេះ ជឿថាសមាជិកភាពរបស់អង់គ្លេសក្នុងកិច្ចព្រមព្រៀង CP TPP នៅពេលនេះ នឹងក្លាយជាគំរូដ៏ល្អសម្រាប់អ្នកក្រោយៗ ដែលចង់ចូលរួមក្នុងកិច្ចព្រមព្រៀងពាណិជ្ជកម្មនេះដែរ ពិសេសគឺការបំពេញតាមស្តង់ដារខ្ពស់ ក្នុងការធ្វើពាណិជ្ជកម្មស្របតាមច្បាប់ និងតម្លាភាព។
គួររំឭកថា ក្រោយពីបំបែកចេញពីសហភាពអឺរ៉ុបបានមួយឆ្នាំ អង់គ្លេសងាកទៅរកដៃគូថ្មីៗ។ ជាក់ស្តែង អង់គ្លេសបានស្នើសុំជាផ្លូវការកាលពីដើមខែកុម្ភៈឆ្នាំ២០២១ ចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក។ ប៉ុន្មានខែក្រោយមក គណៈកម្មាការ CP TPP បានយល់ព្រមចាប់ផ្តើមការចរចាជាផ្លូវការជាមួយអង់គ្លេស។
មួយរយៈមុនក៏មានដែរ កោះតៃវ៉ាន់ ប្រទេសចិន អេក្វាដឺ និងកូស្តារីកា បានស្នើសុំចូលជាសមាជិក និងត្រូវបានគណៈកម្មការ CPTPP លើកយកមកពិភាក្សាគ្នាហើយដែរ ប៉ុន្តែមិនទាន់មានអ្វីជាដុំកំភួនឡើយ។
អត្ថបទគួរអាន
កាលពីខែកញ្ញាឆ្នាំមុន ប្រទេសចិនដែលជាមហាអំណាចសេដ្ឋកិច្ចទីពីររបស់ពិភពលោកបានដាក់ពាក្យស្នើសុំចូលរួមក្នុងកិច្ចព្រមព្រៀង CP TPP ដើម្បីបង្កើនឥទ្ធិពលរបស់ខ្លួននៅក្នុងតំបន់អាស៊ីប៉ាស៊ីហ្វិក។ សិង្ហបុរី និងម៉ាឡេស៊ីបាននិយាយថា ពួកគេស្វាគមន៍ចិនក្នុងការចូលរួមជាមួយកិច្ចព្រមព្រៀងនេះ ។ ប៉ុន្តែប៉ុន្មានថ្ងៃបន្ទាប់ពីការដាក់ពាក្យសុំរបស់ចិន កោះតៃវ៉ាន់បានបញ្ជូនសំណើរបស់របស់ខ្លួនមកដែរ។
ប្រទេសម៉ាឡេស៊ី កាលពីចុងខែកញ្ញាកន្លងទៅនេះ ក៏ទើបតែបានផ្ដល់សច្ចាប័នផ្លូវការ សម្រាប់កិច្ចព្រមព្រៀង CP TPPនេះផងដែរ ។ កិច្ចព្រមព្រៀង CP TPP ត្រូវបានបង្កើតឡើងតាំងពីខែមីនាឆ្នាំ២០១៨ ដោយប្រទេសជាសមាជិកចំនួន១១ ហើយប្រទេសមីយ៉ាន់ម៉ា គឺជាប្រទេសទី៩ហើយ ដែលបានផ្ដល់សច្ចាប័នសម្រាប់កិច្ចព្រមព្រៀងនេះ និងនៅសល់ប្រទេសចំនួន២ទៀត មិនទាន់ផ្ដល់សច្ចាប័ន រួមមាន ប្រ៊ុយណេ និងឈីលី។
គួរកត់សម្គាល់ថា ដើម្បីចូលរួមកិច្ចព្រមព្រៀងពាណិជ្ជកម្មនេះបាន គឺត្រូវមានការយល់ព្រមជាការចាំបាច់ពីសមាជិកទាំង១១ប្រទេសដូចជា អូស្ត្រាលី ប្រ៊ុយណេ កាណាដា ឈីលី ជប៉ុន ម៉ាឡេស៊ី ម៉ិកស៊ិក នូវែលសេឡង់ ប៉េរូ សិង្ហបុរី និងវៀតណាម។
សូមបញ្ជាក់ថា កិច្ចព្រមព្រៀង CP TPP មានកម្មវត្ថុដើម្បីលុបរនាំងពន្ធគយក្នុងតំបន់អាស៊ីប៉ាស៊ីហ្វិក ដែលតំណាងឱ្យការផ្តោះប្តូរពាណិជ្ជកម្មសម្រាប់ប្រជាពលរដ្ឋជិត៥០០លាននាក់ និងពិសេសគឺដើម្បី ទប់ទល់នឹងឥទ្ធិពលពាណិជ្ជកម្មចិន ដែលរីកធំជាលំដាប់ក្នុងតំបន់៕
