ប្រមុខដឹកនាំរាជរដ្ឋាភិបាលកម្ពុជា សម្តេច តេជោ ហ៊ុន សែន និងលោកនាយករដ្ឋមន្ត្រីសិង្ហបុរី លី សៀន ឡុង បានជួបពិភាក្សាតាមប្រព័ន្ធវីដេអូ ដើម្បីជជែកអំពីបញ្ហានានា ពិសេសទាក់ទិននឹងស្ថានការណ៍នៅមីយ៉ាន់ម៉ា កាលពីថ្ងៃទី ១៤ ខែមករាឆ្នាំ២០២២។
នៅក្នុងជំនួបនោះ សម្តេចតេជោ ហ៊ុន សែន បានថ្លែងពីលទ្ធផល និងគោលបំណងនៃដំណើរបំពេញទស្សនកិច្ចទៅកាន់ប្រទេសមីយ៉ាន់ម៉ាកាលពីដើមខែមករានេះ។ បើតាមហ្វេសប៊ុកផេកសម្តេចតេជោ បានបញ្ជាក់ពីលទ្ធផលក្រោយជំនួបជាមួយនឹងលោក លី សៀនឡុង នាយករដ្ឋមន្ត្រីសិង្ហបុរីថា លោក លី សៀនឡុង បានគាំទ្រចំពោះការខិតខំប្រឹងប្រែងរបស់កម្ពុជា ជាពិសេសក្នុងនាមជាប្រធានអាស៊ាន រួមទាំងការងារប្រេសិតពិសេសរបស់ប្រធានអាស៊ានក្នុងការចូលរួមដោះស្រាយវិបត្តិនៅមីយ៉ាន់ម៉ា។ ពាក់ព័ន្ធទៅនឹងដំណើរបន្ដទៅមុខទៀត ថ្នាក់ដឹកនាំប្រទេសទាំងពីរក៏បានផ្លាស់ប្ដូរយោបល់គ្នាដើម្បីស្វែងរកដំណោះស្រាយដល់មីយ៉ាន់ម៉ាផងដែរ។
នាយករដ្ឋមន្ត្រីសិង្ហបុរី បានជំរុញឱ្យកម្ពុជា ក្នុងនាមជាប្រធានអាស៊ាន គួរជួបទំនាក់ទំនងជាមួយគ្រប់ភាគីជម្លោះទាំងអស់នៅមីយ៉ាន់ម៉ា។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រ។ លោក លី សៀនឡុង បានបន្ថែមថា អាស៊ានគួរតែបន្តការសម្រេចចិត្ត ដោយជំនួសឲ្យការអញ្ជើញរដ្ឋាភិបាលយោធាមីយ៉ាន់ម៉ា មកជាការអញ្ជើញអ្នកតំណាង ដែលមិនមែនជាអ្នកនយោបាយមកពីមី យ៉ាន់ម៉ាឲ្យចូលរួមកិច្ចប្រជុំអាស៊ានក្នុងឆ្នាំនេះជំនួសវិញ។
បន្ថែមពីលើនេះ មេដឹកនាំសិង្ហបុរីរូបនេះ ជំរុញឱ្យប្រធានអាស៊ានថ្មី គឺកម្ពុជា រក្សាទំនាក់ទំនងជាមួយភាគីពាក់ព័ន្ធជម្លោះទាំងអស់នៅមីយ៉ាន់ម៉ា ក្នុងនោះរួមទាំងរដ្ឋាភិបាលយោធា និងបក្សសម្ព័ន្ធប្រជាជាតិដើម្បីប្រជាធិបតេយ្យផងដែរ។
ទោះយ៉ាងណា ថ្មីៗនេះ អ្នកនាំពាក្យក្រុមប្រឹក្សាយោធាមីយ៉ាន់ម៉ាដែលកំពុងកាន់អំណាច បានអះអាងថា ប្រទេសមីយ៉ាន់ម៉ាជឿជាក់ថា កម្ពុជានឹងដើរតួនាទីប្រកបដោយយុត្តិធម៌អំឡុងពេលធ្វើជាប្រធានរបស់អាស៊ាននៅក្នុងឆ្នាំ២០២២នេះ។
លោកស្រី ណូអែលលីន ហាយស័រ ប្រសិតពិសេសអង្គការសហប្រជាជាតិ ទទួលបន្ទុកកិច្ចការមីយ៉ាន់ម៉ា ក្នុងជំនួបជាមួយសម្តេចតេជោ ហ៊ុន សែន កាលពីសប្ដាហ៍មុន ក៏បានជ្រោមជ្រែងកម្ពុជាដើម្បីស្វែងរកកិច្ចខិតខំប្រឹងប្រែងរួមគ្នាក្នុងជំនួយមនុស្សធម៌ និងកំពុងស្វែងរកវឌ្ឍនភាពក្នុងកិច្ចព្រមព្រៀងជាឯកច្ឆន្ទទាំង ៥ចំណុចរបស់អាស៊ានផងដែរ៕
